ئاب 26, 2019

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

ئەدریسێ‌ سلۆ:6 مین سالیادا وەغەركرنا سەعیدێ‌ سلۆ

6 مین سالیادا وەغەركرنا سەعیدێ‌ سلۆ
ئەدریسێ‌ سلۆ
د رۆژەكا وەكی ئیرۆ دا بەری شەش سالا ل 20/ 5 / 2013ێ‌ و ب ئەگەرێ‌ جەلتا دلی دلێ‌ خودێ‌ ژێ‌ رازی سەعیدێ‌ سلۆ ژ لێدانێ‌ راوەستیا و چۆ بەر دلۆڤانیا خودێ‌ ،سالا 1966 ل گوندێ‌ كەرساف سەر ب ناحیا القوش ڤە هاتیە سەر دونیایێ‌ ژبەر كو بابێ‌ وی پێشمەرگەهێ‌ شۆرەشا ئەیلولێ‌ بویە و رەوشا دەڤەرێ‌ ئالۆز بوویە نەچار بووینە دەربەدەری دەڤەرا بەرواریا بوینە و ل گوندێ‌ بیبۆزی ئاكنجی بوینە و قۆناغا سەرەتای ل قوتابخانا گوندێ‌ كەلێنیێ‌ دەست پێكریە كو ئێك ژ قۆتابخانێن شۆرەشا ئەیلولێ‌ بوویە و ب زمانێ‌ كوردی دهاتە خواندن بەلێ‌ ب تنێ‌ بۆ ماوێ‌ سالەكێ‌ , كو ژ ئەگەرێ‌ پەیمانا رەشا جەزائیر ل سالا 1975 شورەشا ئەیلولێ‌ ب دوماهیك ئینا و خواندنا زمانێ‌ كوردی ل وێدەرێ‌ ب دوماهیك هات , دیسا بەردەوامی دایەخواندنا خۆ یا سەرەتای ل قۆتابخانا خۆرزان و پاشی ل ئامادەیا ئەلقوش یا كوران ول زانینگەها ( المستنصریە ) ل بەغدا باورناما دبلۆم ب كارگێریا گوزاری سالا 1986 وەرگرتیە و دوی دەمێ‌ خواندنا زانكویێ‌ دا د سالێن هەشتیان دا دەستێ‌ خۆ درێژی ناڤ روشەنبیریا كوردی كریە و دەست ب نڤیسینا بابەتێن ل سەر ئۆلا ئێزدیان كریە یەكەم گۆتارا وی ل بیرا من تێت ل سەر بابەتێ‌ ژن ئینان ل ناڤ ئێزدیان ل رۆژناما ( العراق ) كو لاپەرەك ب زمانێ‌ كوردی وەك پاشگۆ بوو , ئەڤە دەستپێكا ژیانا وی یا روشەنبیری بوو و بەردەوامی دایە نڤیسیێ‌ و پشكداری د رۆژنامە و گۆڤارێن وی وەختی دا دكر وەكو گوڤارا هاوكاری و كاروان و بەیان و رۆشەنبیری نوێ‌ ….هتد . سەعیدێ‌ سلۆ هزرەكە نەتەوایەتی و نشتمان پەروەری ل دەف پەیدابویە حەزژێكەرێ‌ سومبولێ‌ نەتەوایەتی و نشتیمانی بوویە مینا ئالایێ‌ كوردستانێ‌ , زمان و پەیڤ و ناڤ و ئەدەبیاتا كوردی و جلوبەرگێن كوردەواری , شینوارێن كوردستانی , جەژن و هەلكەفتێن نەتەوایەتی و نشتیمانی, لەورا پەرتوكەك تایبەت ب ناڤێ‌ ( كوردستان وبەهرا كوردا د رێكەفتنا دا ) دارشتیە , هەر دیسا ژ لایێ‌ ئۆلی ڤە ئێزدیاتی و كوردایەتی وەك دوو پەیڤ هەلگرێن ئێك رامان د زانین و ژهەڤ جودا نە دكرن , ئێزدیاتی ب سەروكانیا هزر و كەلتورێ‌ رەسەنێ‌ كوردی د دانی و د چارچوڤێ‌ كوردایەتیێ‌ دا دهێتە ڤەژاندن و گەشتر دبە . لەورا پەرتوكەك ب ناڤێ‌( ئێزدیاتی و نەتەوا كورد ) نڤیساندیە و پێشكێشی سەرۆكێ‌ هیژا مەسعود بارزانی كریە , و وەها گوتیە ( دیاریە بۆ .. . ئەوێ‌ باوەری بۆ مە پەیداكری … و درێیا نەتەوایەتی دە سەرەدانا پەرستگەها پیرۆزا لالش كری و ئێزدی ب رەسەنترین كورد داینە ناسین سەرۆك و پێشمەرگەی كوردستان مەسعود بارزانی ). ل سالا 2003ێ‌ كو دەڤەرێن ئێزدیا ب تەمامی هاتینە رزگار كرن و بنگەهێ‌ لالش رەه و ریشالێن خوە ل ەڤەرێن ئێزدیان بەلاڤ كرین ئێك ژ دەستەكا بەرهەڤكار یا بنگەهێ‌ لالش تایێ‌ شێخان و بەپرسێ‌ بەشێ‌ رۆشەنبیری بوو ل وی بنگەهی , و ل سالا 2004ێ‌ ـ 2010ێ‌ ل سەر داخوازا دەستەیا بلندا بنگەهێ‌ لالش بوویە ئەندامێ‌ دەستەیا بلندا بنگەهێ‌ لالش و بەرپرسێ‌ بەشێ‌ رۆشەنبیری وسەرنڤیسكارێ‌ رۆژنامەیا دەنگێ‌ لالش , ل سالا 2010 ێ‌ بوویە جێگرێ‌ سەرۆكێ‌ دەستەیا بلندا بنگەهێ‌ لالش و سەرنڤیسەرێ‌ گۆڤارا لالش . ژ پەرتوك و پەلاڤۆكێن سەعیدێ‌ سلۆ ( ئیزدیاتی و نەتەوا كورد , كوردستان وبەرهرا كوردا د رێككەفتنا دا , ئەز نە ئەزم , سێ‌ داستانێن ئەڤینێ‌ ) زێدەباری ب دەهان هەلبەست و گۆتار و سمینار د رۆژنامە و گۆڤار و كۆنگراندا بەلاڤكرینە و خواندینە ئەڤە ژ لایێ‌ رۆشەنبیری ڤە . ژیانا سەعیدێ‌ سلۆ یا سیاسی, ژیانا خودێ‌ ژێ‌ رازی یە پری تراجیدی بوویە هەر ژ زارۆكینیا خۆدا و ژبەر كو گوندێ‌ كەرساف جهەكێ‌ ستراتیجی بوویە بۆ شۆرەشێن كوردی و جهێ‌ كۆمبوون و خرڤەبونێن پێشمەرگەهی بوویە هەردەم دهاتە شەوتاندن و كاڤلكرن و وێرانكرن بەلكی بدەهێن جاران هاتیە وێرانكرن و چۆل كرن ژ لایێ‌ رژێمێن عیراقێ‌ ئێك ل دیف ئێكێ‌, ل سالا 1985 سەعیدێ‌ سلۆ پەیوەندی ب رێزێن رێكخستنا پارتی دیموكراتی كوردستان كریە ل سنورێ‌ ل . ن شێخان و كارێ‌ خوە یێ‌ پارتایەتی د ناڤ ریكخستنێن نهێنی دا ئەنجام دایە . ل بەهارا سالا 1991 سەرهلدانا پیرۆزا گەلێ‌ كوردستانێ‌ پەیوەندی ب رێزێن لەشكرێ‌ كوردستانێ‌ كریە وبوویە پێشمەرگەه , كەسەكێ‌ چالاك و ژیر و ژێهاتی بوویە لەورا چەندین پلە و پوست وەرگرتینە مینا پلە مقدم وەكو بەرپرسێ‌ بەشێ‌ راگەهاندنا سوپایێ‌ 3ێ‌ زێرەڤانی , جهێ‌ باوەریا پارتی و خەلكێ‌ دەڤەرێ‌ بوویە لاورا هاتیە بەربژێر كرن بۆ پوستێ‌ ژمارە ئێك ل سەر لیستا پارتی دیموكراتی كوردستان بۆ ئەنجومەنێ‌ پارێزگەها نەینەوا ل هەلبژارتنێن سالا 2013 یّ لێ‌ ب موخابنی ڤە ژیانا وی دەستور نەدا ب مەهەكێ‌ بەری دەنگدان دەست پێ‌ بكەت ژیانا خۆ ژ دەست دا , سلاڤ بۆ گیانێ‌ پاكێ‌ هەمی ئەوێن كو ژیانا خۆ د شۆرەشا رۆشەنبیری و سیاسی یا گەلێ‌ كوردستانێ‌ دا گیانێ‌ خۆ ژ دەست داین .

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.