ئه‌یلول 27, 2020

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

حەیدەر عەرەبۆ یوسڤانی:دەمناسین دچلێ‌ زڤستانێ‌ دا

دەمناسین دچلێ‌ زڤستانێ‌ دا
حەیدەر عەرەبۆ یوسڤانی
گەردوون ناسی و شەهرەزایی بوون دكەش و هەوای دا، زانستەك بوو باب و باپیرێن مە ژكەڤن دا گرنگیەكا مەزن پێ‌ دایە و تێدا د شارەزا و پسپۆر بوون،وەكی هەموو مللەتان ژ ڤی زانستی بێ‌ بار نەبووینە و بزاڤكریە كو شارەزایی لسەر وەرزێن سالێ‌ و رۆژێن سالێ‌ پەیدا بكن ،ژبەركو ژیانا وان یا گرێدایی وان رۆژان بوو،ب زانینا كەش و هەوا و ئەو رۆژێن كو دگۆتن ب ( حساب) ن، یان ئەوێن كو دهاتنە هژمارتن ژ رۆژێن سەخت و دژوار ، پێتڤیە وان ب وان رۆژا هەبوو چنكو ل وان رۆژان دچۆنە كاروانیا و ژمال دەرنەددچۆن و دیسان ب هندەك رۆژا د زانی دێ‌ هەتا كەنگی جۆت و كێلێ‌ كن و ئایا دێ‌ دەخلودانێ‌ وان ئێت یان نە؟،دیسان وەختێن باران بارینێ‌ و چلێ‌ زڤستانێ‌ و هاڤینێ‌ و جەژن و هەلكەفتا و كارێ‌ رەز و باخا و هەر تشتەكی گرێدایی ب وەرزێن سالێ‌ ڤە دزانین،هەتا نهۆ ژی حسابدارێ‌ ئێزدی لسەر دەمناسینا ستێر و رۆژ و هەیڤ و كەش و هەوای جەژن و هەلكەفتێن خۆ دیار دكن،دڤی بابەتی دا دێ‌ دەمناسینا چلێ‌ زڤستانێ‌ دەنە دیاركرن،چلێ‌ زڤستانێ‌ كۆكا خێر و بەرەكەتێ‌ درژینتە سەر روویێ‌ عەردی و سەقا عەردی دشكێت و عەرد سست دبت و خێر و بەرەكەت دچتە ناڤدە ،هندی زڤستانە ، سر و سەرما واد كۆكا چلێ‌ زڤستانێ‌ دایە،ئێزدی حسابەكا مەزن بۆ چلێ‌ زڤستانێ‌ د دانێن،ئەڤ هەر چل(40) رۆژنە ژ زڤستانێ‌ بۆ بارینا بەفر و بارانا و هەوایێ‌ سار و سەرمایەكا دژوار بناڤدارە، چلێ‌ زڤستانێ‌ دەست پێ‌ دكت ب هژمارا زاینی ل(25)ی كانوونا ئێكێ‌ هەتا(2)ی سۆباتێ‌ ، و ب هژمارا رۆژهەلاتی ژ (11_12) كانوونا ئێكێ‌ هەتا (20)ی كانوونا دووێ‌ داوی یە،وەكی سەبەقەك ژ قەولێ‌ مەها دیار دكت كو چلێ‌ زڤستانێ‌ دكەفتە هەردوو مەهێن كانوونێ‌ ( كانوونا ئێكێ‌ ، كانوونا دووێ‌ )، و لگۆر قەولێ‌ مەها دەمناسینا چلێ‌ زڤستانێ‌ ب دروستی دیئَتە نیشان دان لێ‌ ب هژمارا رۆژهەلاتی و ئەڤا ل خوارێ‌ سەبەقا قەولی یە:
كانوون دبێژت:
ئەم دوو مەهین پەدشایی كرین خەلات
ل مە دكەڤن چلە و ئەربەعینات
ژ حەدی وی یە ل گەل مە بكەلمت سوبات
و ئەڤ هەر چل رۆژە سارترین رۆژێن سالێ‌ نە
و ل (13)ی كانوونا مەزن ب هژمارا رۆژهەلاتی عەرد دڤێ‌ رۆژێ‌ دا ژ كوژیێ‌ دوور كەتنێ‌ ژ رۆژێ‌ یێ‌ چەرخا زڤرینا خۆ ، بەر ب نێزیكبوونێ‌ ڤە دچت ،لەورا د سەبەقەكا قەولی دا دبێژن:
ل سێزدەی كانوونێ‌ رۆژێ‌ بەرێ‌ خۆ دا هاڤینێ‌
واتایا وێ‌ رۆژ درێژ دبن ، و شەڤ هێدی هێدی كورت دبن ، و رۆژ بەرەف باكوورێ‌ عەردی دچت ل ڤەلڤینە خۆ یا دیار چنكو عەرد دزڤرتە ڤەلڤینا خۆ ل دۆرا رۆژێ‌ ، و ئەڤ ڤەلڤینا ئەم دبینن ل رۆژێ‌ دا ب راستی ڤەلڤینا عەردی یا دروستە ، ل دۆرماندۆری رۆژێ‌ دزڤرت و ئەڤ دیاردە شەڤ كورت دبن و رۆژ درێژ دبن بەردەوامە هەتا (21)ی ئادارێ‌ و شەڤ و رۆژ هندی ئێك دبن ئانكو وەك هەڤ دبن ب دەمی و هەتا چلە ب داوی دئێت (60) خۆلەك دئێتە سەر درێژیا رۆژێ‌.
دناڤ ئێزدیان دا هندەك ژ دیندار و شكەستیێن خودێ‌ لڤان هەر چل(40)رۆژا رۆژیا بۆ خودێ‌ دگرن و ژبەر گهۆرینا سەقا بەرەف گەرماتیێ‌ ڤە ، دكەنە جەژن و دبێژن جەژنا چلێ‌ زڤستانێ‌ ، و پشتی جەژنێ‌ سەرما و سەقا دونیایێ‌ دشكێت ، و هەوایێ‌ زەپوش دێتە گهۆرین و بەرەف گەرماتیێ‌ دچت ،و حسابدار دبێژن:هەر گاڤەكا چلە ب داوی هات(جۆت و كێل) حرام دبت،ئانكو تۆڤ نائێت.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.