سیتاڤا سیاسەتا زەبر و زۆری
ئیدریس زۆزانی
بەرژەوەندیا گشتی یا مللەتێن پێشكەفت و ئارامییا گەلێن ساخلەم و خودان شیان،ب سیاسەتا نەرم و پەیوەندیێن بهێز و كریارێن سیاسەتمەدارێن سەركەفتی و كەسایەتیێن ژیر و زانا و خودان سەربۆر دئێتە گێڕان و وەلاتێن شارستانی پێ دئێنە ئاڤەدانكرن.
وەكو یە دیار ل سەرانسەری جیهانێ و دناڤ هەر كۆمەلگەهەكا ئازاد و سەربەخۆ دا پلانەكا سیاسی یا سەركەفتی ژبۆ ب ڕێڤەبرنا كاری د هەموو بوارێن ژیانێ دا ب شارەزایی دئێتە دانان و ل سەر بنەمایێن زانستی و سەردەمانە دكەفتە كار و ب سەركەفتیانە دئێنە ئەنجامدان،ئەڤ چەندە ژی ڤەدگەرتە وێ چەندێ كو د هەر وەلاتەكی پێشكەفتی دا سیاسەتەكا سەركەفتی دئێتە شۆپاندن و نەخشەیێن ڕاست و دروست ژ هەموو ئالیێن ژیارا جڤاكی ڤە دئێنە دانان و ب ڕەنگەكی ئەكادیمی سەرەدەری دگەل كەتوارێ وی جڤاكی دئێتە كرن ئەوژی ژ پێخەمەت سەرفەرازیا وەلات و گەلێ وان،لێ ب مخابنی ڤە ل وەلاتێ مە و پشتی چەندین سالێن دوور و دڕێژ ژ حوكمرانیەكا سەربەخۆ د كوردستانەكا ئازاد و بەختەوەر دا كەسانێن خۆ ب سیاسەتمەدار و خودان ڕێكخستی و جەماوەر دزانن و پشكدارن د حوكمرانیا وەلاتی دا ئیرۆ ب ئاشكرایی بووینە خۆفرۆش و داربەدەستێن دوژمنێ مللەتێ كورد و جەهۆەرێ خیانەتێ دناڤ ملێن خۆ ڤەكرینە و زێدەباری كو ئاخا كوردستانێ رادەستی نەیاران كرینە و ڕەوشا ئێمناهییا وەلاتی تێكداینە و بازرگانی ب بەرژەوەندیێن گشتی یێن مللەتێ كورد كرینە و گەلێ كوردستانێ تووشی كێشە و ئاریشێن مەزن كرینە پێخەمەت بەرژەوەندیێن خۆ یێن حزبی و یێن تایبەت.
دیارە كو كارتێكرنا سیاسەتا ڕژێمێن وەلاتێن دوژمن یێن هاویردۆرێ كوردستانێ ئێك ژ ئەگەرێن سەرەكی بوویە ل سەر ئیرادا ئەوان لایەنێن ناڤخۆیی یێن ل دژی ئێكگرتن و ئێكرێزیا ناڤمالا كوردی رادوەستن و ژبەر ڤێ چەندێ ئەوان ب هەر ڕێیەكا هەیی هەولێن تێكدانا ڕەوشا كوردستانێ داینە و بزاڤ ژبۆ نەهێلانا دەستكەفتێن مللەتی یێن مێژوویی كرینە و یاریەكا چەوت و بێ مفا د گۆرەپانا سیاسەتا ناڤخۆیی یا كوردستانێ دا كرینە و سەروەریا راست و دروست یا وەلاتپارێزیێ و پارێزەرێن وەلاتی كرینە ئارمانجا پیلانێن خۆ.
لێ گۆمان تێدا نینە كو سیاسەتا حەكیمانە یا سەركردایەتیا پارتی و ژیرمەندییا سەرۆكاتییا وێ و ئیرادا گەلێ كوردستانێ ژ پێخەمەت ئاڤەدانییا وەلاتی و گەهشتنا ئارمانجێن سەرەكی یێن خەلكێ كوردستانێ ژ هەموو پیلانێن دوژمن و خۆفرۆشان بهێزترە و د رژدن ل سەر هاڤێتنا پێنگاڤێت بلەز ژبۆ بدەستڤەئینانا دەستكەفتێن مەزنتر و گەهشتنا قۆناغا داویێ یا سەركەفتنێ و دامەزراندنا دەولەتەكا ئارام و سەربەخۆ ل ژێر ئالایێ پیرۆزێ كوردستانێ،كو ئیرۆ ب سایا خوونا شەهیدێن گەلێ مە و رەنج و خەباتا پێشمەرگەهان ل سەر هەموو دامودەزگەهێن فەرمی یێن كوردستانێ بەرز و بلند دیار و خۆیایە.
نۆكە ژی دەم هاتییە ڕێ بدەنە پارتی كوردستانێ ئاڤەدان بكەت و باشترە سیاسەتێ ژبۆ سیاسەتمەدارا بهێلن،ژبەركو گەلێ كورد هێژایی ژیانەكا ئارام و وەلاتەكێ ئازادە و زامنێ ئەڤێ چەندێ ژی بتنێ پارتی و سیاسەتا مالا بارزان و خەمخۆرێن مللەتێ كورد و ئاخا پیرۆزا كوردستانێ نە.
