كانونی دووه‌م 30, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

ئه‌لیاس نه‌عمۆ خه‌تارى :دیاردا كوشتنا گه‌نجێن ئێزدى ل ده‌رڤه‌ى وه‌لاتى

ئه‌لیاس نه‌عمۆ خه‌تارى :دیاردا كوشتنا گه‌نجێن ئێزدى ل ده‌رڤه‌ى وه‌لاتى

د درێژاهیا دیرۆكێ دا ملله‌تێ ئێزدى هه‌لگرێ ئالایێ فه‌رمان و بازدانان بووینه‌
هه‌ر كه‌سێ ئێزدى چۆبته‌ ژده‌رڤه‌ى وه‌لاتى ژ قه‌ستا نه‌چۆیه‌ به‌روڤاژى هه‌ر كه‌سێ بێژت ده‌رڤه‌ى وه‌لاتى كه‌یف و خۆشى و له‌ڤزه‌ته‌ وه‌ساژى نینه‌، ره‌ڤ هه‌ر ره‌ڤه‌ بازدان ژى هه‌ر بازدانه‌ لێ چ ره‌ڤ و بازدان ژ ڤالاهیان نه‌هاتینه‌،به‌لكو ژ ترسا شه‌رى و ژبرسا و خۆ دووركرن ژ جیێن شه‌ر لێ هه‌ى به‌ره‌ف جیه‌كێ ئارامى و ته‌ناهى لێ هه‌ى كۆچكرینه‌.
د درێژاهیا دیرۆكێ دا ملله‌تێ ئێزدى هه‌لگرێ ئالایێ فه‌رمان و بازدانان بووینه‌ و ئه‌م ئێزدى خۆ دناسین پاشماوێن وان فه‌رمان وقركرناین،له‌وما ئیرۆ رۆژ كوشتن و ژناڤبرنا ئێزدیان ل هه‌ر جیه‌كێ هه‌بن بوویه‌ تشته‌كێ ب ساناهى و چ هه‌ق و ڤه‌كۆلین ل سه‌ر فه‌رمانگێران نائێته‌كرن و مه‌زنترین به‌لگه‌ژى فه‌رمانا 74ێ یه‌ یا ل سه‌ر ملله‌تێ ئێزدى یاكو ل 3-8-2014ێ ل شنگالا بریندار رووداى و هه‌تا ئیرۆ رۆژ هه‌ر فه‌رمانه‌ ئه‌ڤجا ژیانا ل بن چادران دابت یانژى بازدانا ده‌رڤه‌ى وه‌لاتى بت ژبلى كوشتن و ره‌ڤین و وندابوونێ، ل ڤێده‌ر مه‌ دڤێتن ئه‌م بێین به‌رێ خۆ بده‌ینێ و ل سه‌ر ڤى بابه‌تى هنده‌ك گۆتنان و دانوستاندنێ بكه‌ین ئه‌رێ كا چاوا و ژبه‌رچى وه‌سان كوشتنا گه‌نجێن ئێزدى ل وه‌لاتێن بیانى به‌ربه‌لاڤبوویه‌ و هه‌ر كه‌سێ هاتیه‌ كوشتن ژ كیسێ خۆ چۆیه‌ و بێ ئه‌گه‌ر یان تۆلڤه‌كرنه‌ك یان هه‌ر تشته‌كێ دى به‌رامبه‌ر ڤان جۆره‌ كوشتنان،ئه‌گه‌ر و ئه‌نجامێن ڤى كارێ خراب و خرابكار ئه‌وێ ژلایێ كه‌سێن پیس و چه‌په‌ل دوژمنێن مرۆڤاتیێ و دوژمنێن خودێ ده‌مێ ب كوشتنا كه‌سێن به‌لنگاز و بێ گونه‌هـ رادبن چینه‌.
ل ڤێده‌ر گه‌له‌ك خاڵ و هزر و بیر خۆ دهاڤێژنه‌ دناڤدا و خۆ لێكدده‌ن و پرس و پرسیاران لێك دئالیێن و برچكان ڤه‌دده‌ن كا بۆچى و ژبه‌رچى و ئارمانج چى یه‌ هۆسا بێته‌ سه‌رێ خه‌لكێ مه‌ و ئه‌م دكارین بێژین هنده‌ك ژوان ئه‌گه‌ران ئه‌ڤه‌نه‌:
ئێك:_ ژبه‌ركو ئه‌م ئێزدینه‌ ملله‌ته‌كێ ئاشتیخوازین و د بێ زیانین و د ئاینێ مه‌ یێ ئێزدیاتیێ دا كوشتن حه‌رامه‌ مه‌ ئیمان ب وێ چه‌ندێ یاهه‌ى كو خودێ مه‌زن ئت ده‌ت و ئه‌و دبه‌ت نابت ئه‌م كوشتنێ بكه‌ین،له‌وما خه‌لكێن درنده‌ و توندره‌و هۆسا هزر دكه‌ن كو ئێزدى ملله‌ته‌كێ لاواز و بێ هێزن، له‌وما هه‌رده‌م خه‌لكێ مه‌ تووشى فه‌رمان و هێرشان و پلانێن چه‌په‌لێن دوژمنان بووینه‌ و دڤیان ملله‌تێ ئێزدیان ژناڤ ببه‌ن، لێ ئه‌وان نه‌دزانین چه‌ند هێرش و فه‌رمان ب سه‌ر ملله‌تێ ئێزدى دا بێن بیر و باوه‌رێن مه‌ ئێزدیان بهێزتر و موكمتر لێ دئێن و ملله‌تێ مه‌ بتر ئیمانا خۆ ب خاك و وه‌لاتێ خۆ دئینن و دبنه‌ سترى و چه‌قه‌ل دچاڤێن دوژمناندا.
دوو:_به‌لاڤبوونا توندره‌ویێ و توندره‌ویا رادیكال یا ئایینى ل وه‌لاتێن ئه‌ورۆپا ئه‌ڤه‌ژى نیشانا مه‌ترسیێ یه‌ ل سه‌ر وان ده‌ولاتان ئه‌وێن بناڤێ دیموكراسیێ و ئێكسانیێ و مافێ مرۆڤان دئاخیڤن، دڤێتن دوور ب رێنین و سنووره‌كێ موكم بۆ ڤان جۆره‌ پیسه‌ كه‌سان دانێن و نێنه‌ هژمارتن وه‌ك كه‌سێن نۆرمال مامه‌له‌ دگه‌ل نه‌ئێته‌كرن.
سێ:_ئێكسانیا به‌ربه‌لاڤ ل وه‌لاتێن دیموكراسى⁄ ل ڤان وه‌لاتان هه‌موو مرۆڤ وه‌كى ئێكن خه‌لكێ وان یێ ره‌سه‌ن و خه‌لكێ بیانى دڤێتن پێگیریێ ب یاسایێ بكه‌ن له‌وما ئه‌ڤ چه‌نده‌ رێ دده‌ته‌ خودان پلانێن خراب پلانێن خۆ بجهـ بینن، ئازادیا هه‌ر تاكه‌كه‌سه‌كى ئێك ژ وان مافێن مرۆڤانه‌ ئه‌ڤه‌ژى دبته‌ رێك خۆشكرن بۆ كه‌سێن خراب كو خرابیێ بكار بینن به‌رامبه‌ر كه‌سێن ئاشتیخواز و بێ زه‌ره‌ر.
چار:_ خۆ ستراندن یان خۆ نه‌ستراندن ⁄ ئه‌ها ئه‌ڤه‌ مه‌زنتڕین كاره‌ ئه‌م بكارین پێ رابین به‌ڕامبه‌ر دوژمنان و خودان پلانێن خراب، دڤیا هه‌رده‌م مڕۆڤ یێ نێزیكى مالا خۆ بت و هه‌ر رۆژ هێڤاریان دناڤا زارۆكێن خۆدابت و هنده‌ك شیره‌ت و راسپاردان ئاراسته‌ى وان بكه‌ت، هه‌ڤالینیێ دگه‌ڵ وان كه‌سێن خراب دروست نه‌كه‌ت و نه‌چته‌ مالێن وان و وانژى نه‌ئینته‌ مالا خۆ، هه‌ردیسان ل ده‌مێ دروستبوونا هه‌ر ئاریشه‌كێ دگه‌ل وان پیسه‌ كه‌سان رابت خۆ دووركه‌ت بچته‌ باژێره‌كێ دى.
پێنج:_ده‌روونیا په‌نابه‌ران ⁄ په‌یدابوونا دیاردێن ده‌روونى ل جه‌م په‌نابه‌رێن بێ هه‌ق و بۆرینا ده‌مه‌كێ درێژ دناڤا كه‌مپاندا، وه‌كى هه‌موو خه‌لكێ مه‌ دزانت ئیرۆ رۆژ وه‌رگرتنا مافى ل ئه‌لمانیا و هه‌موو ئه‌ورۆپایێ یا كێمبووى و گه‌له‌ك یا ب زه‌حمه‌ت كه‌فتى،له‌وما درێژبوونا دۆما خه‌لكێ دناڤا كه‌مپاندا ئاریشان دروست دكه‌ت و ئێش و نالینێن وان زێده‌ دكه‌ت و بارودۆخێ وان یێ ده‌روونى تێك دچت و نه‌خۆشیێن ده‌روونى ل جه‌م وان په‌یدا دبن،ئه‌ڤه‌ژى به‌روڤاژى ئاریشێن مه‌زن په‌یدا دكه‌ت دگه‌ل كه‌سێن بیانى و كه‌سێن توندره‌و و خرابكاران.
شه‌ش:_كه‌لتۆرێ جودا ژ كه‌لتۆرێ مه‌⁄ هه‌لبه‌ت جوداهیا كه‌لتۆرى دگه‌ل كۆمه‌لگه‌هه‌كا ڤه‌كرى و تێكه‌لبوونا مرۆڤام ژ هه‌موو ره‌نگان و هه‌موو ده‌وله‌تێن جیهانێ، گه‌له‌ك تشت ژمه‌ نائێنه‌ قه‌بوولكرن و ئه‌مژى گه‌له‌ك تشتان قه‌بوول ناكه‌ین له‌وما دگه‌هیننه‌ ئاستێ ئاریشێ هه‌ت كو ژ ده‌ست ده‌ردكه‌ڤت.

ئه‌نجامێ ڤێ چه‌ندێ گه‌له‌كێ مه‌زنه‌ لێ ده‌مێ زولم هه‌بت و به‌رامبه‌رى وێ زولمێ ئه‌م نكارین تشته‌كى بكه‌ین ئه‌ڤه‌ مه‌زنترین شكه‌ستنه‌، بێ ئۆمێدى و ترس زاڤ دبن له‌وما خه‌لكێ مه‌ نكارت گه‌له‌ك كاران ئه‌نجام بده‌ت یان بچته‌ گه‌له‌ك جهان،ژبه‌ركو پشتا وى یا هاتیه‌ چه‌ماندن ژبه‌ر ڤان جۆره‌ كوشتنان،ئه‌و كه‌سێ دئێته‌ كوشتن ب مخابنى ڤه‌ ماله‌كا ئێختیم و بێ سه‌میان پشت خۆڤه‌ دهێلت ژیان لێ تارى و زه‌حمه‌ت دبت.
چاره‌سه‌ریا هه‌ره‌ مه‌زن ژڤان جۆره‌ ئاریشان ئه‌وه‌ خه‌لكێ مه‌ خۆ بسترینت و هه‌ڤالینى و تێكه‌لیێ دگه‌ل كه‌سێن نه‌ناس و خراب ل ڤان وه‌ڵاتێن ڤه‌كرى نه‌كه‌ت، سه‌ر و گوها ل ماڵ و زارۆكێن خۆ بكه‌ت كا كوڤه‌ دچن و ده‌وام و كارێن وان د چاوانن و هه‌ڤالینیا كه‌سێن خراب و بیانى نه‌كه‌ن و ئاخفتنان ب ده‌ڤێ خۆ نه‌بێژن ئه‌گه‌ر یا خۆبكه‌ن ئاگه‌هـ ژ خۆ هه‌بت.

س.س

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi