سه‌رۆك بارزانى په‌یامه‌ك د 46 سالیا شۆڕشا گولانێ دا به‌لاڤكر
گاڤ نیوز
سه‌رۆك مه‌سعوود بارزانى په‌یامه‌ك ب هه‌لكه‌فتا ل بیرئینانا 46 سالیا شۆڕشا گولانێ به‌لاڤكر و راگه‌هاند، شۆڕشا گولانێ قۆناغه‌كا گرنگا به‌رخودانا پێشمه‌رگه‌ى و گه‌لێ كوردستانێ یه.
مه‌سعوود بارزانى د په‌یاما خۆ دا دیار دكه‌ت، شۆڕشا گولانێ درێژكه‌ر و هه‌لگرا په‌یام و ئارمانجا شۆڕشا مه‌زنا ئیلۆنێ بوو، ئه‌و شۆڕشا سه‌لماندى كو ئه‌گه‌ر د قۆناغه‌كا خه‌باتا گه‌لێ كوردستانێ دا بۆ ده‌مه‌كێ كورت ژى تووشى وه‌ستیان و نسكۆیان هاتبین, به‌لێ ئیراده‌یا تێكۆشین و خه‌باتا گه‌لێ كوردستانێ چ جاران نه‌شكه‌ستیه و ب هه‌ناسه و هێزه‌كا نوى به‌رده‌وام بوویه و گه‌هشتینه ئازادیێ، ئه‌و ئازادیا و ده‌ستكه‌فتێن نوكه هه‌ین ژى به‌رهه‌مێ خوین و قوربانیدانا گه‌لێ مه‌نه د شۆڕشا گولانێ و هه‌موى شۆڕشێن دى دا.
سه‌رۆك بارزانى د په‌یاما خۆ یا د 46 سالیا شۆڕشا گولانێ دا پێزانێن خۆ بۆ هه‌موى تێكوشه‌ر، پێشمه‌رگه، رێكخستنێن ناڤخۆ و وان نشتیمان په‌روه‌ران، فیداركرێن ماندى و ئاواره‌یى هه‌لبژارتى و قوربانى داین هنارتن كو بووینه پشكه‌ك ژ شانازیا گه‌لێ كوردستانێ.
هه‌ر د ڤێ یادێ دا بارزانى سلاڤ بۆ گیانێ ئێكه‌م شه‌هیدێ شۆڕشا گولانێ شه‌هید سه‌ید عه‌بدوللا حاجى ئۆمه‌ران و هه‌موى شه‌هیدێن كورد و كوردستانێ هنارتن و سلاڤ ژى ل خۆڕاگرى و قاره‌مانیا پێشمه‌رگه‌ى كرن كو ب خوین و قوربانیدانا خۆ سه‌رفه‌رازیا ملله‌تێ خۆ ب ده‌ستخستیه.
