ئایار 23, 2019

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

خالد خدر:بنگەهێ‌ لالش ب دەهان كادرێن رەوشەنبیری و ئیداری و سیاسی بەرهەڤكرینە

بنگەهێ‌ لالش ب دەهان كادرێن رەوشەنبیری و ئیداری و سیاسی بەرهەڤكرینە
خالد خدر
رۆناكبیرێن ئێزدیان بەردەوام كاركرینە ژبۆ گەهاندنا پەیام و دەنگێ‌ مللەتێ‌ خۆ بۆ خەلكێ‌ دی ،و ب رێیا ڤێ‌ پەیامێ‌ روویێ‌ راستەقینەیێ‌ دینێ‌ ئێزدیاتیێ‌ نیشا خەلكێ‌ دی بدەن ، ب تایبەتی دراوسێیێن ئێزدیان،كو بتریا وان تراژیدیێن هاتینە سەرێ‌ ئێزدیان وەك فرمانێن قركرنێ‌ و ژناڤبرنێ‌ ژ ئالیێن وان دراوسێیان ڤە هاتینە ئەنجام دان،ژئالییەكی دی ڤە دینێ‌ ئێزدیان زۆر هاتیە تەشویه كرن ژئالیێ‌ ژمارەكا زۆرا نڤیسەر و دیرۆكناس و گەرۆكێن بیانی ڤە ،بێگۆمان ئەڤ كارێ‌ هەنێ‌ زۆرێ‌ ب زەحمەت بوو نەیێ‌ ئاسان بوو دكەفتە سەر ملێ‌ رۆناكبیر و نڤیسەرێن ئێزدیان،نائێتە ژبیركرن كو تەخا رۆناكبیرا نەیا كەڤنە دناڤا ئێزدیان دا،دكارم بێژم ڤێ‌ تەخێ‌ ل سالێن شێستان و هەفتیان ژ چەرخێ‌ بیستێ‌ سەرهلدایە ،ئەوژی ب هژمارا تلیێن دەستان بوو و وان رۆناكبیرا بەردەوام هەولدایە وان پرۆپاكندە و نەوەیا لسەر ئێزدیان راكن و روویێ‌ پاك وراستێ‌ ئێزدیاتیێ‌ نیشا خەلكێ‌ دی بدەن ،لسەر ڤی بنیاتی ئەوان پێویستی هەبوویە ب یانەكێ‌ یان كۆمەلەكێ‌ یان ژی بنگەهەكی تایبەت ب ئێزدیان ڤە ، كو یی فەرمی و باوەرپێكری بت ژئالیێ‌ جیێن فەرمی ڤە و پەیاما ئێزدیان بگەهینت بەلێ‌ رژێمێن عێراقێ‌ یێن ئێك لپێ‌ ئێك رێگر بووینە و ب تووندی بەرسڤا ڤێ‌ چەندێ‌ داینە و بەردەوام ئاستەنگ و بەربەست بۆ وان دروست كرینە، و ژمارەكا رەوشەنبیر و لاوێن ئێزدیا یێن خەمخۆر هەولدانێن جدی داینە ژبۆ ڤێ‌ مەرەمێ‌ بەلێ‌ دئەنجام دا رژێما عێراقێ‌ یا وی سەردەمی پێكۆلا ژ ناڤبرنا وێ‌ تەخێ‌ كر ب رێیا رەشەكێن خۆ و هندەك ژوان هاتنە گرتن و یێن دی بوونە پەنابەر ل وەلاتێن بیانی و پشتی سەرهلدانا پیرۆزا بەهارا سالا(1991) و پشتی ئازادی بۆ خەلكێ‌ كوردستانێ‌ پەیدابووی و پەرلەمان و حكومەتا كوردستانێ‌ هاتینە دامەزراندن دەرفەت بۆ ئێزدیان هاتە پێش كو بخۆ بنگەهەكی رەوشەنبیری و كۆمەلایەتی بدامەزرینن ئەو بوو ل (12/5/1993)ێ‌ بنگەهێ‌ لالش یێ‌ رەوشەنبیری وكۆمەلایەتی ل باژێرێ‌ دهۆكا داسنیا هاتە دامەزراندن لسەردەستێ‌ كۆمەكا رۆناكبیر و نڤیسەرێن خەمخۆرێن ئێزدیاتیێ‌ ولژێر سیبەرا پەرلەمان وكابینا ئێكێ‌ یا حكومەتا هەرێما كوردستانێ‌،هەروەسا هەژییە بێژین كو دماوێ‌ ڤان سالێن بۆری دا بنگەهێ‌ لالش خزمەتەكا بەرچاڤ ودیار پێشكێشی جڤاكا ئێزدیان كریە ،پشتی ئازادیا عێراقێ‌ ودەڤەرێن ئێزدیان هاتینە ئازادكرن بنگەهێ‌ لالش كارو خەباتا خۆ بەرفرەهتر لێكر كو هەر دەڤەرەكێ‌ تایەكی خۆ یان نڤیسینگەهەكا خۆ لێ‌ دەینان ،بنگەهێ‌ لالش ب دەهان كادرێن رەوشەنبیری و ئیداری و سیاسی بەرهەڤكرینە، زێدەباری رۆژنامەڤانێت زیرەك و چەلەنگ،بنگەهێ‌ لالش ئیرۆ رۆژ وەك دەزگایەكی مەزن لێهاتیە لسەر ئاستێ‌ كوردستانێ‌ خودان سەنگ و ناڤودەنگی یە و ژمارا ئەندامێن وی بتر ب هەزارایە كو هەموو خودان باوەرنامێت بلندن و رەوشەنبیرن و بتریا وا مامۆستا و كادرێن ئیداری نە،ل ڤێدەرێ‌ فەرە بێژین گیانێ‌ وان خەمخۆر و جانگۆریێن ئێزدیاتیێ‌ شادبیت یێن گیانێ‌ خۆ كرینە قوربانی ژپێخەمەتی ئێزدیاتیێ‌ ل درێژاهییا دیرۆكێ‌ و دەستێ‌ وان نڤیسەر و رۆناكبیرا خۆشبن ئەوێن خزمەت كرین ب رێیا قەلەم وپەیڤا خۆ و هەتا نهۆژی هندەك ژوان دبەردەوامن لەسەر خەباتێ‌،یادا دامەزراندنا بنگەهێ‌ لالش پیرۆزبت.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.