ئەگەرێن ڤەنەگەریانا ئاوارێن شنگالێ؟
سەگڤان شنگالی
نێزیكە ماوێ هەشت سالان دەرباز ببن ل سەر فەرمانا ئێزدیان،شنگالی د قۆناغێن جودا جودا یێن نەخۆش و دژوار دا دەرباز دبن و ژیانەكا رووبرووی مرنێ یا بەردەوام بەرامبەری وانە وەكی ترس ژ شەواتا چادران و مرن ل سەر عەردێ شنگالێ ژ بەر شەرێن لێ رووددەن.
هەتا جارا داویێ كارگێریا پارێزگەها دهۆكێ و جیێن بەرپرس بریار دان خەلكێ دناڤ كەمپان دا دكارن و د ئازادن چادرێن خۆ ل سەر حەزا خۆ بكەنە بلۆك داكو ژ شەواتا چادران بێنە پاراستن،هەلبەت ئەڤە ژی پشتی وێ چەندێ هات ل دەمێ بۆری دا چەندین چادر شەوتین و ب ڤێ چەندێ ب دەهان كەس بووینە قوربانی و جانێ خۆ ژ دەستدان،ئەڤە ژبلی زیانێن مادی یێن ب خەلكێ كەفتین،رەنگە ئەڤ بریارە ل دەمێ نهۆ دا بریارەكا دجهێ خۆدا بت و یا پێتڤی بت و هەر دیسان چارەسەریەكا دەستپێكی بت ژبۆ كێمكرن و نەهێلانا روودانێن ئاگربەربوونێ،بەلێ وەكو پێشەرۆژ و ژیانا سەرەكی دێ كارتێكرنێ ل ڤەنەگەریانا خەلكێ شنگال كەت،بێگۆمان ڤەنەگەریانا خەلكی ژی بۆ سەر جهـ و وارێ وان ئەگەرەكە پرۆژێن خزمەتگۆزاری و ئاڤەدانی یێن مەزن ل دەڤەرێ نەئێنە جێبەجێكرن، ئەڤەژی ل سەر گۆتنا پارێزگارێ مووسلە كو بەری چەند هەیڤان راگەهاندبوو،ئانكو ب رامانەكا دی هەتا خەلكێ شنگال ب گشتی ڤەنەگەرن،پرۆژێن ئاڤەدانیێ و خزمەتگۆزاری نائێنە ئەنجام دان.
بەلێ ل سەر ڤەگەریانا خەلكێ ژی بۆ شنگالێ ئاستەنگێن مەزن یێن بنەرەتی هەینە كو ئەو دبنە رێگر و ئەگەر خەلكێ شنگالێ ڤەنەگەرن،ئەو ژی ب كورتی ئەڤن (نەبوونا كارگێریەكا ب هێز یا یاسایی، نەبوونا ئێمناهیێ، هەبوونا گرۆپێن جودا جودا یێن چەك د دەستان دا، گەفێن توركیا، جار جارا هەبوونا شەران دناڤبەرا سوپایێ عێراقێ و ئاسایشا ئێزدیخانێ دا، وێرانیا بتریا مالێن خەلكێ،رانەكرنا گۆڕێن ب كۆم، هەبوونا مینێن بن ئەرد)… هتد،ئەڤە و چەندین ئەگەرێن دی ژی هەنە خەلكێ دناڤ كەمپان دا هزر د ڤەگەریانێ دا نەكن و ژیانا خۆ ل شنگال ب مەترسی بزانن،بەلێ وەكی ل سەری مە گۆتی ژیانا دناڤ چادران بەردەوام یا ب مەترسی یە و گەرەنتی نەكرنا مسۆگەرە بۆ ژیانا هەتا هەتایێ،ب ئەڤێ یەكێ ژی ژیانا خەلكێ شنگال ب هەلاویستی مایە دناڤبەرا مان ل كەمپان و ڤەگەرا شنگال دا؟.
تُتاح هذه الصورة أيضا في: کوردی