سەرۆك بارزانی: پارتى پارێزەرێ راستەقینەيێ مافێن ئێزدیايە
هەولێر-KDP.info- 
سەرۆك بارزانی لگەل دەستەيا بلندا بنگه‌هێ لالش و گشت تايى و نڤيسینگەهێن لالش و ژماره‌كا کەسایەتیێن ئێزدى کۆمبوو و راگەهاند، پارتى پارێزەرێ راستەقینەيێ مافێن ئێزدیايە و هندى پارتی بهێزتر بت مافێن ئێزدیان زێده‌تر دێ پاراستى بن.
ئەڤ گۆتنێن سەرۆك بارزانی ل کۆمبوونەكێ دا هاتن کو رۆژا پێنج شەمبوويێ ٢٧ى ئەیلوولا ٢٠١٨ێ ل دهۆکێ ب رێڤەچوو.
د وێ كۆمبوونێ دا سەرۆك بارزانی گۆتاره‌ك پێشکێشکر و ده‌ستپێكێ دەستخۆشی ل بنگه‌هێ لالش کر بۆ خزمەتێن پێشکێشی خوشك و برایێن ئێزدی و دۆزا ئێزدیان دكت.
سەرۆك بارزانی دکۆمبوونێ دا راگەهاند:هيچ کارەساتێن هندى ئەوا بسه‌رێ خوشك و برایێن ئێزدى دا هاتى ئازار نەدايمه، بەلێ سوپاس بۆ خودێ تۆلڤه‌كرنه‌كا مەردانە لسه‌ر دەستدرێژڤانان هاته کرن و ب خوونا شەهیدان و ئازايه‌تيا پێشمەرگەيێ قارەمان،ئەو تاوانبارێن کارەسات بسەرێ وە ئيناين کەفتنە ژێر پێيێن زارۆك و کچ و کورێن ئێزدی.
سەرۆک بارزانی راگەهاند ژى ئێزديان كاريه رەسەنایەتیا کوردی بپارێزن و چوو هێزه‌ك نكارت وان ژ گه‌لێ كورد ڤه‌قه‌تينت،رۆنكر ژى: پشتى پرۆسا ئازاديا عێراقێ و ل ده‌مێ پێكئينانا حكومه‌تا عێراقێ دا پێداگه‌ريه‌كا زۆر كرن و ئه‌و رێگريا ده‌روونى شكاند كو رێ نه‌دا ئێزديان پۆستێن بلند هه‌بن و مه كارى پۆستێ وه‌زيره‌كى بۆ ئێزديان وه‌ربگرين.
سەرۆك بارزانی جەخت ل وێ چه‌ندێ كر:پارتى پارێزەرێ ڕاستەقینەيێ مافێن ئێزدیايە و هندى پارتی بهێزتر بت مافێن ئێزدیان زێده‌تر دێ پاراستى بن و ده‌ستكه‌فتێن زێده‌تر دێ هه‌بن.
سەرۆك بارزانی ئاماژە ب هەلبژارتنێن ئەنجومەنێ نوونەرين عێراقێ کر کو ل ئه‌یارا بۆرى رێڤەچۆن و راگەهاند: مخابن ل وان هەلبژارتنان دا ده‌هان هەزار دەنگێن وە هاتنه سۆتن ب ئارمانجا هندێ پارتی نكارت دەنگێن ئێكه‌مێن مووسل بده‌ستڤه‌بينت، زۆر غەدرا دى ژى هاته كرن و سەرەرای هەموو فشارێن ئەوێن دڤيان پارتی تووشی شکه‌ستنێ ببت،به‌لێ پارتی وەك حزب لسەر ئاستێ هەموو عێراقێ بوو حزبا ئێكێ و سەرکەفتنه‌كا مه‌زن بده‌ستڤه‌ئينا.
سەرۆك بارزانی ئاماژه ب هەلبژارتنێن 30ى ئەیلوولێ کر و راگەهاند: ئەوێن خۆشگۆزەرانی و ئارامی و پێشکەفتنا زێده‌تر دڤێن بلا ل وان هەڵبژارتنان دا دەنگ ب پارتی بدەن، چنکو پارتی سەرکەفتنێن مه‌زنتر بده‌ستڤه‌بينت دێ ده‌ست ڤه‌كرى بت بۆ هندێ زێده‌تر خزمه‌تێ بكت وەك هەرده‌م بهێز بەرگریێ ژ کوردستانێ بکت و گهۆرينێن مه‌زن و چاکسازیێن بنەرەتى ژى بكت.
سەرۆك بارزانی راگەهاند ژى نهۆ و ل ئاینده‌ى دا ژى داكۆكيێ لسه‌ر ئاشتيێ و درێژكرنا ده‌ستێ برایه‌تيێ بۆ هه‌موو لایه‌كى دكه‌ين،نهۆ دەرفەتا ديالۆك و لێکتێگەهشتنێ هەیە بۆ هندێ ب ديالۆكێ و لسه‌ر بنه‌مايێ ته‌وافق و ته‌وازن و لگۆر ده‌ستوورى كێشه بێنه چارەسەركرن.
سەرۆك بارزانی سوپاسيا هەلويستێ گەلێ عێراقێ کر کو نەکەڤتنە ژێر کاریگەریا هەلويستێن دەستهه‌لاتدارێن بەغدا و راگەهاند:ترسا من يا زۆر ئه‌و بوو كو ئه‌و فه‌رهه‌نگا دژى كوردان كو هنده‌ك به‌رپرسان دڤيان بكه‌نه فه‌رهه‌نگا جادا ئه‌ره‌بى ل عێراقێ و سه‌رنه‌گرت. به‌لێ ل هه‌لبژارتنێن ١٢ى ئه‌یارێ گه‌لێ عێراقێ زۆربه‌يا وان كه‌سان سزادان،كو دڤيان لسه‌ر كيستێ دژایه‌تیكرنا خه‌لكێ كوردستانێ و مافێ خه‌لكێ كوردستانێ خۆ بكه‌نه قاره‌مان، به‌لێ ژ لایێ گه‌لێ عێراقێ ڤه هاتنه سزادان و سوپاس بۆ گه‌لێ عێراقێ،ئه‌ڤ هه‌لويستێ گه‌لێ عێراقێ كاریگه‌ریه‌كا زۆر زۆر يا مه‌زن لسه‌ر مه هه‌بوو.
سەرۆك بارزانی ل بیرا ئامادەبوويان ئينا کو بارزانیێ نەمر،ب درێژاهیا شۆره‌شا ئەیلوولێ، راسپاردێن وى بۆ مه ئەو بوون کو نابت شه‌رى بهێلین و ناکۆکیێن دناڤبه‌را مە لگەل حکومەتا عێراقێ ببتە شه‌رێ ناڤبه‌را دوو ملله‌تان و ئەو ب كوفر و تاوان دزانی، نهۆ ژى ئه‌م پابەندی وان ئامۆژگاری و حيكمه‌‌تا جەنابێ بارزانى نه و چوو ده‌مان رێ ناده‌ين ناكۆكيێن مه لگه‌ل حكومه‌ته‌كێ ببته شه‌ر و ناكۆكيا ناڤبه‌را گه‌لێ كورد و ئه‌ره‌بان یان گه‌له‌كى ديتر.
هەر د کۆمبوونێ دا سەرۆك بارزانی به‌رسڤا پرسیار و سەره‌نجا ئامادەبوويان دا.
ل داويا كۆمبوونێ بنگەهێ لالش وەك رێزلێنانه‌ك ل پشته‌ڤانيا بەردەواما سەرۆك بارزانی بۆ ئێزدیان،تابلۆیەك کو هێما و ئارمێ بنگه‌هێ لالش بوو، پێشکێشی سەرۆك بارزانی کر.
تُتاح هذه الصورة أيضا في: کوردی
