په‌رله‌مانتارێن پارتى ل نه‌ینه‌وا داخوازیه‌ك ژ سوودانى كرن
گاڤ
په‌رله‌مانتارێن پارتى یێن پارێزگه‌ها نه‌ینه‌وا بزاڤێن هنده‌ك لایه‌نان ب تێكدانا ره‌وشا پارێزگه‌هێ ژ لایێ ئه‌منى و جڤاكى ڤه شه‌رمزاركرن و داخوازیه‌ك ژ سه‌رۆكوه‌زیرێ ئیراقێ كرن.
د به‌یانه‌كا په‌رله‌مانتارێن پارتى یێن پارێزگه‌ها نه‌ینه‌وا ئه‌ڤرۆ دوشه‌مبیێ دا هاتیه؛ ل ده‌مه‌كێ كو ره‌وش ل پارێزگه‌ها نه‌ینه‌وا ل سه‌ر هه‌مى ئاستان سه‌قامگیر بوویه و هه‌مى رۆلێ پارتى د پێكئینانا حكومه‌تا ئیراقێ دا و رۆلێ وێ د سه‌قامگیریێ و پێشڤه‌چوونا بوارێن سیاسى، ئه‌منى و خزمه‌تگۆزارى دا ل نه‌ینه‌وا دزانن، هنده‌ك لایه‌ن دیار بووینه كو دڤێن ئاشتیا جڤاكى و ره‌وشا ئه‌منى ل نه‌ینه‌وا تێكبده‌ن.
په‌رله‌مانتارێن پارتى دیار ژى كرن؛ ئه‌و لایه‌نه بزاڤان دكه‌ن ژ بۆ بده‌ستڤه‌ئینانا ئارمانجێن كه‌سۆكى ره‌وشا نه‌ینه‌وا بۆ به‌رێ بڤه‌گه‌ڕینن، ژ وان ژى كه‌سه‌ك ب ناڤێ ’وه‌عه‌د ئه‌لقدو’ یه كو رابوویه ب چاندنا روحا تایفه‌گه‌ریێ دناڤ خه‌لكێ نه‌ینه‌وا دا ب رێكا داخوازا ئه‌نجامدانا خۆنیشاندانێن نه‌یاسایى و گرتنا رێكێن دناڤبه‌را پارێزگه‌ها نه‌ینه‌وا و پارێزگه‌هێن هه‌رێما كوردستانى دا وه‌ك نه‌رازیبوون ل سه‌ر دانانا غه‌زوان حامد شه‌به‌كى وه‌ك رێڤه‌به‌رێ ناوچه‌داریا باشیكێ كو ب رێكه‌كا یاسایى ژ لایێ پارێزگارێ نه‌ینه‌وا ڤه ل گۆره‌ى ئیستیحقاقێن جه‌ماوه‌رى و هه‌لبژارتنان هاتیه دانان.
دیار ژى كرن كو “نوینه‌رێن ده‌شتا نه‌ینه‌وا د جڤاتا نوینه‌ران دا حه‌فت په‌رله‌مانتارن، پێنج ژ وان ژ پارتى دیمۆكراتى كوردستانن و ئه‌ڤه نوینه‌رایه‌تیا دروسته یا كورێن ده‌شتا نه‌ینه‌وا ژ ئه‌نجامێ هه‌لبژارتنێن ڤێ دویماهیێ یێن په‌رله‌مانێ ئیراقێ”.
خۆیا ژى كرن كو غه‌زوان شه‌به‌كى نوینه‌رایه‌تیا كوتایا شه‌به‌كان د جڤاتا پارێزگه‌ها نه‌ینه‌وا دا كربوو.
وان په‌رله‌مانتاران داخواز ژ محه‌مه‌د شیاع سوودانى كرن كو ب له‌ز مایتێكرنێ بۆ ب دویماهیك ئینانا ڤێ چه‌ندێ بكه‌ت.
هه‌ر ژ ده‌مێ دانانا غه‌زوان ئه‌لداودى نوینه‌رێ كوتایا شه‌به‌كان یێ گرێداى پارتى دیمۆكراتى كوردستان وه‌ك رێڤه‌به‌رێ ناوچه‌داریا باشیكێ ژ لایێ نه‌جه‌م جبوورى پارێزگارێ نه‌ینه‌وا ڤه، ئه‌ڤ چه‌نده بوویه جهێ نه‌رازیبوونا وه‌عه‌د ئه‌لقدو په‌رله‌مانتارێ شه‌به‌ك یێ گرێداى چارچووڤه‌یێ هه‌ماهه‌نگیێ كو وى دڤیا كه‌سه‌كێ دى ژ شه‌به‌كان وى پۆستى وه‌ربگریت.
