بنگەهێ لالش و خزمەتا چاند و كەلتۆرێ ئێزدیان
سەكڤان شنگالی
ل رێككەفتی(12ی گولانا سالا1993)ێ بنگەهێ لالش یێ رەوشەنبیری و كۆمەلایەتی لژێر دروشمێ(لالش كانیەكا زەلالە دهورتە دروبارێ رەوشەنبیریا كوردی دا)ل باژێرێ دهۆكێ ژلایێ چەندین نڤیسكار و كەسایەتیێن ئێزدی ڤە ب پشتەڤانیا حكومەتا هەرێما كوردستانێ هاتە دامەزراندن،بنگەهێ لالش هەر ژ دەمێ دامەزراندنێ و هەتا رۆژا ئیرۆ ب بەردەوامی خزمەتا چاند و دیرۆكا كوردی ب گشتی و یا ئێزدیان ب تایبەتی كریە و چەندین بابەتێن كەلتۆری یێن جودا جودا وەك دیكۆمێنت پاراستینە و ڤەكۆلین لسەر كرینە،ژلایەكێ دی ڤە بنگەهێ لالش ل وی دەمی پەیدا بوو،ئەو دەمێ بێهنا ئازادیێ كەتی ناڤ پارچەكا كوردستانێ و جڤاكا ئێزدی ژی ب شێوەكی گشتی بەر ب وێ ئازادیێ كەفت،رەنگە هەكە ئەو ئازادی نەبا ئەڤ بنگەهـ ژی نەبوو و چاندا باب و باپیرا یا كەڤنار و دێرین دێ ل بەر مەترسیێن ژناڤچۆنێ با،چنكو وی دەمی دوژمنێن سەردەستێن كوردستانێ هەموو هەولدانێن وان ئەوبوون كو جڤاك و چاند و دیرۆكا كوردی نەهێلن و ژناڤ ببەن،چاند و دیرۆكا جڤاكا ئێزدی ژی بەشەكی هەرە گرنگ یا جڤاكا كوردی پێكدئینت دێ بەر ب ناڤچۆنێ چۆبا،بەلێ بەروڤا ژی وەك د سەری دا مە گۆتی هاتنا بایێ ئازادیێ ل پارچا باشوورێ كوردستانێ ئەڤ چاند و دیرۆكە ژ نەمانێ پاراست، بەلكو بهێزتر گرنگی پێ هاتە دان ژ هەموو لایان ڤە،ژلایەكێ دی ڤە دكارم بێژم كو ژ روویێ چاندی و دیرۆكی ڤە بنگەهێ لالش ل پشتی(رادیۆیا یەریڤانێ و رۆژناما ریا تازە) ل ئێكەتیا سۆفیەتا پێشی و دەولەتا ئەرمەنستانا نهۆ دئێت،ژبۆ خزمەتا جڤاكا كوردی ب گشتی و جڤاكا ئێزدی ب تایبەتی.
تُتاح هذه الصورة أيضا في: کوردی
