شەرێ شنگال و ئاماژەیێن مەترسیدار
سەگڤان شنگالی
ژ سالا 2017 و هەتا نهۆ چەندین جاران هەڤركی و نەخۆشی و شەر دناڤبەرا سوپایێ عێراقێ و لایەنگرێن پەكەكێ ل شنگالێ چێبوونە و چەك هاتنە بكارئینان و ئەڤە ژی بوویە ئەگەر چەند كەس ژ هەردوو ئالیا و ژ خەلكێ سڤیل ببنە قوربانی و هەتا ئارامی و ئاسایشا دەڤەرێ ژی بكەفتە دمەترسیێ دا،خەلكێ نهۆ ل دەڤەرێ دژین ب بەردەوامیا هەڤركیێن ڤان هێزان هەست ب مەترسی و نەئارامیێ دكن و هەتا ئەو خەلكێ دناڤ كەمپان دا ژی زوو ب زوو نەڤەگەرن،چنكو وان نەڤێت جارەكا دی ل ترسێ دا ژیانا خۆ دەرباز بكن.
هەتا داوی جار ل رۆژێن(17_18/4/2022)جارەكا دی ل دۆریانا دوگرێ ل باكوورێ چیایێ شنگالێ و ل باشووێ چیایێ شنگال شەر دناڤبەرا سوپایێ عێراقێ و هێزێن سەر ب پەكەكێ ڤە روودا و چەند كەس ژ هەردۆ ئالیان برینداربوون و ترسەكا مەزن كەفتە د دلێ خەلكێ دەڤەرێ دا ب گشتی و جیێن شەر لێ پەیدا بووین ب تایبەتی،بێگۆمان هەبوون و بەردەوامیا ڤان هەڤركی و شەرا دناڤبەرا هەردوو هێزان دا ل شنگال ئاماژەیێن گەلەك ب مەترسە یێن نافخۆیی و دەرڤە ل سەر دەڤەرێ هەنە.
ژ وان ئاماژەیان ژی ئەم دكارن هنەكا بدەنە دیاركرن،ژوان ژی:
1_هەبوونا ڤان هەڤركیا ب بەردەوامی ئاماژە بەر ب وێ چەندێ ڤەیە كو ئەڤ هێزنە ئارامیا دەڤەرێ و رەوشا هەستیار یا خەلكێ دەڤەرێ ل بەر چاڤ وەرناگرن،بەلكو بتنێ ژبۆ بەرژەوەندیێن خۆ یێن تایبەت سەرەدەریێ دكن.
2_ترسا بەردەوام د دلێ خەلكێ دا،بێگۆمان دوبارەبوونا ڤان شەرا نەئارامی و ترسێ ل دلێ خەلكێ دەڤەرێ دا دروست دكت كو خەلك ب بەردەوامی هەست ب نەئارامیێ بكن و ترس ل دلێ وان دا هەبت و ب ئارامی نەژین.
3_مەترسی و كارتێكرنێن مەترسیدار و نەرێنی ل سەر نەڤەگەریانا خەلكێ دەڤەرێ،چنكو دنها دە بتریا خەلكێ شنگال دناڤ كەمپان دا ژیانا خۆ دەرباز دكن و هەبوونا ڤان شەران دبتە هاریكار كو خەلكێ دەڤەرێ یێ ئاوارە زوو ب زوو هزرا ڤەگەریانێ نەكن،چنكو دەڤەرێ وەك جیەكێ ئارام نابینن بەلكو هەتا هنەك مالبات چ جار هزرا دووبارە ڤەگەریانا شنگال نەكن و هزر دوێ چەندێ دا بكن كو ل سنوورێ پارێزگەها دهۆكێ خانیان بكرن،بێگۆمان ئەڤێ چەندێ ژی مەترسیێن پیشەرۆژێ هەنە ل سەر دەڤەرا شنگال .
4_خزمەتا دوژمنان،ئەڤ جۆرە شەرانە خزمەتێ بۆ دوژمنان دگەهینن تایبەت شانەیێن نڤستی یێن داعشێ كو ئەگەر هات و ئەڤ رەوشە ل پێشەرۆژێ بەردەوام بوو ئەو شانەیێن نڤستی بتر خۆ بهێز بئێخن و رەوشا ئالۆز ژبۆ خۆ ب دەلیڤە بزانن.
5_دەڤەر نائێتە ئاڤەدانكرن و دئێتە پشتگوهـ خستن ژلایێ حكومەتا عێراقێ ڤە ب مەرەما هەبوونا هەڤركی و شەران كو ب بەردەوامی،چ ب ئاشكەرا و چ ڤەشارتی هەنە.
6_ئەگەر هات وبەردەوام بوو ر‌ێكخراوێن نێڤ دەولەتی یێن مرۆڤایەتی كارێ خۆ ل شنگال بهێلن،ژبەر هەبوونا مەترسیێ ل سەر وان .
7_قوربانیدانا خەلكێ سڤیل یێ دەڤەرێ كو هەتا نها چەند كەسێن سڤیل بوونە قوربانی وبریندار بووینە.
8_هەبوونا ڤان شەرا و هەڤركیا خزمەتا بەروڤاژی ژ دۆسەیا جینۆسایدا ئێزدیان را دكت،چنكو ل چەرخێ بیست و ئێكێ ئێزدی وەك كەمینەیەك ل عێراقێ كەفتنە بەر مەترسیدارترین بزاڤێن جینۆسایدێ،ب هەبوون و بەردەوامیا ڤان جۆرە شەران دۆسەیا مەزن یا ئێزدیا ب سستی یێ برێڤە چت و بتر هەڤركی و دۆسەیێن لاوەكی ل سەر ئەردی دێ جیێ وێ گرن وەك نها هەڤركیێن سیاسی.
بۆ نموونە شاندێن لێكۆلین و لێگەریانا راستیێن جینۆسایدێ یێن نێڤ دەولەتی نكارن ب ئاسانی سەرەدانا شنگالێ بكن،چنكو ب مەترسی ل سەر ئاسایشا خۆ یا كەسایەتی دبینن.
