سه‌رۆك نێچیرڤان بارزانى به‌رده‌ستكرنا سكۆله‌رشیپێ بۆ ده‌رچوویێن ئێكێ و دوێ و سیێ یێن 12ى ئاماده‌یى دوپاتكر
گاڤ
سه‌رۆكێ هه‌رێما كوردستانێ ئه‌ڤرۆ دوشه‌مبیێ پێشوازى ل ده‌رچوویێن ئێكێ و دوێ و سیێ یێن قووناغا 12ى ئاماده‌یى كر و تێدا به‌رده‌ستكرنا سكۆله‌رشیپێ بۆ وان دوپاتكر.
د به‌یانه‌كا سه‌رۆكاتیا هه‌رێمێ دا هاتیه؛ نێچیرڤان بارزانى سه‌رۆكێ هه‌رێما كوردستانێ پێشوازى ل ده‌رچوویێن ئێكێ و دێ و سیێ یێن ئاماده‌یى ل سه‌ر ئاستێ هه‌رێما كوردستانێ و دایك و باب و كه‌سوكارێن وان كر.
تێدا هاتیه ژى “د دیداره‌كێ دا كو وه‌زیرێ په‌روه‌ردێ یێ هه‌رێما كوردستانێ و ژماره‌یه‌ك ژ به‌رپرسێن وه‌زاره‌تێ تێدا به‌رهه‌ڤ ببوون، سه‌رۆك نێچیرڤان بارزانى په‌یڤه‌ك پێشكێشكر و تێدا ب گه‌رمى پیرۆزباهى ل ده‌رچوویان كر و هیڤیا سه‌ركه‌فتنێ بۆ خواست”.
“سه‌رۆكێ هه‌رێمێ جاره‌كا دى ده‌رچوویێن ئێكێ و دوێ و سیێ ل سه‌ر ئاستێ ئاماده‌یى ل هه‌رێما كوردستانێ ب به‌رده‌ستكرنا سكۆله‌رشیپێ بۆ وان پشتراستكرن دا كو ل زانكۆیێن ناڤخۆ و ده‌رڤه به‌رده‌وامیێ ب خواندنێ بده‌ن و ژ بۆ ڤێ چه‌ندێ وه‌زیرێ په‌روه‌ردێ بۆ كارێ پێدڤى راسپارد”، به‌یانێ زێده كریه.
ژ لایێ خۆڤه، ئالان حه‌مه سه‌عید وه‌زیرێ په‌روه‌ردێ سوپاسیا سه‌رۆكێ هه‌رێما كوردستانێ ژ به‌ر سكۆله‌رشیپ و پشتگیرى و هاندانا قۆتابیان كر.
سه‌رۆك نێچیرڤان بارزانى په‌یامه‌ك ئاراسته‌ى ده‌رچوویان كر و گۆت “پشتراست بن هوین جهێ شانازیێ نه بۆ كوردستانێ ب هه‌مى پێكهاته‌یان ڤه، ئه‌ڤ ئه‌مانه‌ته د ده‌ستێن هه‌وه دایه و ب هه‌مى هێز و شیان و ئه‌مانه‌تێ وه‌ربگرن و به‌ره‌ڤ پێشڤه ببه‌ن”.
سه‌رۆكێ هه‌رێمێ هه‌روه‌سا سوپاسیا وه‌زاره‌تا په‌روه‌ردێ و مامۆستان كر و دیاركر “سوپاسیا مامۆستایان دكه‌ین بۆ ماندیبوونا وان، سوپاسیا وان دكه‌ین د وێ ره‌وشا نه‌خۆشا هه‌یى دا چ جاران نه‌هێلان پرۆسه‌یا خواندنێ بهێته راگرتن”.
