مه‌كته‌یا سیاسییا پارتى دیموكراتى كوردستان راگه‌هاندنه‌ك به‌لاڤكر
خانى نيوز:
مه‌كته‌با سیاسییا پارتى دیموكراتى كوردستان راگه‌هاندنه‌ك سه‌باره‌ت هه‌لبژارتنێن خولا شه‌شێ یا په‌رله‌مانێ كوردستانێ به‌لاڤكر ئه‌ڤه ده‌قێ وێ یه.
سه‌باره‌ت هه‌لویست و بزاڤ وده‌ستپێشخه‌ری ودانوستاندنێن پارتى دیموكراتى كوردستان بو كرنا هه‌لبژارتنێن خولا شه‌شێ یا په‌رله‌مانێ كوردستانێ ل ده‌مێ خوه یێ قانوونى د ئه‌ڤ ساله‌دا ئێدى ده‌م ب هه‌روه نه‌چیت و بۆ رێگرییێ ل وان ئاسته‌نگێن دبه‌رامبه‌ر هه‌لبژارتنان دا ئه‌ڤ خالێن ل خارێ بو رایا گشتى ونافخویی وعیراقى وكۆمه‌لگه‌ها نێڤده‌وله‌تى و نه‌ته‌وه‌یێن ئێكگرتى وهنارتیێن دبلوماسى یێن وه‌لاتان ل هه‌رێما كوردستانێ رووندكه‌ین .
1 – پارتیامه ب كردار و ب باوه‌رییه‌كا كوور ب پروسا دیموكراسى هه‌یه و گه‌ل ب ژێده‌رێ شه‌رعییه‌ت و ده‌ستهه‌لاتێ ب رێكا هه‌لبژارتنێن ئازاد دزانیت، گوتارا سه‌روك بارزانى ل نه‌وروزا 1991 ل كویه كو تێدا جه‌نابێ وى ب ئاشكرایی داخازا دامه‌زراندنا حوكمێ قانون وهه‌لبژارتنێن ئازاد وگوهرینا شه‌رعیه‌تا شوره‌شگێری بو شه‌رعیه‌تا قانوونى بنیاتێ هه‌لویستێ پارتیامه بوویه بۆ هه‌لبژارتنێن په‌رله‌مانێ كوردستانێ كو ب شانازیڤه به‌ری سێ روژان 31 سال سه‌ر ئێكه‌م هه‌لبژارتنێن ئێكه‌م خولا په‌رله‌مانێ كوردستانێ ده‌ربازبوون.
2 – دڤێت هه‌لبژارتنێن خۆلا شه‌شێ یا په‌رله‌مانێ كوردستانێ به‌رى شه‌شێ یازده دوهزاروبیست ودوو هاتبانه كرن، دڤى بیاڤى دا سه‌روكێ هه‌رێما كوردستانێ ب مه‌رسومه‌كێ هه‌رێمى ل سالا 2022ێ به‌رى ب دووماهیك هاتنا ده‌مێ قانوونى یێ په‌رله‌مانى روژا هه‌لبژارتنان دیاركر، فراكسیونا پارتییا مه ل په‌رله‌مانێ كوردستانێ ل روژا 3-11-2021ێ هه‌موو بزاڤێن په‌رله‌مانى و قانوونى یێن خو به‌رچاڤكرن داكو هه‌موو فراكسیون ئاماده‌كارییان بو كاراكرنا كومسیونێ بكه‌ن هه‌ر ژپێخه‌مه‌ت وێ چه‌ندێ كو هه‌لبژارتن ل سالا 2022ێ ده‌مێ خودا بهێنه كرن، پارتییامه‌ره‌زامه‌ندى بو كومسیونێ ب هه‌موو پێكهاتێن خو باوه‌رى پێ دا و دوو پوستێن ڤالا یێن كومسیونێ بهێنه پركرن ب مخابنیڤه فراكسیون نه‌گه‌هشتنه رێككه‌فتنێ و ب نه‌چارى به‌هرا پتر یا فراكسیونان به‌رى 6 -11 -2022ێ ب قانوونا ژماره 12 یا 2020ێ و د روونشتنا په‌رله‌مانى دا قانوونا به‌رده‌وامییا خولا پێنجێ تا 31 ی 12 2023ێ ده‌نگ لسه‌ر هاته دان وهه‌ر دڤێ قانوونێدا ب روونى هاتییه كو پێدڤى یه په‌رله‌مان پێنگاڤان پاڤێت بۆ كرنا هه‌لبژارتنان ل سالا 223ێ ژ پێخه‌مه‌ت هندێ كو 3 – ل 2023ێ هه‌لبژارتن بهێنه‌كرن، دكۆمبوونا 18ى كانوونا دووێ یا 2023ێدا مه‌كته‌با سیاسییا پارتا مه، دراگه‌هاندنا فه‌رمییا كۆمبوونێدا، هه‌لویستێ خوه وه‌سا راگه‌هاند كو پارتییا مه ره‌زامه‌نده هه‌موارا قانوونا هه‌لبژارتنان بهێته‌كرن و داخوازى و پێشنیازێن لایه‌نێن دیژى ل بابه‌تێ فره‌بازنه‌یى، تۆمارا بایۆمه‌ترییا عیراقێ كو هه‌لبژارتنێن 10-10-2021ێ یێن جڤاتا نوونه‌رێن عیراقێ پێ هاتنه‌كرن، مفا ژ ئامارێن عیراقێ بهێته دیتن و ببنه بنه‌مایێن هه‌موارا قانوونا هه‌لبژارتنان، ل هه‌یڤێن 1 و 2 یێن ئه‌ڤ ساله چه‌ندین جاران هه‌ڤالێن مه ل په‌رله‌مانى بزاڤ دكرن روونشتنێن نه ئاسایى بۆ هه‌مواركرنا قانوونا هه‌لبژارتنان و كاراكرنا كۆمسیۆنێ بكه‌ن، لێ ب مخابنیڤه رژده ل ده‌ڤ هنده‌ك لایه‌نێن دى بۆ سازكرنا وان كۆمبوونێن په‌رله‌مانى نه‌هاته‌دیتن.
4 – دگه‌ل ده‌ستپێكرنا وه‌رزێ بهارێ یێ خۆلا پێنجێ ل ئێكى ئادارا 2023ێ، فراكسیۆنا پارتییا مه پێشنیازا قانوونییا هه‌مواركرنا قانوونا هه‌لبژارتنان پێشكێشكر، لێ ب مخابنیڤه رێگرى لێ هندێ هاته‌كرن كو روونشتنا په‌رله‌مانى بۆ خواندنا وێ پێشنیازا قانوونا هه‌لبژارتنان و كاراكرنا كۆمسیۆنێ بهێته‌كرن.
5 – مه‌كته‌با سیاسییا پارتییا مه و هه‌ڤالێن مه ل په‌رله‌مانى د دانوستناندنێن به‌رده‌وامدا دگه‌ل ئێكه‌تییا نیشتیمانییا كوردستانێ و لایه‌نێن دى به‌رده‌وامى د هه‌موو كۆمبوون و دیدارێن سیاسیدا ل ناڤا په‌رله‌مانى و دیدارێن هنارتییێن وه‌لاتان، دووپاتى ل هندێ كر كو پێدڤییه به‌رێز سه‌رۆكا په‌رله‌مانى روونشتنا په‌رله‌مانى بۆ كاراكرنا كۆمسیۆنێ رابگه‌هینیت و خواندنا ئێكێ بۆ هه‌موارا قانوونا هه‌لبژارتنان بهێته‌كرن، كو پێشنیازا پارتى و ئێكه‌تى و گۆرانێ و ئێكگرتۆ و كۆمه‌ل و نه‌وه‌ى نوێ و پشكه‌ك ژ پێكهاته‌یان بوو، لێ ب مخابنیڤه ئه‌و به‌رهه‌ڤییه بۆ راگه‌هاندنا روونشتنێ بۆ بابه‌تێن هه‌لبژارتنان نه‌هاته دیتن.
6 – سەبارەت پێکهاتان، هەر ژ ده‌ستپێكێ هەلویستێ پارتییا مه یێ روون و ئاشکرا بوو، كو هەرێما کوردستانێ نیشتیمانێ هه‌موو رۆلێن وێیه ب جۆداهییا نەتەوە و ئایین و مەزهەب” ده‌رباره‌یی نوونەرێن مه ل پەرلەمانی، ئێکه ژ شانازی یێن مه‌زن یێن گەلێ مە و نابیت پاشڤەکێشان لێ بهێته كرن” بۆ کورسی یێن پێکهاتان بەردەوام مه ته‌كه‌زی ل هندێ كرییه” كو نوونەرێن پێکهاتان ب خۆ بڕیارێ بدەن و هەر جۆرە بڕیاره‌كێ بده‌ن، پارتییا مه دێ پێ رازی بیت. نوونەرێن پێکهاتان د کۆمبوونێن خۆ دا ل گه‌ل یۆنامی و راپۆرتێن یۆنامی ل سەر دیدارێن وان ل گەل پێکهاتان ل هه‌یڤا (2) ی 2023ێ روون و ئاشکرا بوو کو ٩٥٪ یا پێکهاتان دڤێت بۆ هەلبژارتنا نوونەرێن وان، هەرێما کوردستانێ ئێک بازنە بیت” پاشی ل سەر داخوازییا پارتییا مه و ئێكه‌تییێ، سەرۆکاتییا پەرلەمانێ کوردستانێ ب ئامادەبوونا نوونەرێ یۆنامی، ل رۆژا 13ی3ی2023ێ ل ئاڤاهییێ پەرلەمانی ل گەڵ نوونەرێن پێکهاتان کۆمبوویه و لدووڤ نڤێسینا وێ کۆمبوونێ 95٪ یا پێکهاتان ل گەل هندێ بوون بۆ هەلبژارتنا نوونەرێن وان، هەرێما کوردستانێ ئێک بازنە بیت، هنده‌ك ژ وان داخواز كربوو تۆمارا دەنگدەرێن خۆ هەبن و ژ دەنگدانا تایبەت دەنگ ب پێکهاتان نەهێته دان و پارتییا مه زێده‌باری ڕێزگرتنێ ل ئیرادا پێکهاتان، ژ لایێ خۆڤە هەر پێشنیار و سەرنج و گوهۆرینه د شێوەیێ هەلبژارتنان دا هەبیت، دێ پشته‌ڤانییێ لێ كه‌ت.
7 – پارتییا مه یا رژده ل سەر ئەنجامدانا هەلبژارتنێن خولا شەشێ یا پەرلەمانێ کوردستانێ و ژ ڤی لاییڤه رێزدار نێچیرڤان بارزانی سەرۆکێ هەرێما کوردستانێ د هەمان ده‌مدا جێگرێ سەرۆکێ پارتییا مه ب فەرمانا هەرێمی یا ژمارە (90) ل 26-3-2023ێ ئیمزا كر و رۆژا 18ى 11ى2023ێ وەکو رۆژا هەلبژارتنێن خولا شه‌شێ یا پەرلەمانێ کوردستانیێ دیار کر و هەروەسا ژ لایێ رێزدار مسرور بارزانی سەرۆکێ حکومەتا هەرێما کوردستانێ كو د هەمان ده‌مدا جێگرێ سەرۆکێ پارتییا مە ب فەرمانا ژمارە (1472) ل رۆژا 16ی 4ی 2023 ێ، سەرجەم لایەنێن پەیوەندیدار راسپاردن بۆ دابینکرنا پێدڤی یێن هەڵبژارتنێن خولا شەشێ یا پەرلەمانێ کوردستانێ.
8 – پشكا هه‌لبژارتنێن مه‌كته‌با سیاسییا پارتییا مه د هه‌موو كۆمبووناندا دگه‌ل به‌رپرسێن هه‌لبژارتنێن لایه‌نان و بسپۆرێن بوارێ هه‌لبژارتنان ل یۆنامییێ، به‌رده‌وان دووپاتى ل پابه‌ندبوونا كرنا هه‌لبژارتنان ل ئه‌ڤ ساله دكر، دوى بیاڤی ژیدا وه‌كو هه‌لویسته‌كێ روون و ئاشكرا یێ پارتییا مه ل هه‌موو بابه‌تێن گرێداى ب 4 بازنه‌یێ، تۆمارا بایۆمه‌ترییا عیراقێ، ئامارێن عیراقێ بۆ به‌لاڤكرنا كورسییان ب سه‌ر پارێزگه‌هان، هه‌موو پێنگاڤێن پێدڤى هاڤێتن.
نوكه ژى كو كێمتر ژ شه‌ش هه‌یڤان بۆ كرنا هه‌لبژارتنان مایه ل 18-11-2023ێ، پارتییا مه ل سه‌ر هندێ یا رژده كو هه‌موو لایه‌نێن به‌رێز ب كردا، نه‌كو ب تنێ ب داخویانییان، پێنگاڤێن كردارى بۆ سه‌ركه‌ڤتنا هه‌لبژارتنان پاڤێن و ژ وى لایڤه، وه‌كو پارتى دیموكراتى كوردستان دخوازین.
1 – په‌رله‌مانێ كوردستانێ ئه‌ركێ خۆ یێ قانوونى بۆ هه‌مواركرنا قانوونا هه‌لبژارتنان بجهبینیت، هه‌موو پێشنیازێن قانوونى یێن ژلایێ پارتییا مه و لایه‌نێن دى دیڤه هاتینه پێشكێشكرن، بكه‌ڤنه دبه‌رنامه‌یێ كاریدا و خواندنا ئێكێ بۆ بهێته‌كرن، خه‌سله‌تا بله‌ز پێ بهێته‌دان و رێككه‌ڤتنا به‌رپرسێن هه‌لبژارتنان یێن لایه‌نان ل سه‌ر 4 بازنه‌ییێ و تۆمارا بایۆمه‌ترى و بكارئینانا ئامارێن عهیراقێ و حه‌زا پێكهاته‌یان بۆ تۆمارا خۆ یا تایبه‌ت بكه‌نه بنه‌ما بۆ راپۆرتا هه‌ڤپشكا فراكسیۆنان هه‌تا كو خواندنا دووێ بۆ بهێته‌كرن و ب زووترین ده‌م ده‌نگدان ل سه‌ر بهێته‌كرن.
2 – داخوازێ ژ هه‌موو نوونه‌رێن وه‌لاتان و یۆنامییێ دكه‌ین هاریكارییا ئه‌ڤێ پرۆسه‌یێ بكه‌ن و هه‌لویستێ پارتییا مه ل به‌رچاڤێن وان بن و هه‌ر كه‌س و لایه‌نه‌كێ رێگری و ئاسته‌نگان بۆ ئه‌ڤان پێنگاڤان د هه‌لویستێ دژى دیمۆكراسییێ و دژى هه‌لبژارتنان دروست بكه‌ن، بهێنه ئاگه‌هداركرن.
3 –داخوازا مه ژ هه‌موو لایه‌نێن سیاسى و فراكسیۆنێن په‌رله‌مانى ئه‌وه، پشته‌ڤان و هاریكارێن راست و دروست یێن سه‌رخستنا ئه‌ڤێ پرۆسه‌یا دیمۆكراسى بن.
4 – مه ده‌ستخۆشى و پێزانین بۆ بزاڤ و هه‌لویستێن فراكسیۆنا پارتییا مه ل په‌رله‌مانێ كوردستانێ و ده‌سته‌یا سه‌رۆكایه‌تییێ و فراكسیۆنێن دى یێن به‌رێز بۆ ده‌نگدان و كاركرنا كۆمسیۆنا سه‌ربه‌خۆیا هه‌لبژارتنان د روونشتنا ئه‌ڤرۆ 22ى گۆلانا 2025ێدا هه‌نه.
5 – دێ فراكسیۆنا پارتییا خوه ل په‌رله‌مانێ كوردستانێ بۆ به‌رده‌وامییا بجهـ گه‌هاندنا ئه‌ركێ خوه یێ په‌رله‌مانى ب هه‌ماهه‌نگى و هاریكارییا فراكسیۆنێن دى یێن په‌رله‌مانى راسپێرین.
مه‌كته‌یا سیاسى
پارتى دیمۆكراتى كوردستان
22ى گۆلانا 2023ێ
تُتاح هذه الصورة أيضا في: کوردی
