شوبات 03, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

سەگڤان شنگالی:كەلتۆرێ‌ پێكڤەژیانێ‌ یان یاسایێن پێكڤەژیانێ‌

كەلتۆرێ‌ پێكڤەژیانێ‌ یان یاسایێن پێكڤەژیانێ‌
سەگڤان شنگالی
پێكڤەژیان ئانكو ژیان ل سەر حەز ژێكرن و هەڤدوو قەبوولكرنێ‌ هاتیە چاندن، هەروەسا ل سەر رەزامەندی و قەبوولكرنا هەبوونا یێن دیتر دگەل هەڤ دژین و مل ب ملێ‌ ئێك بێی هەولێن ژناڤبرنا یێن دی بێتە دانان یان زۆریێ‌ بگەهینن ئێك، ڤێجا ئەو كەس و گرۆپێن د وێ‌ كۆمەلگەهێ‌ دا دژین چ ئاین و نەتەوە و نەژادان بن و بارێ‌ ژیانا وان یا ئابووری و جڤاكی د چ ئاست دابت و هەتاكو ژی ژێك د جودابن.
سەبارەت دەستەواژە و زاراڤێ‌ پێكڤەژیانێ‌ ل دەمێ‌ داویێ‌ دە گەلەك دناڤ جڤاكێن مرۆڤاتیێ‌ دا دئێتە بكارئینان، ب تایبەت د وان جڤاكێن كو رێژەیەكا مەزن یا جوداهێن جڤاكی و جودا تێدا هەین، د نۆكەدا گەلەك جڤاك هەینە ب ئاشتی و پێكڤەژیانێ‌ دگەل ئێك دژین و بەروڤاژی هندەك جڤاك هەینە پێكڤەژیانا وان د ئاستێ‌ نزم و لاواز دانە ئەڤەژی بۆ هەردوو ئاستان،باگراوەندێ‌ یاسایی و ئاستێ‌ رەوشەنبیریا تاكێن جڤاكی و ئاینی…هتد گەلەكا گرنگە و كارتێكرنا خۆ یا هەی، لێ‌ پرسیار د ڤر دە ئەوە ئەگەر پێكڤەژیان هەبت كەلتۆرە یان یاسایە؟.
ئەرێ‌ كەلتۆرێ‌ پێكڤەژیانێ‌ چی یە و یاسایا پێكڤەژیانێ‌ چی یە؟
سەبارەت كەلتۆرێ‌ پێكڤەژیانێ‌ ئەندامێن كۆمێن جودا جودایێن جڤاكی ئەوێن مە ل دەستپێكێ‌ ناڤێ‌ وان ئینایی ئەوە كو ب وەكهەڤی و دادپەروەری و ئاشتییا ئەرێنی دگەل هەڤ بژین و پێكڤەژیانا وان چ پەیوەندی ب یاسایێن دەستكرد یێن حكومی ڤە نەبت ئانكو ب رامانەكا دی بێی هەبوونا یاسایێن نڤیسكی ئەو دگەل یەك بژین و وان دیرۆك و ژیان و پاشەرۆژەكا وەكهەڤ و ئێك چارەنڤیس دگەل ئێك هەبت و چ جار هزرێن نەرێنی یێن كو رامان ژێ‌ زۆرداری و ژناڤبرنا یێ‌ بەرامبەر نەبن، هەموو ئەو ئەندام و كۆمەل ژی دگەل یەك و دەست ب دەست وان فاكتەرێن ناڤخۆ و دەرڤە یێن دبنە ئەگەرێن ژناڤبرنا ڤێ‌ پێكڤەژیانێ‌ و تێكڤەدانێ‌ دكن ژناڤ ببن و نەهێلن،و نەكەڤنە بن چ فشاران ژی، داكو ئەو جڤاك و كۆمەلێن دناڤ وی جڤاكی دا دژین ب ئاشتی و پێكڤەژیانەكا ئاشتیانە یا سەردەم دگەل یەك بژین.
بەلێ‌ ژلایەكێ‌ دیڤە هەكە ئەم باس ل یاسایا پێكڤەژیانێ‌ یان پێكڤەژیانا یاسایی بكەین، گەلەك جاران ئەم دبینن دگەلەك جڤاكان دە یاسایێن دەستوری یێن نڤیسكی ل سەر ئاشتییا جڤاكی و پێكڤەژیانا كۆمێن جڤاكی دئێنە دەرخستن ئەڤەژی ژبۆ وەكهەڤیكرنا وان كۆم و گرۆپانە بەرامبەر یاسایی و پێكڤەگرێدانا وانە ل سەر ژیان و پەیوەندیێن جڤاكی، رەنگە تاكێن ڤان كۆم و گرۆپێن جودا نەڤێن دگەل یەك بژین بەلێ‌ ژبەر هەبوونا یاسایی و ترس ژ سزادانێ‌ ئەو كەس نەچارن دگەل یەك بژین و پەیوەندیێن خۆ باش بكن.
ب دیتنا من ئەڤ جۆرە زوو دكەڤنە بەر فاكتەرێن دەرڤە یێن تایبەت و هەگەر ئەو دەستهەلات نەما ئەوێن ئەڤ یاسانە دەرخستین و نەخاسمە ئەگەر ئەندامێن كۆما زۆرینە بن و هاتنە سەر دەستهەلاتێ‌ یان وەلات د رەوشەكا شەرێ‌ ناڤخۆیی دا دەرباز بوو،وی دەمی ئەو ئاشتی و پێكڤەژیان دكەفتە د مەترسیێ‌ دا و قوربانی چێدبن تایبەت كۆم و گرۆپێن لاواز و كەمینە دبنە قوربانی، و ژلایەكێ‌ دیڤە ئەگەر ئەم ڤێ‌ بەحس بكەین دبتە پێكڤەژیان و ئاشتیەكا نەرێنی چنكو ل دەمێ‌ هەبوونا وێ‌ دا ئەندامێن جڤاك و كۆمەلگەهێ‌ كەرب و كین و توندوتیژی بەرامبەر یەك هەیە.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi