نێچیرڤان بارزانى: ژ حكومه‌تا ئیراقێ دخوازم دوماهیێ ب فشارێن ل سه‌ر هه‌رێما كوردستانێ بینیت
گاڤ نیوز
سه‌رۆكێ هه‌رێما كوردستانێ جاره‌كا دى داخواز ژ هه‌ر ئێك ژ پارتى دیمۆكراتى كوردستان و ئێكه‌تیا نشتیمانیا كوردستانێ كر، ده‌ستوه‌ردانێن حزبى د كاروبارێن پێشمه‌رگه‌ى دا نه‌كه‌ن و خواست ژى هه‌موو هێزێن پێشمه‌رگه‌ى ل ژێر چه‌تره‌كێ ئێك بگرن و ژ حكومه‌تا ئیراقێ خواست دوماهیێ ب فشارێن ل سه‌ر هه‌رێما كوردستانێ بینیت.
ئه‌ڤرۆ پێنج شه‌مبێ 26-5 سه‌رۆكێ هه‌رێما كوردستانێ، نێچیرڤان بارزانى گۆتارەک ل رێوره‌سمێن ئاهه‌نگا ده‌رچوونا 27مین خۆلا ئه‌كادمیا سه‌ربازى یا زاخۆ پێشكێشکر.
نێچیرڤان بارزانى، سه‌رۆكێ هه‌رێما كوردستانێ خواست، كرستیان، ئێزدى و توركمان ژى پشكدارى خۆلێن سه‌ربازى بن و داخوازكر، ژماره‌یه‌كا زێده‌تر یا كچان پشكدارى خۆلێن سه‌ربازى بن و ل دۆر كولیژا زاخۆ ژى گۆت: كولیژا سه‌ربازى یا زاخۆ ل سه‌ر ئاستێ ئیراقێ ل ئاسته‌كێ بلنده و كولیژا سه‌ربازى یا زاخۆ جهێ گرنگیپێدانا سه‌رۆك بارزانى بوویه.
د یادا بیرئینانا گولانێ ژى دا سه‌رۆك بارزانى دیاركر، 26ى گولانێ بیرئینانا خۆڕاگرێ یه د رۆژه‌كا دژوار دا، زاخۆ و زاخۆیا رۆله‌كێ سه‌ره‌كى و كاریگه‌ر د شۆڕشا گولانێ دا گێڕا و زاخۆ ناڤه‌ندا سه‌ره‌كى یا خه‌باتا پیشمه‌رگه‌ى بوویه.
هه‌ر د گۆتارا خۆ دا سەرۆک نێچیرڤان بارزانی دا، جاره‌كا دى ڤه‌گه‌ڕیا سه‌ر ئێكخستنا هێزێن پێشمه‌رگه‌ى و گۆت: هێزا پێشمه‌رگه‌ى پشكه‌كه ژ سیسته‌مێ به‌رگریا ئیراقێ و بوویه پشكه‌ك ژ هه‌ڤپه‌یمانیا نێڤده‌وله‌تى یا دژى داعشێ و داعش ژى ب مه‌ترسى ناڤكر و دازانین، داعش هێشتا مایه و ل جهێن ناكۆكى ل سه‌ر دبنه ئه‌گه‌رێن خۆرێكسختنێ و داعش مه‌ترسیه ل سه‌ر ئیراق و جیهانێ و بۆ ژناڤبرنا داعشێ پێدڤى ب هاریكاریا پێكڤه هه‌یه، بارزانى دوپاتكر، نوكه ژى داعش خودان هزرا كوشتن و ئاراسته‌یا وێرانكرنێ یه.
ژ ئالیه‌كێ دى ڤه به‌حس ل مه‌شق و راهێنان و هاریكاریا پێشمه‌رگه‌ى كر و خویاكر، دابینكرنا پێدڤیێن پێشمه‌رگه‌ى و مه‌شق و راهێنانان ژ گرنگیانه و پێشمه‌رگه‌ى ب چه‌كێ ساده و خوینا خۆ قه‌هره‌مانى نیشان دایه و نۆكه ژى پێشمه‌رگه‌ى گه‌له‌ك پێدڤى ب هاریكاریا هه‌ڤپه‌یمان و ئیراقێ هه‌یه
ل دۆر ده‌ستوه‌ردانێن حزبى ژى گۆت: ده‌ستوه‌ردانا حزبى مه‌ترسیا دروستبوونا ناكۆکیانه و داخواز ژ پارتى و ئێكه‌تیێ كر ده‌ستوه‌ردانا حزبى د كارێ پێشمه‌رگه‌ى رابگرن و دڤێت هه‌موو هێزا پێشمه‌رگه‌ى بیته ئێك و ئاشكراكر، وه‌لاتێن هه‌ڤپه‌یمان پلان بۆ ئێكخستنا هێزێن پێشمه‌رگه‌ى هه‌یه و خه‌لكێ كوردستانێ داخوازا ئێكخستنا هێزێن پێشمه‌رگه‌ى دكه‌ت.
هه‌روه‌سا سه‌رۆك نێچیرڤان بارزانى د خوازم په‌ڕله‌مانێ كوردستانێ كر ب هویرى چاڤدێریێ ل سه‌ر ئێكخستنا هێزێن پێشمه‌رگه‌ى بكه‌ت.
لدۆر ره‌وشا ناڤخۆ یا هه‌رێمێ و ئیراقێ ژى سه‌رۆكێ هه‌رێما كوردستانێ دبێژیت: خه‌لكێ كوردستانێ ژ ناكۆكیێن حزبان ماندى بووینه و چ كێشه ل هه‌رێمێ نینن بێ روینشتن نه‌هێنه چاره‌كرن و ئاشكراكر، د كۆمبوونێن سلێمانیێ دا مه ئاماده‌یه‌كا باش ژ هه‌موى ئالیان دیتیه و دوهى كۆمبوونه‌كا باش د ناڤا پارتى و ئێكه‌تى هاته كرن.
گۆتژى ئه‌و ب هیڤى یه ب گه‌هینه رێككه‌فتنا باش و ئارامیێ و سه‌قامگێریێ بۆ ملله‌تێ خۆ په‌یدا بكه‌ن و زه‌لالكر: چ كێشه ل هه‌رێمێ نینن بێ روینشتن نه‌هێنه چاره‌كرن، ده‌رباره‌ى ناكۆكیێن ئیراقێ ژى دوپاتكر، ناكۆیێن ئالیێن سیاسى ل ئیراقێ كارتێكرن ل هه‌موى ئالیان كریه و ناكۆكیێن ئالیێن سیاسى ل هه‌رێمێ كێشه‌یێن مه‌زن بۆ ئیراقێ دروست كرینه و دڤێت ئه‌م هه‌موى هاریكار بین بۆ ده‌ربازبوون ژ داخستنا سیاسى و داخستنا سیاسى وه‌سا كریه خه‌لكێ ئیراقێ ب كه‌ڤیته بن باره‌كێ گران.
سه‌رۆك نێچیرڤان بارزانى زێده‌تر دبێژیت: دڤێت هێزێن ئیراقى نه‌رمیه‌كا باشتر همبه‌رى ئێك نیشان بده‌ن و شكاندن و ئێك دو نه‌قه‌بیل كرن دڤێت ب دوماهى بهێت و ژ حكومه‌ت و سازیێن ئیراقێ دكه‌م ب چاڤێ هه‌ڤپشكیێ ته‌ماشه‌ى هه‌رێمێ بكه‌ن و نابیت ئیراق هزر بكه‌ت بێ ده‌ستهه‌لاتكرنا هه‌رێمێ كاره‌كێ باشه و ئه‌گه‌ر ئیراق وه‌لاتیێن هه‌رێمێ ب پشكه‌ك ژ ئیراقێ دزانیت دڤێت ب زویترین ده‌م كێشه‌یان چاره‌یان بكه‌ت.
هه‌روه‌سا ژ حكومه‌تا ئیراقێ خواست دوماهیێ ب فشارێن ل سه‌ر هه‌رێما كوردستانێ بینیت و ده‌لیڤه هه‌یه ژى هه‌موى كێشه ل سه‌ر مێزا دانوستاندنان بهێنه چاره‌كرن و خه‌لكى پێ نه‌خۆشه ناكۆكى د ناڤبه‌را ئیراق و هه‌رێمێ دا هه‌بن.
