“كۆمپانیێن په‌ترۆلێ ل هه‌رێما كوردستانێ ب سه‌دان فه‌رمانبه‌رێن خۆ ژ كارى دویرخستینه”
گاڤ
كۆمپانیێن په‌ترۆلێ ل هه‌رێما كوردستانێ ژ به‌ر راوه‌ستیانا هنارتنا په‌ترۆلا هه‌رێمێ ب سه‌دان فه‌رمانبه‌رێن خۆ ژكارلاداینه و مه‌زاختیێن خۆ كێمكرینه.
هه‌ر ژ 25ى هه‌یڤا ئادارێ یا بۆرى پشتى بڕیارا ده‌سته‌یا ناڤبژیڤانیێ ل پاریس، هنارتا په‌ترۆلا هه‌رێما كوردستانێ ب رێكا به‌نده‌رێ جیهان یێ توركى راوه‌ستیایه و سه‌ره‌راى رێككه‌فتنا هه‌ولێر و به‌غدایێ ل دۆر بازاركرنا په‌ترۆلا هه‌رێمێ ب رێكا سومۆ، تا نوكه دوباره هنارتن ده‌ستپێنه‌كریه.
كۆمه‌لا APIKUR یا پیشه‌سازیا په‌ترۆلا كوردستانێ كو ژ كۆمپانیێن DNO، گه‌نه‌ل ئێنێرجى، گۆلف كیستۆن پێترۆلیۆم، HKN ئێنێرجى و شاماران پێترۆلیۆم پێكدهێت، كێمكرنا مه‌زاختیێن خۆ ب بڕێ نزیكى 400 ملیۆن دۆلاران د سالا 2023 دا راگه‌هاند هه‌روه‌سا د به‌یانه‌كێ دا ئه‌ڤرۆ پێنجشه‌مبیێ دیاركر كو ئه‌و دویڤچوونا پلانێن خۆ یێن مه‌زاختنێ د سالا 2024 دا دكه‌ن.
كۆمه‌لێ دیار ژى كر “ژ به‌ر نه‌پشتراستبوونێ ژ ژڤانێ دوباره ده‌ستپێكرنا هنارتنا په‌ترۆلێ، ئه‌ندامێن كۆمه‌لێ نه‌چاربووینه هنده‌ك گاڤان بۆ كێمكرنا مه‌زاختیان بهاڤێژن، ئه‌ڤ چه‌نده ژى ب رێكا ژكارلادانا ب سه‌دان كارمه‌ندێن خۆ”.
نزیكى 1700 فه‌رمانبه‌ران د كۆمه‌لا APIKUR دا وه‌لاتیێن هه‌رێما كوردستانێ نه، ئه‌و كۆمه‌ل ژ لایێ كۆمپانیێن په‌ترۆلێ و غازێ یێ جیهانى ل هه‌رێمێ هاتیه دامه‌زراندن.
