خەلكێ شنگال دێ قەرەبوویێ وەرگرن!!
سەگڤان شنگالی
ڕژێمێن یەك ل دووڤ یەك یێن عێراقێ ل گۆر سیاسەت و هزرا خۆ یا نەژادپەرستی سیاسەتەكا نەرەوا ل دژی گەلێ كورد بكاردئانین نەخاسمە ل دژی خەلكێ دەڤەرا شنگالێ،كو هەر ژ دامەزراندنا دەولەتا عێراقێ حكومەتێن یەك ل پەی یەكێ یێن عێراقێ هەول داینە ئەڤ دەڤەرە ئاڤەدانیێ و ئارامیێ ب خۆڤە نەبینت و بەردەوام خەلكێ دەڤەرێ ژی د بوونە قوربانی ب تایبەت دگەل هاتنا ڕژێما گۆڕ ب گۆڕ یا وی دەمی و گرتنە دەست یا حكومەتێ.
ڕژێما گۆڕ ب گۆڕ ژ جاران بتر و ل گۆڕ سیاسەتەكا رێكخستی یا عەرەبكرن و ڤەگوهاستنێ ل ساڵا 1975 ب بەرفرەهی خەلكێ دەڤەرا شنگال ژ سەر گوند و مالێن وان راكرن و گوند و مالێن وان خرابكرن و بەشەك ژ وی خەلكی نەچار بوون دەست ژ دەڤەرێن خۆ بەردەن و بەرێ خۆ دانە پارێزگەها دهۆكێ و بەشەكێ دی ژی ب زۆری ل 11 كۆمەلگەهێن ب زۆری دا هاتنە ئاكنجی كرن،بێی خزمەتگۆزاریێن سەرەكی یێن ژیانێ و ساخلەمیێ و بەدیلێن یاسایی و قەرەبووكرنێ،هەتا نۆكە بێی تاپۆكرنا وان خانییان ب سەر خەلكی دە ئانكو خەلكێ هاتیە ڤەگوهاستن بۆ وان كۆمەلگەهان ب گەلەك شێوەیان بووینە قوربانی، پشتی نەمانا ڕژێما گۆڕ ب گۆڕ ل ساڵا 2003 و دانانا حكومەتا دیموكراسی ل عێراقێ خەلكێ دەڤەرا شنگال هیڤیەكا مەزن هەبوو كو خانیێن وان بێنە تاپۆكرن و قەرەبووكرن و ب وان بێنە دان، بەلێ چ گاڤێن ڕژدی و ب هێز نەهاتنە هاڤێتن ژلایێ حكومەتا وە دەمی یا عێراقێ ڤە،هەر ژ وی دەمی و هەتا نۆكە بتریا خەلكێ دەڤەرا شنگال ب دەست ڤێ بۆشایا یاسایی دنالن و گەلەك جاران ژی بووینە قوربانییا ڤێ چەندێ ب تایبەتی پشتی ساڵا 2014 و كۆمكوژیا مەزن یا ب سەرێ مە ئێزدیان ل دەڤەرا شنگال دا هاتی و ئەو خەلكێن داخوازا قەرەبووكرنێ دكرن ژ حكومەتێ راستی ئاریشا نەتاپۆكرنا خانیان دهاتن، بێگۆمان ئەڤ چەندە ژی دبوو بارەكێ مەزن ل سەر ملێن خەلكی.
هەتا داوی جار و ل رۆژا 27/12/2022 ب خەونێن دەهان ساڵان و ب هەول و گڤاشتنێن بەردەوام یێن حكومەتا نوو یا عێراقێ ب سەرۆكاتییا (محەمەد شیاع سودانی) بریارا تاپۆكرنا خانیێن نەتاپۆكری یێن دەڤەرا شنگال هاتە دان، بێگۆمان ئەڤ چەندە بوو جیێ دلخۆشیا خەلكێ دەڤەرێ و زەرەرمەندێن ڤێ چەندێ كو ژ نۆكە و پاش وان دێ بەلگەیێن یاسایی هەبن بۆ داخوازكرنا قەرەبووكرنێ ژ حكومەتێ و كارێن دی یێن پێتڤی.
بێگۆمان ئەگەر ئەڤ بریارە هاتە جێبەجێكرن و هەموو خەلك دێ ب مافێ ئاكنجیبوونێ شاد بن و دێ گەلەك مفایێ خۆ بۆ خەلكێ دەڤەرێ هەبت، ژ وان مفایان ژی:
_ خەلك داخوازا قەرەبووكرنێ ژ حكومەتێ بكەت ژ ئەنجامێن سیاسەتێن نەرەوا ل دژی وان.
_ خەلكێ دەڤەرێ دكارن قەرێن ئاڤەدانكرنێ و ئاكنجیبوونێ ژ حكومەتێ وەربگرن.
_ خەلك هەست ب وێ چەندێ بكەت كو مافێن سەرەتایی ل عێراقێ هەینە.
– هەروەسا رەنگە ئەڤ بریارە ببتە دەرگەهـەك خەلك ڤەگەرنە سەر جی و وارێن خۆ و سەر ژ نووی ڤە دەست ب ئاڤەدانكرنا مال و خانیێن خۆ بكەن.
تُتاح هذه الصورة أيضا في: کوردی