شوبات 08, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

مەهدی حەسەن موراد:وەغەرەكا بێ‌ ڤەگەریان

وەغەرەكا بێ‌ ڤەگەریان
مەهدی حەسەن موراد
ئەم هەموو ل هیڤیا پیرێ‌ خۆ بووین كو كارێ‌ مە كاروبار بكت و ب كەڤینە سەر رێیا راست و دروست و چ رۆژنامەڤان چ پەیامنێر دیدارا دگەل بكن و چ نڤیسەر پەرتۆكێن خۆ د دەستێ‌ وی بكن،داكو پێداچۆنێ‌ لسەر بكت و بۆچۆن و تێبینیێن خۆ لسەر بدەت، لێ‌ فەلەكێ‌ چەرخا خۆ لێدا و پیرێ‌ مە نیڤا رۆژێ‌ ژ ناڤ دەستێت مە بر ئەڤجا دێ‌ چ بێژن و چ ڤەگەێرم.

پیر خدرێ‌ سلێمانی ئێك ژ پیرێن جەروا بوو و پیرێ‌ مالا میرێ‌ شێخا و هندەك ژ مالێن باسكێ‌ شێخا بوو، ژلایەكێ‌ دن ڤە نڤیسكار و ڤەكۆلەرێ‌ ئۆلا ئێزدیان و پەرلەمانتارێ‌ بەرێ‌ یێ‌ پەرلەمانێ‌ كوردستانێ‌ بوو، و كەد و خزمەتەكا مەزن ل پشت خۆ هێلا ژوان ژی دنیایەكا پەرتۆك و نڤیسین و ڤەكۆلینان،بڤێ‌ چەندێ‌ زیانەكا مەزن گەهشتە كاروانێ‌ رەوشەنبیریا كوردی ب گشتی و یا ئێزدی ب تایبەتی، ژبەركو ب راستی وی ب كریار سەلماند كو لالش كانیەكا زەلالە دهوڕتە دناڤ رووبارێ‌ رەوشەنبیریا كوردی دا،ئەز ئێك ژ مرێدێن پیر خدر بووم، و وەك بنەمال و كەسایەتی پەیوەندیێن مە گەلەك د خورت بوون و هەر گاڤ ل گەرا سالێ‌ یا گەریانا شێخ و پیران دەمێ‌ پیر دهاتە ناڤ مالێن مە و دوعایێن پیرێ‌ جەروا ل ناڤ مالێن مە دكرن دگۆتە مە كارێ‌ مە پیرا ئەوە كو ئەم سەر و گوها ل مریدێن خۆ بكەین و وان پەروەردەكا نیشتیمانی و روحی پەروەردە كەین، ئەڤجا هەر ل سالێن هەشتیان دا گەلەك جارا دەستێ‌ خۆ دادنە سەر سەرێ‌ من و دگۆت بخوونن ژبەركو خوندن پاشەرۆژە، پشتی ئێكەم پەرتۆكا خۆ یا گوندیاتیێ‌ ل سالا 1985ێ‌ چاپكری رەوشا وی یا ئابووری گەلەك خراب بوو ل وی وەختی ئاكنجیێ‌ قەزا شێخان بوو و د خانیەكێ‌ كرێ‌ دابوو ژ نەچاری زێرێن خێزانا خۆ و ناڤ مالیا خۆ ژی فرۆتن و ژ دیسان هەر ژ نەچاری هەر وێ‌ سالێ‌ هاتە گوندێ‌ مەهەتا كەڤن باپیرێ‌ من خانیەك دایێ‌ كو ژ دوو ژۆران پێكهاتبوون و مرۆڤێن مە و گوندیان بۆ وی سەروبەركرن و گەلەك تەنا بوو،ل وی وەختی مامۆستا بوو ل ئامادەیا شێخان بەلێ‌ دەستێ‌ وی گەلەك یێ‌ بەرتەنگ بوو هێشتا هندەك دراڤێ‌ چاپێ‌ مابوو و پەرتۆكێن وی ل بەغدا بوون، داپیرا من هەر رۆژ دا بێژتێ‌ پیر ئەڤە چ پەرتۆكن تە بۆچ وەسا ب سەرێ‌ ڤان پچوكان كر و تە رەزیل كرینە، خودێ‌ ب رەحمینت هندی دلێ‌ باپیرێ‌ من و داپیرا من ب جەروانی و ئادانی ڤەبوو دوو زارۆكێت جوان و قەشنگ یێن پیری د ڤان خانیكا دا، دا پیر خدر ب سنگەكێ‌ بەرفرەهـ و ب كەنی بەرسڤا داپیرا من دەت و بێژتێ‌ دادێ‌ ب خودێ‌ من تشتەكێ‌ هند مەزن یێ‌ كری و ئەز د چ رەوش دا بم بتنێ‌ ب خێر ڤان رۆژا پەرتۆكێن من ببگەهن بلا من تشتەك نەبت و بتنێ‌ توو هەرۆ سێنیكەكا ماستی بدە من و دوو نانێن گەرم بۆ من و خەیالێ‌ دابین كە و مە تشتەكێ‌ دن نەڤێت، هەروەسان پیری دگۆت ئەز هەرۆ سبەیكا زوو داچم نك دادێ‌ ماستێ‌ خۆ ئینم و تەروونەكا مەزن ل بەر دەرگەهی بوو دا دوو نانێن خۆ راكەم و ئێمە مال و ژیان وەسان ب سادەیی دەرباز دبوو و كرێ‌ یا خانی ژی بێ‌ بەرامبەر ئانكو بەلاش بوو و بنەمالا مە هەردەم د بەرژەوەندی و خزمەتا پیری دابوویە ب هەموو شێوازان.

رۆژەك ژ رۆژان پیر و خالێ‌ من چۆنە بەغدا و پیكەمەكا تژی پەرتۆكا ئینانە مال لێ‌ ئاریشە ئەوبوو كی دێ‌ كرت و كێ‌ دێ‌ خوونت ژبەركو وی سەردەمی كەسێن بكارن بخوونن و بنڤیسن دكێم بوون، باپیرێ‌ مەزنێ‌ گوندی بۆ هندێ‌ د گۆتە گوندیان هاریكاریا وی بكن و پەرتۆكێن پیری بكرن لێ‌ كەسی نەكرین، هندەك قوتابی هەبوون هەر ئێكی ئێك بر20 دانەك هاتنە فرۆتن و یێن دن هەموو مان سالەكێ‌ هەتا دوو سالان و سەرهلدانا بەهارا 1991ێ‌ ل باشوورێ‌ كوردستانێ‌ پیر خدری پشكداری د سەرهلدانێ‌ داكر وی دەمی مە پیر خدر دیت یێ‌ ل سەر شاشێن تەلەڤزیۆنان دەردكەڤت و دگەل سەرۆك مەسعود بارزانی و مام جەلال دچۆ دانوستاندنان ل بەغدایێ‌ و پیر خدر ئێدی ڤەنەگەریا مەهەتێ‌ و هەر ژبەر پشكداریا وی یا كارا د سەرهلدانێ‌ و پشتەڤیانیا دۆزا كوردی حكومەتا رژێما گۆر ب گۆر دەست ب سەردا مالا وی ژی دا گرت، ئەز هنگی ب رێیا (پەرتۆكا گوندیاتیێ‌) فێری نڤیسینا كوردی بووم.

پشتی ل سالا 2003ێ‌ عێراق ژ دەستێن رژێما گۆر بگۆر هاتیە ئازادكرن و دەڤەرێن مە ئێزدیان ژی ئازادبووین، و بنگەهێ‌ لالش تایی و نڤیسنگەهـێن خۆ ل هەموو دەڤەرێن ئێزدیان ڤەكرین ئەز هاتمە هەلبژارتن بۆ بەرپرسیارەتیا نڤیسینگەها مەهەتێ‌ و ئەو كار و چالاكیێن مە دكرن گەلەك پێ‌ دلخۆش دبوو هەر گاڤ سەرەدانا مە دكر و بەحسێ‌ ژیانا خۆ دكر ل دەما ل مەهەتێ‌ ژیایی و سەرەدانا وان پیرەمێران و گوندیان ژی دكر ل مەهەتێ‌ یێن سالێن هەشتیان یێن ژیانەك ب هەڤرا دەربازكری،ئەز ل ڤێ‌ داویێ‌ بوومە رۆژنامەڤان و من گەلەك راپۆرت و ڤەكۆلین و گۆتار ل سەر جەژن و هەلكەفتێن ئێزدیان دنڤیسین هەموو پرسیارێن خۆ من ژ پیر خدری دكرن و ب ئەشق و ب كەیفخۆشی بەرسڤێن من د دان و نەخاسمە ل ئەڤێ‌ سالێ‌ من چار گۆتار نڤیسین ل سەر ( قەنتارچی _ بەرەباب _ مرێبا _رەڤاندن) گەلەك هاریكاریا من دكر، من هەم وەك برایێ‌ مەزن تەماشە دكر و هەم وەك رێنشاندەرێ‌ ئۆلا ئێزدیاتیێ‌ و هەم وەك مامۆستا و هەم وەك بەرپرسێ‌ بنگەهێ‌ لالش د هژمارت.

لێ‌ ب مخابنی ڤە ل 15/11/2021ێ‌ د تەمەنێ‌ 69 سالیێ‌ دا وەغەرا داویێ‌ كر و ل گۆرستانا شەمسێ‌ پیرا ل شێخان هاتە ڤەشارتن، و مرنا وی خوسارەتەكا هەرە مەزنە بەلێ‌ ژ مە دئێتە خواستن ئەم رێ‌ یا وی بەرنەدەین و درێژیێ‌ ب گەشەكڕنا ئێزدیاتیێ‌ بدەین و ئەو دروشمێ‌ وی بلند كری (لالش هەردەم كانیەكا زەلالە دهوڕتە د روبوارێ‌ رەوشەنبیریا كوردی دە) بنیاتێ‌ كار و بزاڤ و چالاكیێن مە بت و گیانێ‌ پیر خدر سلێمان ل سەر مە دیدەڤان بت دریغیێ‌ نەكەین و خزمەتكارێ‌ ئێزدیا و ئێزدیاتیێ‌ و كوردایەتیێ‌ و مرۆڤایەتیێ‌ بین.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi