بیرەوەریا ساڵڤەگەڕا 30 یا دامەزڕاندنا بنگەهێ لالش ب چەندین چالاكیان هاتە ساخكرن
تۆرا لالش/دهۆك
هێڤاریا ڕۆژا شەمبوویی 13ی گۆلانا 2023،ل هۆلا شێخ شامۆ ل بنگەهێ لالش ل دهۆكێ، ب ئامادەبوونا دلشاد شەهاب نوونەرێ سەرۆكێ هەرێما كوردستانێ و چەندین بەرپرسێن حزبی و حكومی و كەسایەتی و ڕەوشەنبیران،ساڵڤەگەڕا 30 یا دامەزڕاندنا بنگەهێ لالش یێ ڕەوشەنبیری و كۆمەڵایەتی ب چەندین پەنەل و برگێن هەمەرەنگ هاتە ساخكرن.
دڕێورەسمەكێ دا و ب ئامادەبوونا بەرێز “دلشاد شەهاب”نوونەرێ سەرۆكێ هەرێما كوردستانێ و د.”عەلی تەتەر” پارێزگارێ دهۆكێ و بەرێز”كاروان محه‌مه‌د سابر ” ژ نڤیسینگەها سەرۆكێ حكومەتا هەرێما كوردستانێ و وەزیر و پەرلەمانتار و و وەكیل وەزیر و ڕێڤەبەرێن گشتی و ئەندامێن سەركردایەتیا پارتی دیموكراتی كوردستان و ئێكەتی نشتیمانی كوردستان و پارتێن كوردستانی و ئەمیندارا گشتی یا ئەنجوومەنێ بلند یێ ئافرەتان و گەشەپێدانێ و فەرماندێن لەشكەری و ڕێڤەبەر و نوونەرێن دام و دەزگەهێن میری و كەسایەتیێن جڤاكی و ئۆلی و ڕەوشەنبیری و ڕاوێژكارێن پەرلەمانتار و حكومەتێ،ڕێورەسمێن ساخكرنا بیرەوەریا 30ێ یا دامەزراندنا بنگەهێ لالش یێ ڕەوشەنبیری و كۆمەڵایەتی هاتنە گێڕان.
هەر دڕێورەسمان دا پەردە ل سەر پەیكەرێ خودێ ژێرازی(پیر خدر سلێمان)،ئێكەم سەرۆكێ بنگەهێ لالش هاتە ڕاكرن.
ل بەراهیێ وەكو ڕێزگرتن بۆ گیانێ جناگۆریێن كورد و كوردستانێ سەروەرێ وان بارزانیێ نەمر و كاك ئدریسێ جوانەمەرگ،ئامادەبوویی خۆلەكەكێ سەكنین.
لدووڤدا بەرپرسێ ڕاگەهاندنا بنگەهێ لالش “كاروان باعەدری” بخێرهاتنا ئامادەبوویان كر و باڵ كشاندە سەر دامەزڕاندنا بنگەهێ لالش ل سەر دەستێ كۆمەكا خەمخۆرێن ئێزدیان ب پشتەڤانیا حكومەتا هەرێما كوردستانێ هاتە دامەزراندن،دیاركر ژی دامەزڕاندنا بنگەهی وەرچەرخانەكا دیرۆكی بوو دبزاڤا ساخكرنا كەلتۆرێ كوردایەتیێ یێ ڕەسەن ویەك ژ بەرهەمێن خوونا ب هەزاران جانگۆریان بوو،هەر ژ ڕۆژا بنگەهێ لالش هاتیە دامەزڕاندن ل ژێر دروشمێ(لالش كانیەكا زەلالە دهۆرتە درۆبارێ ڕەوشەنبیریا كوردی دا)كاركریە،ژپێناڤ پاراستنا چاند و كەلتۆر و ناسینا ئێزدیان ب جیهانێ ب ئاوایەكی ئەكادیمی وزانستی،هەروەسا بنگەهێ لالش ژ بنگەهەكی بوویە سازیەكا مەزن یا ئۆلی و نەتەوەیی و نشتیمانی ل سەر ئاستێ جیهانێ.
هەروەسا بەرێز”سەعید جردۆ”سەرۆكێ دەستەیا بلندا بنگەهێ لالش پەیڤەك پێشكێشكر و تێدا بخێرهاتنا ئامادەبوویان كر و ب دڕێژی بەحس ل كەد و خەباتا بنگەهێ لالش كر و دیاركر كو دامەزراندنا ڤی بنگەهی پشتی سەرهلدانا پیرۆزا ساڵا1991بوو وەكو یەك ژ بەرهەمێن خوونا ب هەزارەهان جانگۆریان و ب پشتەڤانی و هاریكاریا ڕاستەوخۆ یا مەرجەعێ مللەتێ كورد سەرۆك مەسعود بارزانی و تێكۆشەرێ مەزن مام جەلال بوویە،و ب هێز و هنەر و هزرێن كۆمەكا ڕەوشەنبیرێن ئێزدیان ئەڤ سازیا شارستانی هاتە دامەزراندن و ڕۆژ بۆ ڕۆژێ پێنگاڤێن باشتر هاڤێتن بۆ خۆرتكرنا بزاڤا ڕەوشەنبیری،ڤی بنگەهی خۆ ل بەر چەندین ئاستەنگ و دەلیڤێن تەنگ و قەیرانان گرتیە و بەردەوامی دایە كار و خەباتا خۆ،هەروەسا 9تایی و 26نڤیسینگەهێن خۆ ل سەرانسەری دەڤەرێن ئێزدیان و ل دەرڤەی وەلاتی ژی هەنە.
دبەردەوامیا پەیڤا خۆ دا سەعید جردۆ گۆت:ئەڤ كار و خەباتا بەردەوام یا بنگەهێ لالش ب پشتەڤانیا ڕاستەوخۆ یا حكومەتا هەرێما كوردستانێ و ب تایبەت سەرۆكێ هەرێمێ نێچیرڤان بارزانی و سەرۆكێ حكومەتێ مەسرور بارزانی یە،یەك ژ ئارمانجێن هەرە سەرەكی یێن بنگەهێ لالش خۆرتكرنا گیانێ برایەتی و تفاق و تەباییێ و هەڤدوقەبوولكرنێ دناڤا هەموو پێكهات و ئۆلێن كوردستانێ و عێراقێ دا و ل سەر ئەركێ خۆ یێ پیرۆز دێ دبەردەوامین،دووپاتكر ژی كو سەرباری وەشاندنا چاپەمەنیێن لالش ژ گۆڤار و ڕۆژنامە و پەرتۆك و سایت،ئەو نۆكە كار ل سەر ئینیسكلۆپیدیا نڤیسەرێن ئێزدیان دكەن..
ژلایەكێ دی ڤە د.عەلی تەتەر،پارێزگارێ دهۆكێ دپەیڤەكێ دا پیرۆزباهی ل سەرۆك و ئەندامێن دەستەیا بلند و ئەندام و لایەنگرێن بنگەهی كر ب هەلكەفتا دەربازبوونا 30ساڵان ل سەر دامەزڕاندنا بنگەهێ لالش و دیاركر كو دڤی ماوەی دا بنگەهی بەردەوام خزمەتا زمان و كەلتۆرێ ئێزدیان و هەموو گەلێ كوردستانێ كریە،هەروەسا بەحس ل كار و خزمەتا بنگەهی د دڕێژاهیا ڤان ساڵان دا كر.
ل پێرا میر حازم تەحسین بەگ،میرێ ئێزدیان دپەیڤەكێ دا ساڵڤەگەڕا دامەزڕاندنا بنگەهێ لالش پیرۆزكر و سوپاسیا حكومەتا هەرێما كوردستانێ كر بۆ پشتەڤانیا بەردەوام و بێ ڤەقەتیان بۆ بنگەهێ لالش،كو ئەڤە30ساڵە كار و خەباتێ دكەت بۆ خزمەتكرنا جڤاكا ئێزدیان و سازیەكا گرنگە بۆ هەموو ئێزدیان،هەروەسا ب هەموو هێز و شیانێن خۆ پشتەڤانیا خۆ بۆ ڤی بنگەهی دووپات دكەین بۆ سەرخستنا كارێ وی،كو ڕۆلەكێ دیار و كاریگەر هەیە بۆ دیاركرنا ڕاستیا ئێزدیان و گرێدانا ئێزدیان ب كوردستانا دایك ڤە.
هه‌روه‌سا دكورتە فلمەكی دا دیرۆك و كار و چالاكی و بزاڤێن بنگەهێ لالش دماوێ 30سالێن بۆری دا هاتە نیشاندان.
دپەنەلەكێ دی دا تیپا میرزۆ یا موزیكێ چەند سترانێن تایبەت ب دەڤەرا شنگالێ پێشكێشكرن.
پاشی ڕێز ل ماندیبوون و خەباتا دامەزرێنەر و ئەندام و وان كەسایەتیان هاتەگرتن،یێن دماوێ 30 سالێن بۆری دا خزمەتا بنگەهێ لالش یێ ڕەوشەنبیری و كۆمەلایەتی كرین.
ل داویێ ناڤەندا خانی یا ڕەوشەنبیری و ڕاگەهاندنێ تابلۆیەكا پێكڤەژیانێ پێشكێشی سەرۆكێ بنگەهێ لالش كر و بڤێ یەكێ ڕێورەسمێن ساخكرنا ساڵڤەگەڕا 30 یا دامەزڕاندنا بنگەهێ لالش ب داوی هاتن.
