ئازار 28, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

“شێخ شامۆ” بۆ شاندەكی ئەمریكی: خەلكێ‌ شنگال ڤەنەگەریاینە دەڤەرێن خۆ،بەلێ‌ تاوانبارێن خەلكێ‌ مە كەنیزە كرین ڤەگەریاینە دەردۆران

شاندێ‌ ئەمریكی پیرۆزباهیان پێشكێشی ئێزدیان دكت ب هەلكەفتا جەژنا سەر سالێ‌
تۆرا لالش یا راگەهاندنێ‌/پەرستگەها لالش
ل رۆژا دوو شەمبوویێ‌ 16ی نیسانا 2018 و ژبۆ پێشكێشكرنا پیرۆزباهیا ب هەلكەفتا جەژنا سەر سالێ‌(سەرێ‌ سالا ئێزدیان)شاندەكی ئەمریكی یێ‌ پێكهاتی ژ بەرێز”جوی هود”جێگرێ‌ بالیۆزێ‌ ئەمریكا ل بەغدا و “ستیڤن گیلن”جێگرێ‌ كونسلێ‌ ئەمریكا یێ‌ گشتی سەرەدانا پەرستگەها پیرۆزا لالش كر و ژبال بەرێز”عسمەت تەحسین بەگ”وەكیلێ‌ میری و سەماحەتا بابا شێخ و بەرێز”شێخ شامۆ”پەرلەمانتارێ‌ ئێزدی ل پەرلەمانێ‌ كوردستانێ‌ هاته‌ پێشوازيكرن.

پشتی بخێرهاتنا شاندێ‌ مێڤان،و گەریانەكێ‌ دناڤ هندورێ‌ پەرستگەهێ‌ دا،بەرێز”كەریم سلێمان”ئالیەك ژ پیرۆزیێن ئایینێ‌ ئێزدیا یێن د درێژاهیا سالێ‌ دا ل پەرستگەهێ‌ تێنە كرن شرۆڤەكر،زێدەباری شرۆڤەكرنا فەلسەفا ئایینێ‌ ئێزدیان،و ل دەمێ‌ چاف كەفتنێ‌ لگەل شاندی بەرێز “جوی هود”جێگرێ‌ بالیۆزێ‌ ئەمریكا دیاركر ئەم هاتینە پەرستگەها لالش بۆ پێشكێشكرنا پیرۆزباهیان بۆ گشت ئێزدیان و خواستن پیرۆزباهیێن وان بگەهن تەڤ ئێزدیان و ڤیان هایداری رەوشا ئێزدیان یا داویێ‌ ببن و ب شێوەیەكی بەردەوام تەماشەی رەوشێ‌ دكەین و دووپاتكر كو پشتەڤانیا ئەمریكا بۆ ئێزدیان ل ئاستێ‌ عێراقێ‌ و هەرێما كوردستانێ‌ دێ‌ بەردەوام بت،و هاریكاریێن راستەوخۆ و یێن نە راستەوخۆ ژی ب رێیا رێكخراوێن نەتەوەیێن ئێكگرتی دێ‌ دبەردەوام بن بۆ ئێزدیان زێدەباری پشتەڤانیا مەعنەوی وەك پێكهاتێن دی ل عێراقێ‌ و كوردستانێ‌،تەكەزكر كو “هیڤیخوازین ژ ئێزدیان هەردەم هەست بكن ئەم لگەل وەنە و ئەوا بسەرێ‌ وە هاتی باش دزانین”.

و درووشتنێ‌ دا بەرێز”شێخ شامۆ” پەرلەمانتارێ‌ ئێزدی ل پەرلەمانێ‌ كوردستانێ‌ و سەرۆكێ‌ بنگەهێ‌ لالش ئاخڤی و گۆت:”سەر گەریانا ل پەرستگەهێ‌ و بەحسكرنا ئالیێ‌ ئایینی،یا پێتڤیە بەحسێ‌ ئالیێ‌ سیاسی ژی بێتە كرن،چنكو بێ‌ ئالیێ‌ سیاسی ئارامی نابت”.

پاش شێخی ب كورتی بەحسێ‌ ئەوا بسەرێ‌ ئێزدیان هاتی كر كو زۆربەیا جیهانێ‌ یا ئاگەهدارە لسەر ئەوا ئێزدی تووشبووینێ‌ ژ فەرمان و كارەساتێ‌،هەروەسا كو”پشكا شێری ژ ئێش و ئازاران بەر ب جڤاكێ‌ ئێزدی كەفت پشتی هێرشا داعش بۆ سەر دەڤەرێن ئێزدیان و ب تایبەت ل شنگالێ‌”.

هەروەسا بەرێز”شێخ شامۆ”سوپاسیا شاندێ‌ ئەمریكی كر بۆ پشتەڤانیا سەربازی و مرۆڤی و ئەم پیرۆزباهیێ‌ ل وە دكن و ل هەموو ئاشتیخوازان ل جیهانێ‌ بۆ سەركەفتنێ‌ بسەر هێرشا هۆڤانەیا تیرۆرا داعشێ‌.

دبەردەوامیا ئاخفتنا خۆ دا گۆت:”ل ئاستێن بلند ئەم هەردەم لگەل وە كۆم دبووین ل هەولێرا پایتەخت و بەری سالەكێ‌ بۆ نموونە،و مە هیڤی دخوازت و ژ ئاخفتنا وە تێ‌ دگەهیشتین كو وە خۆ بۆ قۆناغا پشتی داعش بەرهەڤ دكر و بەرنامەكی ئارامیێ‌ بۆ دەڤەرێن رزگاركری هەیە و بەرنامێ‌ بەرقراكرنا تەناهیێ‌ و بەرنامێ‌ قەرەبووكرنێ‌ و هەولێن دووبارە ڤەگەراندنا ئاواران بۆ سەر زێدێ‌ وان،هەروەسا مە دزانی كو وە پلانەك بۆ ئاڤەدانكرنا شنگال و ڤالاكرنا وێ‌ ژ گرۆپێن چەكدار یێن نە فەرمی هەیە،وەك دەست پێكەكەك بۆ دووبارە ڤەگەراندنا خەلكێ‌ شنگالێ‌ بۆ دەڤەرێن خۆ،هەروەسا مە دزانی كو سندۆقەك بۆ قەرەبووكرنێ‌ و دووبارە ئاڤەدانكرنێ‌ هاتیە بەرهەڤكرن و د دەستێ‌ وە دایە”.

پەرلەمانتارێ‌ ئێزدی ل پەرلەمانێ‌ كوردستانێ‌ گۆتژی بەلێ‌ پشتی ژ ناڤبرنا رێكخراوا داعش یا تیرۆرستی مە هەڤسەنگیەكا جێواز دیت،ئەو ژی یەكەیێن هێزێن حەشدا شەعبی هاتنە دناڤ شنگال دا،و بێ‌ كو خەلكێ‌ مە ڤەگەرتە دەڤەرێن خۆ،دراوسێیێن شنگال ژ گوندێن ئەرەبان یێن گەلەك ژ خەلكێ‌ وان دەست دتەڤكوژیا شنگال و كارێن كوشتن و كەنیزە و تالانكرنێ‌ دا هەی،ئەڤ كەسنە ڤەگەریاینە دەڤەرێن خۆ و خەلكێ‌ مە دكەمپێن ئاوارەبوونێ‌ دا مان،زێدەباری كو حكوومەتا بەغدا ڤەكرنا رێیا شنگال بۆ دهۆكێ‌ رەتكر،و شنگال بوو شانۆگەریەكا یاری و پیلانان و بجهئینانا ئەجندایێن نێڤ دەولەتی و هەرێمی،و پشتی چەند هەیڤا بیرەوەریا چارێ‌ یا دەست بسەر داگرتنا شنگالێ‌ دێ‌ بسەر مە دا دەرباز بت و ئەڤە دێ‌ بتە چار سال خەلكێ‌ مە ئاوارە و كۆچبەر و گشت ئازارێن دەردەسەریان.

شێخی خویاكر ژی بەغدا غەدرە ل ئێزدیان كر ب كورسییەكا ئێتیم و ئەم ژ هەژی زێدەتر بووین،سەرباری هندێ‌ دادگەها ئتیحادی بریار لسەر دابوو،بەلێ‌ ئالیێن سیاسی ل بەغدا ژ حكوومەت و جڤاتا نوونەران بریارا دادگەها ئتیحادی بجه نەئینان.

دلایەكی دا شێخی گۆت:”دۆرێن 10%ژ ئێزدیان ل هەرێما كوردستانێ‌ نە،و ئەم پێتڤی پشتەڤانیا هەڤال و دۆستانە بۆ ب دەست ڤەئینانا كورسییەكا كۆتا ل ل پەرلەمانێ‌ كوردستانێ‌،چنكو دەنگێن مە تێرا نا كن بۆ مسۆگەركرنا كورسییەكێ‌ ل پەرلەمانێ‌ هەرێمێ‌،بۆ زانین كو سەرۆك مەسعود بارزانی و پارتی دیموكراتی كوردستان پشتەڤانیا ڤی ئاراستەیی دكن،داكو ب هندەك مافێن خۆ شاد ببین وەك برایێن مەسیحی و توركمان”.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi