شوبات 03, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

لەیت حسێن:سترانا فلكلۆری و ئاوازا تەمبوورا شنگالێ‌ و ژەنینا وێ‌

سترانا فلكلۆری و ئاوازا تەمبوورا شنگالێ‌ و ژەنینا وێ‌
لەیت حسێن
شنگال وەك ناسنامە
دەڤەرا شنگالێ‌ قەزایەكە و ژئالیێ‌ ئیداری ڤە دكەفتە سەر ب پارێزگەها نەینەوا ل باكوورێ‌ عێراقێ‌ و ب هژمارەكا زۆرا تشتان ناڤدار و دیارە نەبتنێ‌ ل ناڤخۆ بەلكو ل ناڤچەیێت هەرێمێ‌ ب ئاوایەكی گشتی و د چەند بوارێت جودا جودا دا بەحس لێ‌ دئێتە كرن.
ژ ئالیێ‌ جڤاكی ڤە:موزیك و ژەنینا تەمبوورێ‌ و گۆتنا سترانا فلكلۆری ل دەڤەرێ‌ ژ وان تشتێن هەرە دیار و ناسیارە ل دەڤەرا شنگالێ‌ و هەر ژ سەردەمێت كەڤن و دێرین دا ئەڤ دەڤەرە یا ناڤدارە ب جوانی و خۆشیا ئاوازان و تایبەت ژی ژەنینا تەمبوورێ‌ و هەروەسا ژی سترانا فلكلۆری یا رەسەن یا شنگالێ‌،كو سەرەنجا هەموو خەلكەكێ‌ گۆهداریا وان بكە بەرەف خۆ راكێشایە،هەروەسا ژئالیێ‌ ئۆلی ڤە ژی ل با مللەتێ‌ ئێزدی هەبوونا تەمبوورێ‌ و ژەنینا وێ‌ یان ب ئاوایەكێ‌ گشتی مۆزیك ژ تشتێن هەرە كەڤن و پیرۆزە و ب تایبەت ژی ل چیایێ‌ شنگالێ‌ هەردەم بەحس ل هەبوون و ماینا تەمبوورێ‌ ل شنگالێ‌ هاتیە كرن كو ل مالان بخۆ دا ژی تەمبوور هەبووینە و گرنگیەكا زۆر پێ‌ ددەن،دیسان ژی ل گەلەك قەول و گۆتنێت كەڤنێت ئێزدیان دا بەحس ل پیرۆزی و هەبوونا تەمبوورێ‌ و مۆزیكێ‌ هاتیەكرن ژبەركو جانێ‌ مرۆڤی ب مۆزیكێ‌ و ژەنینا وێ‌ و گۆهداریكرنا سترانێ‌ ئارام و تەنا دبە،هەروەسا تەمبوورا شنگالێ‌ ژئالیێ‌ دروستكرن و ژەنینێ‌ ژی ڤە گەلەكا جیاوازە و تایبەتمەندیا خۆ دناڤ جۆرێت دی یێن تەمبوورێ‌ هەیە و ل گۆرەی وان كەسێت دژەنن خۆشی و لەڤزەتەكا جودا و زێدە دژەنینا تەمبوورا شنگالێ‌ دا هەیە كو جودایە ژ ژەنینا تەمبوورێن دی و مرۆڤی هەستەكی خۆشتر ب ژەنینا تەمبوورا شنگالێ‌ رە هەیە كو هەم ئاواز و هەم خۆشی و گۆهداریا جودایە و جیاوازی ل با گۆهداری دروست دكە كو ئەڤ یەكە زۆر تشتەكی گرنگە،هەروەسا لگۆرەی هنەك ژێدەرێن فەرمی بەحس دكن تەمبوورا شنگالێ‌ ژ چەند جۆرێن دارا پێك دئێن و هژمارەكا وان ب باشی ل چیایی هەنە وەكو دارا گوزێ‌ و دارا بەرویێ‌ و چەندەكێن دی كو ئەڤێن هاتینە دیاركرن ژ باشترین جۆرێن وانن و ڤان تەمبوورا ژئالیێ‌ دیزاینی ڤە ژی جیاوازیا خۆ هەیە ب یێن دیتر رە و ژئالیێ‌ كەسێت خودان سەربۆرڤە دئێنە دروستكرن.
دیسان ژی ب ئاوایەكێ‌ گشتی ل سنوورێ‌ قەزا شنگالێ‌ گرنگیەكا هەرە زۆر ب گۆتنا سترانا فلكلۆری دئێتە دان و ب ژەنینا تەمبوورێ‌ رە گەلەك گەنج و پیرەمێر ژی دبێژن و سترانبێژێت زۆر ل سەر ئاستێ‌ شنگالێ‌ و كوردستانێ‌ ب گشتی ل ڤێ‌ دەڤەرێ‌ پەیدا بووینە و ناڤ و دەنگێ‌ خۆ بەلاڤ كرینە و دنۆكەدا ژی بزاڤێت پاراستنا ڤێ‌ یەكێ‌ ژبا تەخا گەنجان ڤە بەردەوامە ب گۆتنا سترانا فلكلۆری ل سەر میكانیزما باب و كاڵان،ئەڤە و سەرەڕای ئاوارەبوونا خەلكێ‌ شنگالێ‌ و ب تایبەت ئێزدیان كو نێزیكی هەشت ساڵایە دبن چادران دا دژین بەلێ‌ هەر ب ئاوایەكێ‌ گشتی پاراستنا فلكلۆر و كەلەپۆرێ‌ خۆ یێ‌ یێ‌ كەڤن كرینە و ب ناسناما خۆ دزانن ژبەركو ب ئاگەهن ژ وێ‌ چەندێ‌ كو هەموو گەل و مللەتەك ب كەلەپۆر و فلكلۆرێ‌ خۆ یێ‌ ناڤدار و دەوڵەمەندە، دیسان ژی ب ئاوایەكێ‌ گشتی و هەر وەكو ساڵێن چۆی ل دەڤەرا شنگالێ‌ و دناڤ كەمپێن ئاواران دا ژی تەمبوور و ئالەتێن دی یێن ژەنینا مۆزیكێ‌ زۆر دئێنە دیتن و ئەڤ چەندە ژی جیێ‌ خۆشحالیا خەلكی یە، هەروەسا ژی كێم ماڵ هەینە كو دناڤ دا كەسەك یان زێدەتر نزانت تەمبوورێ‌ بژەنت.
ژ ئالیێ‌ ئۆلی ڤە:ژبلی كو ئالەتێن ژەنینا مۆزیكێ‌ و تایبەت تەمبوور و دەف و شباب كو زۆر كەس دبێژنێ‌ شاز و قدوم و چەند ناسناڤێت دی ژی لێ‌ هەینە ل پەرستگەهـ و جهێت ئۆلی یێت ئێزدیا د پیرۆزن،ل دەمێ‌ گێرانا ڕێوڕەسمێن ئۆلی دئێنە دیتن و چەند ئاوایێن ژەنینێ‌ ژی هەینە كو كەسێن ئۆلی یێن ب تایبەت ب ڤی كاری ڤە هەینە و گرنگی و پیرۆزیا خۆ یا تایبەت ژی ل ناڤ ئێزدیان دا هەیە.
هەلبەت هەول و بزاڤێن ژناڤبرن یان نەمانا كەلەپۆرێ‌ شنگالێ‌ تایبەت یێ‌ ئێزدیان ل درێژاهییا مێژوویێ‌ دا ب ئاوایەكێ‌ هەمیشەیی هاتینەكرن ژئالیێ‌ دوژمنان ڤە بۆ نەهێلان و ژناڤبرنا مێژوو و ناسناما مللەتان كو وەكو هەرا داویێ‌ ژی هێرشا تیرۆرستێت داعش بوو بۆ سەر شنگال و دەوروبەرێت وێ‌ كو هەول دان كەلتۆر و فلكلۆر و كەلەپۆرێ‌ وان و دەڤەرێت وان نەهێلن، بەلێ‌ ب خۆشحالی هەر هاتیە پاراستن بەلێ‌ دڤێت زێدەتر ژئالیێ‌ راگەهاندنێ‌ ڤە گرنگی پێ‌ بێتەدان و رووماڵا وان بكن و بێتە پاراستن ژئالیێ‌ خۆدا ژ پێخەمەت مانا ڤان مللەتان ب هێز و ئیرادەڤە.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi