ئایار 28, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

عزەت یوسف:چەوا دوو خووشك و برایێن سووری یێن ئاسێ‌ ل بن هەڕفتیەكی ڕزگاربوون

(من ژ ڤێرێ‌ دەربێخن):
چەوا دوو خووشك و برایێن سووری یێن ئاسێ‌ ل بن هەڕفتیەكی ڕزگاربوون
وەرگێران ژ ئنگلیزی: عزەت یوسف
(جەنان) یا پێنج ساڵی نۆكە 14/2/2023ێ‌ ژبەر گرانیا برینا لنگێ‌ وێ‌، ل نەخۆشخانێ‌ یە، برایێ‌ وێ‌ بەس لەشێ‌ وی یێ‌ سەلخی، ئەڤە د دەمەكیدایە كو هەموو ئەندامێن دی یێن ماڵباتێ‌ یێن مرین.
(عومەر رەحال)ی دەنگەك ژ ناڤ هەڕفتەی بهیست، هندی پێتی بوو وەسا تێگەهشت كو دبت بەس د سەرێ‌ وی دا ئەو دەنگ ڤەدابت، شەڤا بەرێ‌ دوو ئەردهەژێن ب هێزا 7.6-7.8 چێبوون ل گوندێ‌ وان (حەریم) كو ل پارێزگەها ئەدلبا سووریایێ‌ یە و ل بن دەستێ‌ شەركەرێن بەرهنگارییان دابوو، ب دەهان ئاڤاهی هەڕفین ژ وانژی ئەو ئاڤاهیێ‌ شقەیا پسمامێ‌ وی (موحەمەد) ل گەل هەڤژینا خۆ و هەفت زارۆكێن خۆ تێدا دژیان،پشتی چەند دەمژمێرەكێن كێم، رەحال بەرپرسێ‌ پۆلیسێن دەڤەرێ‌، بلەز دچتە دناڤ هەڕفتیی دا ب هیڤیا وێ‌ چەندێ‌ محەمەد و ماڵباتا وی ب ساخی ببینت،ب دڕێژاهیا دانێ‌ سبێ‌ هیچ نیشانێن ساخیێ‌ نەبهیستن، لێ‌ ل دەمژمێر 12:30ی نیڤرۆ گوهێن وی پێنج پەیڤ ڤەچنین كو وەك دەنگێ‌ كچەكا بچوك دهات: من ژ ڤێرە دەربێخن.
چەند مترەكا لبن كۆمەكا هەڕفتەیی كۆنكریتی دا، كچا (مەحمود)ی یا پێنج ساڵی (جەنان)، پێكڤە ل گەل برایێ‌ خۆ یێ‌ نەه مەهی (عەبدوللا) كەتبوون، كو دبن هەڕفتەیدا دلنەرمیا وی دكر، وێڤەتر ل بەر كێلەكا وان تەڕمێ‌ دایكا وان (سعاد) بوو، بتنێ‌ ڕەحالێ‌ دكاری دەستێ‌ وێ‌ ببینت، وەسا دیار بوو ب وی دەستی هەوڵدایە زارۆكێ‌ خۆ هەمبێز بكەت داكو وان بپارێزت.
ڕەحالی هەوڵدا وان بینتەدەر لێ‌ تێگەهشت كو د شیانا وێ‌ دا نینە ب تنێ‌ ئەڤی كاری بكەت، لەوران دیمەنێ‌ هەردوو زارۆیێن ئاسێ‌ مایین ڤیدیۆ كرن و بۆ هەڤاڵێن خۆ یێن پۆلیس رەوانە كرن، داخواز ژێ‌ كرن د هەوارا وان وەرن، هەر زوو ڤیدیۆ ژ موبایلەكێ‌ بۆ موبایلەكا دی هاتە ڤەگوهاستن و تا گەهشتیە وی ئاستی ژ سنوورێ‌ سوریا دەركەفت و ل جیهانێ‌ بەلاڤبوو و بوو سۆمبولا تراژیدیێ‌ ل ئەدلبێ‌.
ڕەحالێ‌ بۆ گاردیان گۆت: ئێكسەر زەلامێن من گەهشتن و هاریكاریا من بۆ دەرێخستنا عەبدوللایێ‌ بچوك كرن، خۆشبەختانە ب تنێ‌ چەند خیچێن سڕكاندنێن بچوك هەبوون، لێ‌ كێشە جەنان بوو، ئەو یا دبن گۆنتلەكێ‌ كۆنكریتی ڤەبوو و قەدەكا ئاسنی د لنگێ‌ وێ‌ ڕا چەقی بوو.
كارێن ڕزگاركرنێ‌ ل ئەدلبێ‌ د خاڤ بوون، تارادەیەكی مەزن ژ جیهانا ژ دەرڤە بۆ ماوەیێ‌ دوو ڕۆژان پشتی ئەردهەژێ‌ گرتی مابوو، ژبەر كێماتیا ئالاڤ و هاریكاریان خەلك ناچار بوو ب دەستێن خۆ خۆشتڤیێن خۆ دەربێخن.
ڕەحالێ‌ گۆت: ژ بۆ ڕاكرنا گۆنتلێن كۆنكریتی كو ئاستەنگ بوون، مە چەك بكارئینان، ئەوێن مە بۆ بلندكرنا ترومبێلان بكاردئینان دەمێ‌ مرۆڤ پێتڤی گوهاڕتنا تایرا دبوو،لێ‌ جەنانێ‌ هێشتا ئەو قەدا ئاسنی د پیاڕا یا چەقاندی بوو، ڤیابوو بێتە بڕین.
ڕزگاركەران هەولدان ب كەتەرەكێ‌ ستوور یێ‌ پیلایی ئەوی ئاسنی ببڕن، ل دەمەكی جەنان ژبەر ئێشانی دگری، ل وی دەمی جارەكا دی پیڤەلەرزێ‌ گوند هەژاند، كاودان پتر ئالۆز بوو و ئەو ئاڤاهیێن پچەكێ‌ ماینە راوەستیایی ژی دەست ب هەڕفینێ‌ كرن، و جەنانێ‌ دگۆت تكایە! من ژ ڤێدەرێ‌ دەربێخن.
دەم ژ بۆ دەستدانێ‌ نەبوو، ڕەحالێ‌ گۆت، مە چ بژاردە نەبوون مە ژی مەترسیا مرنێ‌ و ژ دەستدانا زارۆكی گرتەبەر لەوران مە بڕیاردا ئەوی كاری بكەین یێ‌ مە قەت نەدڤیا بكەین لەوران هەول بۆ ڕزگاركرنا جەنانێ‌ د بەردەوام بوون هەرچەندە یا ب زەحمەت بوو چنكو هێشتا لنگێ‌ وێ‌ یێ‌ ب قەدا ئاسنیڤە یێ‌ چەقیای بوو.
ڕۆژا سێ‌ شەمبوویێ‌ نێزیكی دەمژمێر دووێ‌ سپێدێ‌ بوو، پشتی مانا 22 دەمژمێران ل بن هەڕفتەیی دا، جەنان ب گری و قێری هاتە دەرێخستن.
پشتی هەفتیەكێ‌ ژ ڕزگاركرنێ‌، ڕۆژناما گاردیان سەرەدانا جەنانێ‌ و برایێ‌ وێ‌ یێ‌ بچووك ل سەر تەختێ‌ نەخۆشخانەكێ‌ كر، عەبدوللا د بن بەتانیەكێ‌ دا یێ‌ نڤستی بوو و جەنان ژی ل سەر جیەكی یا ڕازایی بوو و هێشتا ژبەر ئێشانێ‌ دنالی.
نۆژدارێ‌ جەنانێ‌ (وەجیە ئەلقرات) گۆت: برینا لنگێ‌ وێ‌ هێشتا یا گرانە، جارێ‌ نۆكە جەنانێ‌ وەكی بەرێ‌ شیانێن ڕێڤەچۆنێ‌ نینە و ل وە ناڤەشێرم ئەگەر برینا وێ‌ باشتر لێنەئێت، ڕەنگە ناچار بین لنگێ‌ وێ‌ ببڕین.
پشتی بەلاڤەبوونا ڤیدیۆیێ‌، هندەك ژ میدیایان ب شاشی ڕاگەهاندن كو هێشتا بابێ‌ جەنانێ‌ یێ‌ ساخە، لێ‌ مخابن نەوەسابوو، ڕەحالێ‌ ب گری ڤە گۆت، ب تنێ‌ جەنان و عەبدوللا تاكە كەسن د مالباتا واندا ماینە ساخ، هەردوو زارۆك ب مامێ‌ وان یێ‌ مەزن و هەڤژینا وی هاتینە ڕاسپاردن.
جەنان و برایێ‌ وێ‌ دناڤ هژمارەكا نەدیار یا زارۆكێن ژبەر ئەردهەژێ‌ ل ئەدلبێ‌ ئێتیم و سێوی ماینە، كاربەدەستێن یوئێنێ‌ داخوازا پتر هاریكاریان بۆ باكوورێ‌ ڕۆژئاڤایێ‌ وەلاتی دكەن كو ل بن دەستێ‌ یاخیبووییان دایە.
(قرات)ی ب دەنگەكێ‌ نزم گۆت: ئەڤە تراژیدیایە، جەنان دزانت كو ل گەل برایێ‌ خۆ بتنێ‌ ساخ ماینە، لێ‌ ئەڤ زارۆكێن ل ڤێدەرێ‌ دبینی، ئەوێن تەنشت جیێن جەنانێ‌، ئەو ژی هەموو ئێتیم ماینە، پڕانیا وان هێشتا پرسیار دكەن كا دایبابێن وان ل كێدەرێ‌ نە و كەنگی دێ‌ وان ببینن، بەراهیێ‌ مە دڤێت ب باشی چارەسەریا وان بكەین، پاشی د ڕەوشەكێدا ناچارین بێژینێ‌ هوون ژی ئێتیم ماینە.
ژێدەر:
Get me out of here
The guardian. 2023/feb/14/

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi