حوزه‌یران 09, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

ئەلیاس نەعمۆ خەتاری:دامەزراندنا بنگەهێ‌ لالش هزرەكا مەزن بوو ژبۆ ئێزدیخانێ‌ و ئارمانجەكا پێتڤی بوو

دامەزراندنا بنگەهێ‌ لالش هزرەكا مەزن بوو ژبۆ ئێزدیخانێ‌ و ئارمانجەكا پێتڤی بوو
ئەلیاس نەعمۆ خەتاری
دەمێ‌ ئەم دئێین دكەینە بەحس و خەبەرا كار و خەباتا بنگەهێ‌ لالش و لاپەرا دبۆرینین ئێكسەر وێنێ‌ سەرۆكێ‌ دەستەیا بلندا بنگەهێ‌ لالش دئێتە بەر چاڤێن مە،كو ئەو كەسێ‌ هەردەم خەمخۆرێ‌ ئاخ و گەل و مللەتێ‌ خۆ بوو و ئەو كەسێ‌ ئێزدیخان و كوردستان كەفتیە بەر خەما وی ئەو كەسێ‌ هەنێ‌ خلمەتكارێ‌ ئێزدیخانێ‌ رەحمەتیێ‌ شێخ شامۆ رەحما خودێ‌ لێ‌ بت و جیێ‌ وی بەهشت بت،ب راستی وەغەرا وی ب شێوەكێ‌ گشتی و تایبەت ژ بۆ ئەندامێن بنگەهێ‌ لالش خسارەتەكا مەزن بوو.

هەردیسان خودێ‌ ژێ‌ رازی پیر خدر سلێمان دەستانەكا مەزن بوو بۆ بنگەهێ‌ لالش ژبەركو كەسێ‌ ئێكێ‌ بوو هزرا دامەزراندنا بنگەهێ‌ لالش كەفتیە دسەرێ‌ وی دا و دروشمێ‌ (لالش كانیەكە زەلالە دهورتە درۆبارێ‌ رەوشەنبیریا كوردی دا) دانایە سەر بنگەهێ‌ لالش رەحما خودێ‌ لێ‌ بت، بنگەهێ‌ لالش ژمارەكا نڤیسەر و كەسێن هێژا ژ دەستداینە دڤان(29) سالان دا رەحما خودێ‌ ل هەموویان بت دنیا ملكێ‌ خودێ‌ یە،هەر كەسەكێ‌ ل جیەكی خزمەتێ‌ بكەت د دەمەكی دڕێژدا هەلبەت دێ‌ خزینەكا مەزن ل باوی جی پەیدابت ژوان ژی چالاكی و كارێن رەوشەنبیری و كۆمەلایەتی، هەلبەت هەردەم و وەختەكی كاودانێن خۆ وێت هەین، بنگەهێ‌ لالش ئێكە ژوان دەزگەهێن هەری مەزن كاریە ب درێژاهیا (29) ساڵێن بۆری دا خزمەتەكا مەزن پێشكێشی خەلكێ‌ خۆ بكت،بنگەهێ‌ لالش خودان خزینەكە ژ خزمەت و خەباتا بەردەوام و هەموو جۆرە چالاكیان،مینا د ئالیێ‌ ئاینێ‌ ئێزدیاتیێ‌ ڤە یان ژی ژ ئالیێ‌ رەوشەنبیری و كۆمەلایەتی و جڤاكی و رامیاری و هەموو ئالیێن دن ڤە.
وەكو هەموو جاران دئێتە خویاكرن بنگەهێ‌ لالش هاتە ئاڤاكرن ل سەر دەستێ‌ ژمارەیەكا رەوشەنبیرێن ئێزدیان ڤە ب پشتەڤانیا حكومەتا هەرێما كوردستانێ‌، هزرەكا مەزن بوو و ئێكگرتنەكا هەرە باشبوو ژبۆ مللەتێ‌ ئێزدی و ئێزدیاتیێ‌ د چارچۆڤێ‌ كوردی و كوردستانێ‌ دا،ل دەمێ‌ بنگەهێ‌ لالش ل رێككەفتی(12/5/1993)ل دهۆكا داسنیا هاتیە دامەزراندن، بۆ خەلكێ‌ مە یێ‌ ئێزدی د چارچۆڤێ‌ رەوشەنبیریا كوردی دا پێتڤیەكا مەزن بوو،ل سەردەمەكێ‌ سەخت و دژوار دا داكو هەول و بزاڤێن دوژمنان ئێت بەردەوام ژ پاڵ نەحەز و نەیاران ژ بۆ دور ئێخستنا ئێزدیان ژ وارێ‌ هەرێ‌ مەزنێ‌ كوردینیێ‌، هەر دیسان وەكی دئێتە خویاكرن كو ل دەمێ‌ دامەزراندنا بنگەهێ‌ لالش ل دهۆكێ‌ ژمارەیەكا گەلەك یە كێم ژ ئێزدیان سەر ب حكومەتا هەرێما كوردستانێ‌ ڤەبوون، ل وی دەمی ژمارا هەرە مەزن ژ ئێزدیان ل ژێر دەستێ‌ رژێما شۆڤینیا بەعس دا بوون، پشتی حكومەتا گۆڕب گۆڕ ژ ناڤچۆیی ژمارەیەكا زۆر باش یا تایی و نڤیسینگەهێن بنگەهێ‌ لالش ل دەڤەڕێن ڤەقەتیایی ژ كوردستانێ‌ هاتنە ڤەكرن ب مەرەما پێشكێشكرنا خزمەتا رەوشەنبیری و كۆمەلایەتی و جڤاكی بۆ خەلكێ‌ وان دەڤەران و ژبۆ ئەنجام دانا چالاكیێن هەمەجۆر، پشتی نەمانا زولم و زۆرداریێ‌ ل سەر خەلكێ‌ مە ل وان دەڤەران، دیسان نائێتە ژبیر كرن پشتی جینۆسایدكرنا ئێزدیان ل (3/8/2014) و كەفتنا زۆربەیا دەڤەرێن ئێزدیان ب تایبەت ل شنگالا بریندار ژێر دەستێ‌ رێكخراوا تیرۆرستیا داعش،هەردیسان دەستەیا بلندا بنگەهێ‌ لالش ب هەموو لق و نڤیسینگەهێن خۆڤە رابوون ب پێشكێشكرنا هەموو جۆرێن خزمەتا خەلكێ‌ ئاوارە ژ دابینكرنا جی و پەیداكرنا نان و ئاڤ و خوارنێ‌.
ژئالیێ‌ دن ڤە بنگەهێ‌ لالش رابوویە ب نڤیسین و دیكیۆمێنتكرنا هەر تشتەكێ‌ ب جینۆسایدا ئێزدیان ڤە گرێدایی ژبلی چیرۆك و گۆتار و هۆزان و شعر ب نڤیسینێن جۆراوجۆر هەتا ئیرۆ ل سەر جینۆسایدا ئێزدیان دبەردەوامن ب كار وخەبات و جۆرێن چالاكیان، یادن ئەوە كو بنگەهێ‌ لالش خزمەتا قوتابیێن ئێزدی بەردەوام كریە هەر ژ ڤەگوهاستنا وان ژمووسل و باژێڕێن دن و هەتا ئیرۆ رۆژ بەردەوامن دگەل قوتابیان و ب رێڤەبرنا كارێ‌ وان یێ‌ خووندنێ‌، ڤیستەڤالێن رەوشەنبیری و خۆلێن فێركرنێ‌ و تێگەهشتنێ‌ ل هەموو دەمان كارێ‌ بنگەهێ‌ لالش بوویە چ ژلایێ‌ دەستەیا بلندڤە یان ژی ژلایێ‌ تایی و نڤیسیگەهێن لالش ڤە.
ل هێرە دڤێت رۆلێ‌ هندە یێ‌ مەزن چ جاران نەئێتە ژبیركرن و بێتە دیاركرن كو خزمەت و خەباتا بنگەهێ‌ لالش خەباتەكا مەزنە و بەرچاڤ بێتە وەرگرتن و ل قەلەمدان ژ وێ‌ خزمەتێ‌ ناسینا ئاینێ‌ ئێزدیاتیێ‌ ب تەمامیا جیهانێ‌ و كەلەپۆرێ‌ باب و كالا و فلكلۆرێ‌ ئێزدیان هەردەم پاراستی و پێشڤەبریە، هەر دیسان دەرئێخستن و بەلاڤكرنا گۆڤارا لالش و رۆژناما دەنگێ‌ لالش و تۆرا لالش یا ئنترنێتێ‌ و چاپكرنا ژمارەیەكا پەرتۆكان كار و خزمەتەكا بەرچاڤە و دكەفتە دبەرژەوەندیا گشتی دا و ل پاشەرۆژێ‌ مفایەكێ‌ مەزن دێ‌ ژێ‌ ئێتە وەرگرتن،هەلبەت هەر كەسەك یان هەر جیەكێ‌ ل دەمێ‌ بەرپرسیارتیەكا مەزن هلدگرت دێ‌ ئەرێنی و نەرێنی هەبن دێ‌ پەسنا وی كەسی یان وی جی ئێتەكرن و د هەمان دەمدا دێ‌ گلە و گازندە ژی هەبن، لەوما دڤێت ئەم هەموو پالدەربین بۆ هەر جیەكێ‌ خزمەتێ‌ بۆ گەڵ و وەلاتێ‌ خۆ دكت مینا بنگەهێ‌ لالش، دەم و وەخت هاتن كۆنگرەكێ‌ بەرفرەهـ بێتەكرن و گهۆرین د فەرن ژبۆ خزمەتا گشتی و بتر پێشڤەبرنا كاری.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi