محه‌مه‌د بن زاید سوپاسییا دوستایه‌تى و هه‌ڤسوزییا گه‌لێ كورد دكه‌ت
خانى نيوز:
سه‌رۆكێ هه‌رێما كوردستانێ نێچیرڤان بارزانى و شاندێ دگه‌لدا گه‌هشتنه باژێرێ ئه‌بو ده‌بى یێ پایته‌ختێ ئیماراتێ بۆ پشكداریكرنێ دبه‌هییا سه‌رۆكێ وه‌غه‌ركرى یێ وى وه‌لاتى خه‌لیڤه بن زاید ئال نه‌هیان دا و سه‌ره‌خوشى ل محه‌مه‌د بن زاید كر.
لدووڤ راگه‌هاندا سه‌رۆكایه‌تییا هه‌رێما كوردستانێ، ئه‌ڤرۆ رۆژا دووشه‌مبى 16 گولانا 2022ێ، سه‌رۆكێ هه‌رێما كوردستانێ نێچیرڤان بارزانى گه‌هشته وه‌لاتێ ئیمارات و ژلایێ محه‌مه‌د بن زاید ڤه هاته پێشوازیكرن.
وه‌كو دراگه‌هاندنا سه‌رۆكایه‌تییا هه‌رێمى دا هاتى، سه‌رۆكێ هه‌رێما كوردستانێ پرسه و سه‌ره‌خوشییێن خوه و یێن گه‌لێ كوردستانێ ب محه‌مه‌د بن زاید و بنه‌مالا ئال نه‌هیان و حكومه‌ت و گه‌لێ ئیماراتێ گه‌هاندن، و هه‌ڤخه‌مى و هه‌ڤسوزییێن خوه بۆ وان دیاركرن، و هیڤیى خواستن خودایێ مه‌زن گیانێ خودێ ژێ رازى ب مه‌زنى و دلۆڤانییا خووه شاد بكه‌ت و ئارامی و بهێن فره‌هییێ بده‌ته هه‌موویان.
ژلایێ خوڤه سه‌رۆكێ ئیماراتێ محه‌مه‌د بن زاید ئال نه‌هیان سوپاسى و پێزانینێن خوه و خێزانا خوه و سه‌ركردایه‌تییا وه‌لاتێ خوه ئاراسته‌ى سه‌رۆكێ هه‌رێما كوردستانێ و شاندێ دگه‌لدا بۆ پشكدارییا وان دبه‌هییا خه‌لیڤه بن زایدى دا كرن، و په‌سنا هه‌ڤسوزى و هه‌ڤالینییا هه‌رێما كوردستانێ دگه‌ل گه‌لێ ئیماراتێ كر.
هه‌روه‌سا ب هه‌لكه‌ڤتا هه‌لبژارتنا محه‌مه‌د بن زاید وه‌كو سه‌رۆكێ نوو یێ ئیمارات، سه‌رۆكێ هه‌رێمێ هیڤییا سه‌ركه‌ڤتنێ بۆ خواست.
