تشرینی یه‌كه‌م 18, 2019

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

مەهدی حەسەن موراد:جەژنا چلێ‌ هاڤینێ‌ و رێورەسمێن دئێنە گێران ل لالشا نوورانی 

جەژنا چلێ‌ هاڤینێ‌ و رێورەسمێن دئێنە گێران ل لالشا نوورانی 
مەهدی حەسەن موراد
پشتی چل رۆژیێن چلێ‌ هاڤینێ‌ ب داوی دئێن ل رۆژا داویێ‌ دبتە جەژن ،ئەڤ جەژن ئێك ژ جەژنێن رێورەسمێن وێ‌ ل پەرستگەها لالش دئێتە گێران، هەر بۆ زانین چەندین جەژن ل پەرستگەها لالش دئێنە گیران مینا(جەژنا چلێ‌ زڤستانێ‌،جەژنا چلێ‌ هاڤینێ‌،جەژنا جەمایێ‌)،جەژنا چلێ‌ هاڤینێ‌ ئێك ژڤان جەژنایە ل رۆژا داویێ‌ ژ چلەیی دبتە جەژن و دبێژنێ‌ جەژنا چلێ‌ هاڤینێ‌،ئختیارێ‌ مەرگەهێ‌ و جڤاتا روحانی و دەروێش و شكەستی و زانایێن ئایینی و هەر ئێزدیەكی بڤێت ڤان چل رۆژا ب رۆژی دبت دبێژنە وان چلەگر و دڤیا ئەوێن رۆژیا بگرن ل هێڤارا رۆژیا ئێكێ‌ قەستا پەرستگەها لالش بكن و هندەك ئاخێ‌ ژ چلەخانێ‌ دگەل خۆ هەلگرن،چلێ‌ هاڤینێ‌ ژ(11)ی حوزەیرانێ‌ هەتا(20)ی تیرمەهێ‌ ب هژمارا رۆژهەلاتی و(20)ی تیرمەهێ‌ دبتە جەژن،یانكو(24)ی حوزەیرانێ‌ دەست پێ‌ دكت وهەتا (2)ی تەباخێ‌ ب هژمارا زایینی،ئانكو (40) رۆژن وەكی دیار ئەڤ جەژن ب دەمی ڤە یا گرێدایە دڤان رۆژێن گەرم و درێژ دا زەلامێن ئۆلی و هەر ئێزدیەكی بڤێت چل رۆژیان ژبۆ خودێ‌ دگرت ،یانكو ئەو كەسێ‌ چلێ‌ هاڤینێ‌ ب رۆژی دبت،دبێژنێ‌( چلەگر) درۆژا داویێ‌ دا ژ چلەیی دبتە جەژن هەر بۆ زانین سێ‌ رۆژا ئەڤ جەژن دئێتە گێران ژ (31)ی تیرمەهێ‌ هەتا(2)ی تەباخێ‌ زایینی و هەر ئێزدیەكی بڤێت قەستا پەرستگەها لالشا نوورانی دكت لێ‌ سەردەری و دیندارێن رێورەسمان دگێرن فەرە ب شەڤەكێ‌ بەری گێرانا رێورەسمان ئامادەبن، بڤی ئاوایی رێورەسم دئێنە گێران:
١- ئێزدی قەستا پەرستگەها پیرۆزا لالش دكن گەرەكا د سەر پرا سەلاتێرا دەربازبت و بچتە سەر حەودا كانیا سپی و دەست و چاڤێن خۆ پێ‌ پاك بكت.
٢- هەر ئێزدیەكی بچتە لالشا نوورانی دڤێت كانیا سپی و دەریێ‌ قاپیێ‌ و زمزمێ‌ و سندروكا شیخادی و بەرێ‌ شباكێ‌ و نیشانگەها شێخ فەخر ئختیارێ‌ مەرگەهێ‌ و مەزارگەهێن شێشمس و شێخ و پیرێن خۆ و ل مەزار و نیشانگەهێن خاسا زیارەتی دبن.
٣- ل هەموو هێڤاران سەما تێتە كێشان و چرایێن ئاقد و نیشانگەهێن خاسا دئێنە ڤێخستن و هیڤی و دوعایا دكن.
٤- ل هەموو رۆژان سبەیكا پشتی بەیتا سبێ‌ و هێڤارا بەری بەیتا هێڤاری رێورەسمێن قنتارێ‌ دئێنە گێران .
٥- هەر كەسێ ل ڤێ جەژنێ پشکداربیت خۆ و كەس و كارێن خۆ ب ئاڤا زمزمێ‌ سەلا دكن و كەسێن نە مۆركری ب ئاڤا كانیا سپی دئێتە مۆركرن .
٦- هەموو هێڤارا قەول و بەیت و قەسیدە دئێنە ب رێزكرن و دەف و شبابا لێدخن.
٧- گۆڤەندا دەرێ‌ كانیێ‌ دئێتە گێران .
٨- سەردەریێن خاسا سماتێ‌ چێ‌ دكن
٩- ل رۆژا داویێ‌ ژ جەژنێ‌ تاووس دئێتە جوانكرن و ل گوندا هەر مالەك سەربرەكێ‌ سەر ژێدكن ب ھەلکەفتا ھێ جەژنێ .
هەر بۆ زانین فەرە چلەگر چلێ‌ زڤستانێ‌ ژ(٢٤)ی هەیڤا كانوونا ئێكێ‌ دەست پێ‌ بكت و هەتا (2)ی هەیڤا سباتێ‌ ب هژمارا زایینی،دیسا ل رۆژا(40)ێ‌ دبتە جەژن رێورەسمێن ڤێ‌ جەژنێ‌ هەر وەكی یێن جەژنا چلێ‌ هاڤینێ‌ نە ل پەرستگەها لالش دئێنە گێران…هەر وەكی ڤان سەبەقا ژ ئەدەبێ‌ ئایینێ‌ ئێزدیان دبێژت::
مەلەك فەخرەدین دنگ هلتینە
هنجیێ‌ خاترا من تێ‌ ببینە
دلێ‌ چللەگرە نا ئیشینە
چللەگر ب رۆژینە
فەرزێن خۆ ب جی تینە
ئەون جندیێن سلتینە
ب شەڤ رۆژ ب رۆژینە
ئەوان فتار نینە
ئەو جندیێن سلتان ئێزینە

ژێدەر:
پەرتۆكێن پەروەردا ئێزدیاتیێ
مامۆستایێ‌ ئایینی پیر سەعید پیر بیبۆ و پیر خەلات ئەلیاس

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.