سەگڤان شنگالی:كارتێكرنا دەنگوباسێن نە راست ل سەر ئاشتی یا جڤاكی

كارتێكرنا دەنگوباسێن نە راست ل سەر ئاشتی یا جڤاكی
سەگڤان شنگالی
دەنگ و باسێن نە راست ژ ناڤێ‌ وێ‌ خویایە كو دەنگ و باس نە راستە و ل سەر هندەك بنەمایێن نە راست دئێنە دروستكرن، وەك ئەم دزانن ئەو ژی بەردەوام دئێنە دروستكرن و بەلاڤكرن ب ڕێیا هندەك میكانزمێن دیاركری ژ وان ژی رۆژنامەگەریا بێ‌ سنوور و ئازاد و سۆشیال میدیا،نەخاسمە بێی چاڤدێریا دام و دەزگەهێن دیاركری دڤی بواری دا،ئانكو ب رامانەكا دی نەبوونا چاڤدێریێ‌ ل سەر ئەڤان میكانیزمێن دیاركری،تایبەت ژلایێ‌ دەستهەلاتێ‌ ڤە دێ‌ گەلەك ئاریشە و دووبەرەكیان و هەڤركیان و هەتا نەهشتنا پەیوەندیان ژی پەیدا كەت دناڤبەرا ئەندام و پێكهاتەیێن جڤاكی یێن دیاركری دا وەك ئایینی،نەتەوی،سیاسی…هتد.
ب دروستكرن و بەلاڤكرنا ڤان جۆرە دەنگ و باسێن نە راست و هەڤدژی پێكهاتەیێن جڤاكی دێ‌ بتە ئەگەر پەیوەندی دناڤبەرا وان پێكهاتەیێن دیاركری دا نەمینن و ئەڤ چەندە ژی هێدی هێدی ببتە ئەگەر كو ئاشتی یا جڤاكی لاواز ببت، هەتا بگەهتە وی رادەی باوەری دناڤبەرا واندا نەمینت و وەسان ژی د ئەنجام دا جڤاك ژبەر ئێك بچت،بڤی شێوەی:نەمانا ئاشتی یا جڤاكی دناڤبەرا تاكەكەسان دا،دگەل بەلاڤبوونا هندەك دەنگ و باسێن نە راست یێن دیاركری ب مەرەم و ژلایێ‌ هندەك كەسێن تێكدەر ڤە د بەرژەوەندیا لایەنەكی دا و ل دژی هندەك تاكەكەسێن دیاركری دێ‌ بتە ئەگەر چەندین گۆمان و پرسیار و نە ئارامی و باوەری ل نك پەیدا ببن،ئەڤ ژلایەكی ڤە و ژلایەكی دی ڤە بابەتەك بێتە ئازراندن ژلایێ‌ لایەنەكی نەدیار ڤە و هندەك دەنگ و باسێن نە راست و بێ‌ بنەما بێنە دروستكرن ب وێ‌ مەرەمێ‌ ئاشتی یا ناڤبەرا پێكهاتێن جڤاكی دا بێتە تێكدان و پێكهاتەیێن ناڤبری د ناڤخۆیا خۆدا هەست ب نە ئارامیێ‌ و ترسێ‌ بكەن بەرامبەر پێكهاتەیێن دی و بڤێ‌ چەندێ‌ پەیوەندیێن جڤاكی نەمینن و بێنە هەلوەشاندن و ئەنجام ژی ئاشتی یا نەرێنی پەیداببت ئاشتی یا نەرێنی ئانكو نەبوونا توندوتیژیێ‌ و شەران بەلێ‌ پەیوەندی دناڤبەرا واندە نین، یان ئەگەر ئەم باس بكەن ل سەر ئاستێ‌ جڤاكی و دەستهەلاتێ‌ دا،ئەگەر هات و ئێك ژ دەزگەهێن دەستهەلاتێ‌ هندەك زانیاری و داتایێن نە راست بەلاڤكرن ل سەر بابەتەكێ‌ دیاركری ئەڤ چەندە دبتە ئەگەر لاوازی دروست ببت د پەیوەندی و ئاشتی یا ناڤبەرا خەلكێ‌ و دەستهەلاتێ‌ دا.
ب دیتنا من د ڤێ‌ چەندێ‌ دا چارەسەری ئەوە كو دەزگەهێن دەستهەلاتێ‌ یێن پەیوەندیدار ب كارێ‌ خۆ یێ‌ چاڤدێریێ‌ رابن و نەهێلن ئەڤ دەنگ و باسە زوو ب زوو بەلاڤ ببن و ئەگەر بەلاڤ ژی بوون هەر زوو راستیا بابەتان بێتە ئاشكەراكرن،بەری كو ئەڤ چەندە دووبەرەكی و هەڤركیێ‌ دروست بكەت.