سەرۆك بارزانی: 40 سال ب سەر ئەڤێ تاوانێدا دەربازبوون، هێشتا هزرا ئازاردانا گەلێ كوردستانێ د هزرا وان دا هەیە
خانى نيوز:
سەرۆك مەسعود بارزانی ئەڤرۆ د سالڤەگەڕا جینۆسایدا بارزانییان پەیامەك بەلاڤكر.
دەقێ پەیاما سەرۆك بارزانی؛
ب ناڤێ خودێ مەزن و دلۆڤان
چل سالان بەری نوكە ڕژێما بەعس د هەوەكا نەچاڤەرێكری و بێوژدانانەدا 8 هزار زەلامێن دانعەمر و گەنجێن بارزانییان، هەر ژ تەمەنێ 9 سالی هەتا 90 سالی دەستەسەركرن و ب شێوەیەكێ نە مرۆڤانە ل بیابانێن باشوورێ عیراقێ كۆمەلكۆژكرن.
ئەڤ تاوانە پشكەك بوو ژ زنجیرا كارەسات و قوربانیدان ب شێوەیەكێ ڕێكخستی ب مەرەما ژناڤبرنا گەلێ كورستانێدا هاتی، هەر د بێسەرۆشینكرنەكێدا 12 هزار گەنجێن فەیلی و ئەنفالا گەرمیان و كیمیابارانكرنا هەلەبجە و بگرە ژدەڤەرێن دی یێن هەرێما كوردستانێ هەتا تەعریب و ڤەگوهاستن و گهۆرینا دیموگرافیا كوردستانێ.
ب لێبورینڤە، د دەمەكیدا چل ب سال ب سەر ئەڤێ تاوانا مەزندا دەربازبوون هێشتا هزرا شۆڤێنی و ئنیەتا نەمان و ئازاردانا گەلێ كوردستانێ د هزرا وان دا هەیە و د ڕەفتارا هندەك كەس و لایەنان دا دبینین، ئەڤە ژی ئاریشەیەكا سەرەكییا مللەتێ مە بوو دگەل ئەوێ عەقلیەتا نەمرۆڤانە كو ژ ژێدەرێ نەهامەتی و نەئارامییێ بۆ هەمی عیراق و دەڤەرێ.
د بیرەوەریا ئەنفالا بارزانییاندا، من پێزانین بۆ نفشێ گەلێ مە ب تایبەت جەماوەرێ دەشتا هەولێر و حەریر و سۆران هەیە كو د ڕۆژێن دژواردا كوردانە و مەردانە هەڤخەمێن بارزانییان بووینە و هاریكارییا وان كریە. سوپاسییا كەسوكارێن ئەنفالكرییان و ب تایبەت وان دایك و ئافرەتێن بارزانی دكەم كو د سالێن دیر و درێژدا بێهینفەرهی ژ بۆ ئازارا ژ دەستدانا خۆشتڤیێن خۆ كرییە و بووینە نموونەیەكا بلند یا خۆڕاگری و ڕەوشتبلندی و كوردپەروەرییێ.
مسعود بارزانی
31ی تیرمەها 2023
