مالەكا ئێزدیا:مال و كۆمەلێن ئێزدیا نە دەولەتن و هەر كارەكێ دكارن دكن بۆ خزمەتكرنا جڤاكێ خۆ
تۆرا لالش یا راگەهاندنێ
ئۆسمان گودەن،بەرپرسێ مالا ئەزدای ل كالكار یا گرێدایی باژێری كلڤە سەر ب ناڤچەیا دوسلدورف ڤە ل وەلاتێ ئەلمانیاد دیدارەكێ دا بۆ رۆژناما دەنگێ لالش راگەهاند:”دەمێ پەنابەرێن ئێزدی دئێنە باژێرێ مە وەك مال هاریكاری و ب رێڤەبرنا كاروبارێن وان رادبین،هەروەسا خەلكێ مە ب تایبەت یێ شنگالێ نەكەفتینە ناڤ ڤێ شارستانیەتێ دا و ژێ نە ئاگەهدارن ژوان كو مالێن ئێزدیا ل ڤێدەرێ دەولەتن و وەسان بەرێ خۆ ددەنێ،ب شێوەیەكێ گشتی مال و كۆمەل تشت و كارێ دكارن دكن و یێ ناكن نكارن و ب ئەركێ خۆ رابووینە بۆ خزمەتكرنا جڤاكێ ئێزدیا،ئاماژە دا وێ چەندێ كو مالا ئەزدای وەكی پرەكێ یە دناڤبەرا ڤر و هەرێما كوردستانێ دا”.
ل دۆر ڤەكرنا مالا ئەزدای ل كالكارو خزمەتا پێشكێشی جڤاكێ ئێزدیا دكت”ئۆسمان گودەن”دیاركر:”ل رێككەفتی 26/10/2014ێ مالا ئەزدای یا كولتوری و جڤاكی ب فەرمی هاتە ڤەكرن و بەریا ڤەكرنێ د پرۆسسا ئاڤاكرنێ دا بوو ل وی دەمی مە گەلەك كارێن مەزن و یێن جڤاكی و دبلوماسی ب رایەدار و مرۆڤێن كو ددەولەتا ئەلمان دا دخەبتن پەرلەمانتار و باژێرڤانی و هەتا یێ دەولەتێ ژی ب رێڤە دبەن ب وانرا جڤین و جڤینان ب وانرا چێدكن،ب تایبەت پشتی هاتنا داعش و ڤردە رەوشا ئێزدیا و كوردستانێ ب وان ددەن ناسكرن و وان دئێخنە خزمەتا ئێزدیا و كورد و كوردستانێ دا تشتێ ژ مە تێت وێ دكن،دبوارێ دبلوماسی دا ئەم گەلەك كار و جڤین و هەتا وەكو كۆنفرانسا چێدكن و تایبەت رەوشا كورد و كوردستانێ و ئێزدیێن شنگالێ ئەم هەرتم ددەنە ناسكرن و ژوانرا شرۆڤە دكن،هەروەسا دبوارێ جڤاكی دا هەموو رۆژێن ئێك شەمبوویا زارۆكێن ئێزدیان دئێنە مالێ ئەم زمانێ دەیكێ یێ كوردی و چاند و ئۆل و كولتۆر و وەلاتێ وان نیشا وان دكەین كو ئێزدی كینە و چنە و چما لڤرن و چ دكن ب ڤان رەنگا پەروەردە دكن و مالبات دجڤن و هەڤ ناس دكن و نێزیكی ئێك دبن و تێكلی وان خۆرتر دبن و گاڤا ئەلمان و بەرپرسێ باژێر دخوازن تشتەكی دەرهەقێ ئێزدیا ناس بكن ل گۆر كارینا خۆ وان ئاگەهدار دكن”.
دەربارەی هاریكاریكرنا پەنابەرێن ئێزدی گۆت:”گەلەك ئێزدیێن مە ل ڤێ پاشیێ هاتینە و ب تایبەت یێن شنگالێ و شێخانێ كو زێدەتر یێن شنگالێ بوون گاڤا دئێنە باژێرێ مە ئەم بكارێ وان رادبن هەتا كاغەزێن وان چێدبن و كارێ وان برێڤە دچت،پەنابەرێن ئێزدی یێن نۆكە هەرێكێ مالباتەك و پتر ژی هەینە و ب كارێ رێڤەبرنا كاروبارێن وان رادبن یێن كەس نەبت و مالێن ئێزدیا دەما پێ ئاگەهدار دبن ب پەنابەران ب كارێ وان رادبن وەك رێ ل وان ڤە دكن و نیشێ ددەن و وان دبەنە جهێ كارێ وان یێ رۆژانە یێ جڤاكی تێ ب رێڤەبرن و سۆسیالە و نۆژداران و نەخۆشخانان و نڤیسینگەهان ب ڤی ئاوایی هاریكاریا وان دكەین،گەلەك ئێزدیێن مە هەلبەت یێن شنگالێ كو كچ و خۆرت هەرێك ژ هەڤ دورن ب دۆراتیا 100كیلۆمەتران كو هەڤژینیا خۆ چێكن ل ڤێدەرێ،وەكە مال ئەم شاهدە دئینن و كاغەزێن وان چێدكن و تێ قەبوولكرن ژ ئالیێ دەزگەهێ حكوومەتێ ڤە یێ باژێر ڤە”.
سەبارەت كارێن مالێن ئێزدیا ب شێوەیەكێ گشتی ل ئەلمانیا”گودەن”دبێژت:”ئەم نەدەولەتن،لێ ژ ئالیێ دی ڤە ئەم دبینن جڤاتا مە یا ئێزدیا ب تایبەت یێن ژ شنگال و گوندان دئێن یێن كو نەكەفتینە ناڤ شارستانیەتێ دا گەلەك ژ شارستانیێ نە ئاگەهدارن ژوان كو مالێن ئێزدیا ل ڤێدەرێ دەولەتن و وەسان بەرێ خۆ و چاڤێ خۆ ددەنێ،ژبەر وێ گاڤا دەما ئەو وەك دەولەت بەرێ خۆ بدەنە مالێن ئێزدیا و ئەم ژی بێژین ئەم نە دەولەتن و راستی ژی ئەم نەدەولەتن،دیسان هەر تشت ب ئابووری ڤە گرێدایە وئەگەر ئابوور نەبت نكارین دبلوماسیێ ژی بكەین،گۆتنێن خەلكێ مە بەلكی ژ ئالیێ وان ڤە راست بن و ئەم ژوانرا دبێژن ئەم ب دەولەتێ را كار دكن كو كارێ وان ب رێڤە بچت،ئەز دبێژم ئێزدیێن ل ڤێدەرێ مال و كۆمەل ب ئەركێ خۆ رابووینە بۆ خزمەتكرنا جڤاكێ ئێزدیا و مالێن ئێزدیا تشتێ كارن دكن و یێ ناكن نكارن چ ل ناڤچەیا دوسلدورف یان ل چەند ناڤچەیێن دی ژی ل وەلات”.
هەروەسا ل دۆر ژمارا ئێزدیان ل ناڤچەیا دوسلدورف، بەرپرسێ مالا ئەزدای راگەهاند:”ناڤچەیا دوسلدورف گەلەك مەزنە بەلكی 300هەزار ئێزدی هەبن و ل باژێرێ كلێڤە و دەردۆران یێ باژێرێ مەزن یێ ئەم پێڤە گرێدایی نێزیكی شەش بۆ هەفت هەزار ئێزدی هەنە و ل باژێرێ كالكار نێزیكی 314ئێزدی تێدانە”.
ل داویێ و دەربارەی هەماهەنگیا مالێ دگەل سازیێن ئێزدیا ل هەرێما كوردستانێ ناڤهاتی ئاشكەراكر:”مالا ئەزدای وەكی پرەكێ یە دناڤبەرا ڤر و كوردستانێ دا و ب لالشا نوورانی ڤە و جڤاتا رۆحانی و دەستەیا بلندا بنگەهێ لالش گرێدایی وان ڤە و كوردستانێ خۆ دبینن و ڤان هەر سێ دەزگەها ژخۆرا پیرۆز دبینن”.
تُتاح هذه الصورة أيضا في: کوردی