حكوومەتا عێراقێ خانی و زەڤیان لسەر ناڤێ كوردێن ئێزدی تاپۆ ناكت
باسنيوز:
ئەندامەكێ جڤاتا قەزا شنگال دیاركركو حكومەتا عێراقی بریار دایە چوو خانی و زەڤی ل سەر ناڤێ ئێزدیان ل شنگال و 11 كۆمەلگەهێن سەر شنگالێ ڤە نەهێنە تاپۆكرن.
عەیدۆ دەرویش، ئەندامێ جڤاتا قەزا شنگال بۆ(باسنیوز) دیار كر: “ئەڤ بریارا حكومەتا عێر اقی زۆر ئاریشەیان بۆ خەلكێ شنگال دروست دكەت چونكو هیچ خێزانەكا ئێزدی نەشێت ژ وەرگرتنا پێشینەیا ئاڤاهیان مفادار بیت وبۆ خوە خانیەكێ ئاڤا بكەت. پێدڤیە حكومەتا عێراقی چاڤ خشاندنێ دبریار خوە دا بكەت و مولك ومالێ وەلاتیان ل سەر ناڤێ وان بهێنە تۆماركرن. ل سالا 1975 حكومەتا عێراقی ئەڤ بریار دایە هەتا ئەڤرۆكە پێگریی پێ دهێتە كرن. ل وێ دەمێ 300 گوندێن دەڤەرا شنگال هاتنە خرابكرن، ل 11 كومەلگەهان هاتنە ئاكنجیكرن. هەموو خانی ژی نەهاتینە تاپۆكرن”.
خویا ژی كر: “بتنێ پسولا كارەبێ ب ناڤێ خەلكێ شنگالێ یە وەكو دیتر هیچ كەسەكێ ل دەڤەرێ سەنەدا خانی نینە و خانی و زەڤیێن خەلكێ نە بناڤێ وانن. ئەم داخازێ دكەین بەغدا ڤێ بریارا خوە هەلوەشینت و خانیێن شنگالیان ب ناڤێ وان بهێنە تۆماركرن”.
تُتاح هذه الصورة أيضا في: کوردی