شوبات 05, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

نێجیرڤان فوئاد: وه‌لات نه‌ بتنێ دروشمه‌

وه‌لات نه‌ بتنێ دروشمه‌

نێجیرڤان فوئاد

وه‌لات نه‌ بتنێ دروشمه‌، و نه زيده‌كرنا سياسی یه‌ ، و نه‌ گرێدانێت هزری نه‌ …. وه‌لات ئه‌و جهه‌یه‌ كو لێ ژدایك دبن و لسه‌ر دژین و لێ دمرن و نانێ خو لسه‌ر بده‌ستڤه‌ دئینن… ئه‌و جهه‌یه‌ كو باب و باپیرێ مه‌ لسه‌ر مرین و نه‌ڤیێن مه‌ دێ لسه‌ر ژین و ئه‌و جهه‌یه‌ كو ده‌سكه‌فتێت مه‌ لێ كومبوین ، گرێدانا وه‌لاتی ب ره‌هوریشال و ناسنامه‌ و مێژوویێ گه‌له‌ك گرنگتره‌ ژ گرێدان ب سیاسه‌ت و چه‌ند كه‌سان و رازیكرنا وه‌لاتێن جیهانێ سه‌باره‌ت هه‌بونا  وی . سێ تێگه‌هین سه‌ره‌كی هه‌نه‌ دڤێت ئه‌م جیاوازیێ دنافبه‌را وان دا بكه‌ین تا كو ئه‌م گرنگیا وه‌لاتی بدوستی بزانین : یا ئێكی تێگه‌هێ حكومه‌تێ .. یا دووێ تێگه‌هێ ده‌وله‌تێ .. یا سێ تێگه‌هێ وه‌لاتی …

راسته‌ چێدبیت هنده‌ك كه‌س هه‌رسێ تێگه‌هان ب ئێك رامان بكاربینن به‌لێ ب دروستی ژێك جودانه‌

حكومه‌ت ئه‌و جهێ برێڤه‌برنێ یه‌ كو برێكا خه‌لكی یان ئه‌نجومه‌نێن په‌رله‌مانی دهێته‌ دامه‌زراندن بو رێڤه‌برنا كاروبارێن ده‌وله‌تێ

به‌لێ ده‌وله‌ت ئه‌و ناسنامه‌ و پێگه‌هێ مه‌عنه‌وی یه‌ كو چاڤدێریا كاروبارێن وه‌لاتی دكه‌ت و ناسنامه‌ و جوداهییه‌كێ دده‌تێ.

ژبه‌ر ڤێ چه‌ندێ ئه‌م دشێن گازندا ژ حوكمه‌تێ بكه‌ن و داخویانیێن نه‌رازیبونێ لسه‌ر چاوانیا برێڤه‌برنا كاروبارێن وێ بده‌ن ( ژبه‌ر كو لدوماهیێ هه‌ر ئه‌وجهێ رێڤه‌برنێ یه‌ كو دبیت سه‌ركه‌فتنێ یان شكه‌ستنێ بینت د بده‌ستڤه‌ئینانا داخوازیێن وه‌لاتیان دا ). به‌لێ دبه‌رامبه‌ردا چێنابیت ئه‌م لهه‌مبه‌ری ده‌ستهه‌لاتا شه‌رعی براوستین كه‌ نوینه‌ریا ناسناما وه‌لاتی و چاڤدێریا كاروبارێن وه‌لاتیان دكه‌ت و پتریا خه‌لكی دژێ رازیبن.

به‌لێ وه‌لات ئه‌و پێگه‌هێ جوگرافی یه‌ كو نه‌ په‌یوه‌ندی ب سیاسه‌تێڤه‌ ونه‌ ب كه‌سه‌كیڤه‌ كو هه‌بون یان نه‌بونا وی دیاركه‌ت … نه‌ پێدڤی ب دانپێدانا وه‌لاتێ جیهانێ یه‌ ژبه‌ر كو  ئه‌و خه‌لك و كه‌سانێن لسه‌ر دژین دانپێدانێ پێ دكه‌ن و وه‌لات ددلێ وان دا ژین دبت و هه‌ست و سۆزێن وان ئێك دگرت و ناسناما وان پێشدئێخت و ره‌وشه‌مبیریا وان دیاردكه‌ت. په‌یوه‌ندیا كه‌سان ب وه‌لاتێن وانڤه‌ په‌یوه‌ندیه‌كه‌ ره‌هه‌ریشالیه‌ بهیچ شێوه‌كی بدوماهی ناهێت ( خو ئه‌گه‌ر مروڤی ژی بڤێت )  چنكو ئه‌ف په‌یوه‌ندیه‌ هاتییه‌ دیاركرن برێكا جوگرافیا ده‌ڤه‌رێ و مێژوویێ.

ئاریشا مه‌ ل رۆژهه‌لاتا ناڤین ئه‌وه‌ كو خه‌له‌ت تێگه‌هشتنه‌ك هه‌یه‌ دنافبه‌را تێگه‌هێ حكومه‌ت و وه‌لات دا… هنده‌ك كه‌س بێی هیچ دودلیه‌ك دبنه‌ ئه‌گه‌رئ تێكدانا وه‌لاتێ خۆ ژ ئه‌گه‌را نه‌ رێككه‌فتن لگه‌ل حوكمه‌تا خۆ . مرۆڤێن هشیار ئه‌و كه‌سن كو دبیت نه‌درازی بن ژ حكومه‌تا خۆ و هه‌ولده‌ن برێكا هه‌لبژارتنان بگهۆرن به‌لێ حه‌زكرنا وه‌لاتی هه‌ر دمینت تشته‌كێ نه‌گۆر به‌رده‌وام لنك وان.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi