” نێچیرڤان بارزانى ده‌ست ب گه‌ڕه‌كا دى یا نێزیككرنا ئالیێن سیاسى دكه‌ت”
گاڤ نیوز
راوێژكارێ سه‌رۆكێ ههرێما كوردستانێ بۆ گاڤ نیوز دا زانین، سه‌رۆك نێچیرڤان بارزانى ده‌ست ب گه‌ڕه‌كا دى یا ل هه‌ڤ نێزیككرنا ئالیێن سیاسى یێن هه‌رێمێ كرى یه و بڕیاره د سه‌ره‌دانا خۆیا سوبه‌هى دا ل سلێمانیێ دگه‌ل كه‌سێن ئێكێ یێن ئالیێن سیاسى یێن هه‌رێمێ كۆم ببیت.
بڕیاره سوبه‌هى سه‌رۆكێ ههرێما كوردستانێ كو فه‌رماندێ گشتى یێ هێزێن چه‌كداره ژی، سه‌ره‌دانا سلێمانیێ بكه‌ت و د رێوره‌سمێن خوله‌كا ئه‌فسه‌رێن كولیژا سه‌ربازییا قه‌لاچولان دا پشكدار ببیت.
دلشاد شه‌هاب شیره‌تكارێ سه‌رۆكێ هه‌رێمێ د داخۆیانیه‌كا تایبه‌ت دا بۆ گاڤ نیوز دا باس ل رۆلێ سه‌رۆكێ هه‌رێمێ د ئاشتبوونا ئالیێن سیاسى یێن هه‌رێمێ و رێكخستنا ناڤمالا كوردى دا كر و گۆت ” سه‌رۆكێ ههرێما كوردستانێ جاره‌كادى بزاڤێن خۆ ئێخستینه گه‌ڕ داكو به‌ستییا نێڤبه‌را ئالیێن سیاسى بشكێنیت و ئاشتبوونا سیاسى به‌رپا بكه‌ت، ئه‌ڤه وێ ئێكێ دیار دكه‌ت كو سه‌رۆكاتیا هه‌رێمێ سیهوانا كۆمكرنا هه‌مى ئالییێن سیاسى یێن هه‌رێمێ یه”.
شیره‌تكارێ سه‌رۆكێ هه‌رێمێ دا زانین ژى، هه‌ر سوبه‌هى پشتى ب داویهاتنا رێوره‌سمێن خولا ئه‌فسه‌رێن كولیژا سه‌ربازیا قه‌لاچولان، بڕیاره سه‌رۆك نێچیرڤان بارزانى دگه‌ل كه‌سێن ئێكێ یێن حزبێن سیاسى ( هه‌ڤسه‌رۆكێ ئێكه‌تى نیشتیمانى كوردستان – باڤل تاله‌بانى، ئه‌میندارێ گشتى یێ یه‌كگرتوویا ئیسلامیا كوردستانێ – سه‌لاحه‌ددین به‌هائه‌ددین و رابه‌رێ كۆمه‌لا دادگه‌ریا كوردستانێ – عه‌لى باپیر) كۆم ببیت و سه‌ره‌دانا بزاڤا گۆڕان ژى بكه‌ت.
