سەرۆكێ بنگەهێ لالش:باوەر ناكەم ئێزدی ژ كابینا نوو یا حكومەتا كوردستانێ بێ بەهر بن
تۆرا لالش یا راگەهاندنێ/دهۆك
سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی ل دهۆكێ راگەهاند كو ئەم دوێ باوەریێ دانە د كابینا نوو یا حكومەتا هەرێما كوردستانێ ژی دا ئێزدی بێ بەهر نابن،چنكو ئێزدی بەشەكی رەسەنن ژ ڤی مللەتی و خۆ ب خودانێ ڤێ ئاخێ دزانن.
ئیرۆ ئێك شەمبوویێ 30ی حوزەیرانا 2019ێ كۆمبوونا ئاسایی یا دەستەیا بلندا بنگەهێ لالش یێ رەوشەنبیری و كۆمەلایەتی ب سەرۆكاتیا بەرێز “شێخ شامۆ” سەرۆكێ بنگەهێ لالش و بەرپرسێن تایێن بنگەهێ لالش ب رێڤەچۆ.
دكۆمبوونێ دا بەرێز “شێخ شامۆ” سەرۆكێ بنگەهێ لالش دیاركر كو هەڤدیتنا بالیۆزێ ئەمریكی ل عێراقێ و كونسلێ ئەمریكی ل هەولێر دگەل سەرۆكێ بنگەهێ لالش و چەند كەسایەتیێن دیتر دیتنەكا باشبوو كو رەوشا ئێزدیان هات گەنگەشەكرن،خویاكر كو رەوشا دەڤەرێ ب گشتی وەسا نامینت و مە ژ بالیۆز و كونسلێ ئەمریكی خواست ئەمریكا ب چاڤەكی دیتر بەرێ خۆ بدەتە ئێزدیان چنكو رەوشا ئێزدیا یا ئالۆزە.
دتەوەرەكی دی یێ كۆمبوونێ دا شێخی بەحسێ حكومەتا تازە یا هەرێما كوردستانێ كر ل دەمەكی نێزیك ب سەرۆكاتیا كاك مەسرور بارزانی حكومەت دێ ئێتە پێكئینان و دیاركر دوێ باوەریێ دامە كو ئێزدی ژڤێ حكومەتێ بێ بەهر نابن و دێ بنە شریكێن ڤێ حكومەتێ و دووپاتكر كو تایبەتمەندیا ئێزدیا دڤێ حكومەتێ دا دێ ئێتە بەرچاڤكرن.
هەر دكۆمبوونێ دا سەرۆكێ بنگەهێ لالش بزاڤێن تایی و نڤیسینگەهێن لالش ل سەرانسەری دەڤەرێن ئێزدیان بلند نرخاندن و دەست خۆشی ل كار و چالاكیێن وان یێن بەردەوام كر و هیڤی خواست رۆژ بۆ رۆژێ چالاكیێن مەزنتر و هەژی تر بكن بۆ خزمەتا خەلكی و ب تایبەت ژی ناڤا ئاواران دا.
ژلایەكی دی ڤە شێخی بەحسێ روونشتنا خۆ دگەل بالیۆزێ سوێسرا كر و دهەڤدیتنێ دا داخوازكر كو حكومەتا سوێسرا بتر فشارێ بێختە سەر رێكخراوا و جڤاكێ نێڤ دەولەتی بۆ هندێ هاریكاریا ئاوارە و دەست كورتان بكن.
هەروەسا سەرۆكێ بنگەهێ لالش بەحسێ گرنگیا چالاكیا بنگەهێ لالش تایێ خانكێ ئەنجام دایی كو روونشتنەكا تایبەت بوو بۆ شلۆڤەكرنا پەرتۆكا(شنگالنامە) یا نڤیسەر” ئبراهیم یوسف” و دیاركر كو پشتەڤانیا ڤان جۆرە پەرتۆكان ژ ئەركێ سەرەكی یێ بنگەهێ لالشە.
سەرۆكێ بنگەهێ لالش ئاماژە ب وێ چەندێ دا كو پشكداری و بەرهەڤبوونا بنگەهێ لالش ل پێشانگەها شوونوار و مەزارگەهێن ئێزدی و مەسیحیان ل هەولێر گەلەك یا گرنگە.
پاشی كار و چالاكیێن بنگەهێ لالش ل ئەلمانیا بلند نرخاندن و دیاركر كو هەبوونا ڤی بنگەهی ل ئەلمانیا وەكو مالەكا رەوشەنبیری و نەتەوەیی یە بۆ هەر كەسەكی قەستا ڤێ مالێ بكت.
ل داویێ ئەندامێن دەستەیا بلند و بەرپرسێن تایێن بنگەهێ لالش كار و چالاكیێن بنگەهێ لالش گەنگەشەكرن.
تُتاح هذه الصورة أيضا في: کوردی