شوبات 03, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

جه‌هوه‌ر هه‌كارى: ژ بیره‌وه‌ریێن مه‌(پشكا هه‌فتێ)

جه‌هوه‌ر هه‌كارى: ژ بیره‌وه‌ریێن مه‌(پشكا هه‌فتێ)

ل رۆژا 1990/3/23 ل ده‌ره‌نگیا شه‌ڤێ ئه‌م گه‌هشتینه‌ ئه‌سفه‌هانێ و ل وێ شه‌ڤێ هه‌ر ئوتێله‌كا ئه‌م چۆباینێ به‌ر ده‌رگه‌هێ وێ یێ گرتى بوو نڤیسى بوو (ئوتاقى خالى نه‌دارد) ئه‌م گه‌له‌ك وه‌ستیاین نێزیكى 3ى شه‌ڤێ مه‌ مزگه‌فته‌ك دیت و ئه‌م چۆینه‌ دقولاچكه‌كێ را به‌لكى بێهنه‌كێ نڤست باین،به‌لێ پشتى نێزیكى ده‌مژمێره‌كێ نڤێژكه‌ر هاتنه‌ مزگه‌فتێ و چۆنه‌ هۆلا نڤێژا ئێكى ئه‌م دیتین نزانم مجێورێ مزگه‌فتێ بوو یان نا هاته‌ نك مه‌ و زمانێ وى مه‌ نه‌دزانى ئێدى ئه‌م ده‌رئێخستین.
هێشتا دنیا یا تارى بوو جاره‌كا دى ئه‌م زڤرینه‌ مزگه‌فتێ و پشتى بێهنه‌كێ جاره‌كا دى هات ئه‌م ده‌رئێخستین دونیا بچه‌كێ ڕۆن بوو مه‌ جیه‌كێ بچووك یێ خوارنێ دیت و ئه‌م گه‌له‌ك دبرسى بووین تكێن مێلاكا چێدكرن ئه‌م روونشتین و مه‌ تێرخوار و هنده‌كێ خۆ مژوولكر هه‌ردوو هه‌ڤالێن مه‌ چۆن و پشتى بێهنه‌كێ مه‌ ئێكى ب شه‌روال دیت و سلاڤ لێكر و پسیارا گه‌راجا ناحیا مباركێ ژێكر و وى نیشا مه‌دا و ئه‌م سوارى مینى پاسه‌كێ بووین و چۆینه‌ مباركێ،ده‌مێ ئه‌م هاتینه‌ خوار چه‌ند زارۆكێن كورد جگاره‌ دفرۆتن و مه‌ پسیارا مالا ره‌حمه‌تى سلێمان باوه‌ردى كر بابێ هه‌ڤال محه‌مه‌د و ئێكى گۆته‌ مه‌ ئه‌ڤه‌ مالا وان یا ل ڤێده‌رێ و هات و نیشا مه‌ دا مه‌ ده‌رى قوتا كاك سلێمان هات و ده‌رى ڤه‌كر و گۆت كه‌ره‌م كه‌ن من گۆتێ ئه‌ز جه‌هوه‌رم ئێدى خۆ د من وه‌ركر و چار شه‌ڤ و رۆژا ئه‌م بووینه‌ مێڤانێن وان.
كاك سلێمانى و مالباتا وى رێ نه‌ددان ئه‌م بچین و رێزه‌كا گه‌له‌ك مه‌زن ل مه‌ گرتن و وان چار رۆژان گه‌له‌ك هه‌ڤال ل وێده‌رێ دهاتنه‌ جه‌م مه‌، به‌لێ جیێ داخێ یه‌ كاك محه‌مه‌د لنگێ وى ئاسنه‌ك ب سه‌ردا هاتبوو ب زۆرى دكارى رابت به‌لێ هه‌ر جاره‌كێ ئه‌م برینه‌ ئه‌سفه‌هانێ ئه‌وژى ژبۆ دیتنا جیێن كه‌ڤنه‌وار ب تایبه‌تى ژى هه‌ر دوو پرێن به‌رى كو گه‌له‌ك دجوان بوون و پشتى چار رۆژان ئه‌م زڤرینه‌ ته‌هران و ژ ته‌هرانێ بۆ قزوینێ ئه‌م چۆینه‌ نك پێشمه‌رگه‌ سه‌برى عه‌لى زێوه‌ى و رۆژا دى ل ده‌ره‌نگى شه‌ڤێ ئه‌م ل شه‌مه‌نده‌فره‌كێ سواربووین و سبه‌یكێ گه‌هشتینه‌ میاندۆئاب و ب مینى پاسێ ئه‌م هاتینه‌ مه‌هابادێ و مه‌ دڤیا بچینه‌ ناڤ بازارى به‌لێ به‌فر و بارانه‌كا خۆش دبارى و مه‌ نكارى ل بازارى بگه‌رین و ئێدى ئه‌م ل ته‌كسیه‌كێ سوار بووین و هاتین ئۆرمیێ و كاك خالد ل ئۆرمیێ ما و ئه‌ز زڤریمه‌ راژانێ ل رۆژا 1990/3/30.

س.س

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi