ئازار 29, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

گۆتیرێس:باشترین چارەسەری بۆ كەیسا ئێزدیان دادگەها لۆكال بێتە ڤەكرن

سكرتێرێ‌ گشتی یێ‌ نەتەوەیێن ئێكگرتی لگەل شاندەكێ‌ ئێزدیان ل هەولێرێ‌ كۆمبوو

تۆرا لالش یا راگەهاندنێ‌
سكرتێرێ‌ گشتی یێ‌ نەتەوەیێن ئێكگرتی”ئەنتۆنیۆ گۆتیرێس”پشتی سەرەدانا بەغدایێ‌ هەولێرێ‌ كری و دگەل هەرئێك ژ”حەیدەر عەبادی”سەرۆك وەزیرێن حكومەتا عێراقێ‌ و”مەسعودبارزانی” سەرۆكێ‌ هەرێما كوردستانێ‌ كۆمبوویی،ل رێككەفتی 31/3/2017ێ‌،ل هەولێرێ‌ لگەل ئێزدییان كۆمبوو.

شاندێ‌ ئێزدی پێكهاتی بوو ژ میرێ‌ ئێزدیان”میر تەحسین بەگ” و سەماحەتا”بابا شێخ”سەرۆكێ‌ جڤاتا رۆحانی یا ئێزدیان و”شێخ شامۆ”ئەندامێ‌ پەرلەمانێ‌ كوردستانێ‌ و سەرۆكێ‌ دەستەیا بلندا بنگەهێ‌ لالش ل دهۆكێ‌ و “حەجی گندور”پەرلەمانتارێ‌ ئێزدی و ئەندامێ‌ پەرلەمانێ‌ عێراقێ‌ وهەردوو مەزنە بەرپرسێن شنگال”خالد دەخیل” و”ئەحمەد ئسماعیل” .

ل دەستپێكا كۆمبوونێ‌ میر”تەحسین بەگ”كورتیەك ل سەر كارەساتا ب سەرێ‌ ئێزدیان هاتی بۆ سكرتێرێ‌ گشتی یێ‌ نەتەوەیێن ئێكگرتی شرۆڤەكر و لگەل پەیڤا خۆ دا راپۆرتەكا نڤیسی یا داخوازیێن ئێزدیا ئەوە كو بەری نۆكە پێشكێشی جەنابێ‌ سەرۆك بارزانی كری دانەیەك پێشكێشی وی كر،ل پێرە”شێخ شامۆ”ب درێژی و بەرفرەهی دەردەسەری و مەخدووری و رەوشا ئێزدیا ب شێوەیەكی گشتی بۆ شاندی شرۆڤەكر،دیسان چەندین داخوازی ئاراستە كرن و ژوانا كەیسا جینۆساید ناساندنێ‌ و دیاركر كو بەغدا ئەگەرێ‌ برێڤەنەبرنا ڤی كەیسی یە كو كلیلا دەرد و داخوازیێن ئێزدیایە و داخوازكر كو پشتەڤانیێ‌ ل وێ‌ بیرۆكێ‌ بكەن بۆ ڤەكرنا دادگەهەكا لۆكال یا ناڤخۆیی كو گرێدانەكا نێڤ دەولەتی وەردگرت و تایبەت بت ب كەیسا كارەساتا ئێزدیان ل شنگالێ‌،هەروەسا لگەل نەمانا داعش بابەتێ‌ چاوانیا ئیدارەكرنا دەڤەرێن مە یێن هەولایستی یێن مایین وچارەنڤیسێ‌ وان و لگەل مە هاریكاربن بۆ ئێكلاكرنا دەڤەرێن مە ب هەر شێوەیەكی بت كو خەلكێ‌ چاوان دڤێتن،داكو ژڤێ‌ رەوشا دالەقاندی قورتالببن.

ل دۆر بابەتێ‌ مانا پەكەكێ‌ ل شنگالێ‌”شێخ شامۆ”بۆ شاندی دیاركر:”ئێك ژ ئەگەرێ‌ نەئارامیا شنگالێ‌ نۆكە هەبوونا پەكەكێ‌ یە پشتی نەمانا داعشێ‌ ل قەزایێ‌ شەر پەیدابوویە و داوی جار خەلكێ‌ وێ‌ دێ‌ بنە قوربانیا هەڤركییان و داخوازێ‌ دكەین پەكەكە باشترە وێدەرێ‌ چوول بكت و ئەو گرۆپ و چەكدارێن بیانی نە و نە خەلكێ‌ دەڤەرا مەنە و دخوازن فشارەكا نێڤ دەولەتی هەبت كو پەكەكە ل دەڤەرێ‌ دا نەمینت ودا ئاگرێ‌ فتنێ‌ لێ‌ هلنەبت پشتی نەمانا داعشێ‌”.

ژ ئالیەكێ‌ دیڤە هەر سێ‌ كەسایەتیێن ئێزدی”حەجی گندور” و “خالد دەخیل” و”ئەحمەد ئسماعیل”،ب شێوێن جودا جودا داخوازی و رەوشا ئێزدیان بۆ شاندێ‌ مێڤان شرۆڤەكرن.

هەروەسا ” گۆتیرێس”دپەیڤێن خۆ دا بۆ شاندێ‌ ئێزیان دیاركر:”دسەرەدانا خۆ یا ڤێ‌ جارێ‌ دا دگەل بەرێزان”حەیدەر عەبادی” و “سەرۆك بارزانی”،ئێك ژ ئالیێ‌ كۆمبوونا وی دگەل وان دا بەحسكرنا بابەتێ‌ ئێزدیان بوویە و چاوانیا سەرراستكرنا رەوش و زڤرینا دەڤەر و رزگاركرنا كچ و ژنێن وان یێن گرتی و قەرەبووكرن و ئاڤەدانكرنا دەڤەرێن وان بوویە،ئەڤ داخوازیێن ئێزدیان ب تایبەت سەرۆك بارزانی بۆ من زەلالكرینە و سۆزێ‌ ددەین یا دشیان دا بت ل دووڤ دەمی دا قۆناغ ب قۆناغێ‌ و ئەم حسابەكێ‌ تایبەت بۆ ئێزدیان و ئەڤا ب سەرێ‌ وان هاتی بكەین،هەروەسا میكانزمەك هەیە لناڤ بەینا عەبادی و سەرۆك بارزانی دا ژبۆ ئیدارەكرنا وان دەڤەرا پشتی نەمما داعشێ‌”.

دەربارەی كەیسا جینۆسایدێ‌ ژی گۆت:”دگەل عەبادی ئەڤ پرسە مە بەحسكریە و پرۆپۆزەلەك بریتانیا پێشكێشی عێراقێ‌ كریە ژبۆ ڤەكرنا دادگەها لۆكال و وی پشتەڤانیا ڤی پرۆپۆزەلی كریە و یێ‌ گەشبینە و چەند راستڤەكرن ل سەر هندەك خالان كرینە و پشتی ئەو خالنە هاتنە راستڤەكرن ئەم ژی پشتەڤانیێ‌ لێ‌ دكەین و باشترین چارەسەری ئەوە ئەڤ دادگەها لۆكال تایبەت ب ڤێ‌ كەیسێ‌ بێتە ڤەكرن و دێ‌ ل سەر كاركەین بۆ ب رێڤەبرنا كەیسێ‌”.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi