سه‌رۆكێ هه‌رێمێ ئه‌ڤرۆ و سوبه دێ ل گه‌ل سه‌رۆكوه‌زير و وه‌زيرێ ده‌رڤه‌يێ بريتانيا كۆم بيت
گاڤ نيوز
بڕياره ئه‌ڤرۆ نێچيرڤان بارزانى، سه‌رۆكێ هه‌رێما كوردستانێ ل گه‌ل وه‌زيرێ ده‌رڤه يێ بريتانيا دۆمینیک راب و سوبه ژى ل گه‌ل سه‌رۆك وه‌زيرێ بريتانيا بۆريس جۆنسۆنی كۆم ببيت.
دوهى سه‌رۆكێ هه‌رێما كوردستانێ ب سه‌ره‌دانه‌كا فه‌رمى گه‌هشته له‌نده‌نا پايته‌ختێ بريتانيا و هاريكارى و هه‌ڤپشكيا ئيراق و هه‌رێمێ ل گه‌ل بريتانيا، شه‌ڕێ دژى تيرۆرێ، ره‌وشا دەڤەرێ و ئاراميا ئيراقێ ب گشتى ل گه‌ل مه‌زنه به‌رپرسێن وى وه‌لاتى به‌حسكرينه و دێ ل رۆژێن بهێت ژى به‌ردواميێ ب وان مژاران و هنده‌كێن دى ژى ده‌ت.
ئه‌ڤرۆ سەرۆک نێچيرڤان بارزانى دێ ل گه‌ل وه‌زيرێ ده‌رڤه يێ بريتانيا، دۆمينيك راب، به‌حسێ په‌يوه‌نديێن هه‌رێمێ و بريتانيا ژ ئاليه‌كى ڤه و په‌يوه‌نديێن هه‌رێم و به‌غدا ژ ئاليه‌كێ دى ڤه و ره‌وشا هه‌رێمى و ناوچێ به‌حس كه‌ت.
سوبه ژى سەرۆک نێچیرڤان بارزانى دێ ل گه‌ل سەرۆکوەزیر بۆريس جۆنسۆنی به‌حسێ مژارا نه‌هێلانا تيرۆرێ و مه‌ترسيێن ل سه‌ر ده‌ڤه‌رێ و رێگيركرنێ ل دوباره سه‌رهه‌لدانا وێ كه‌ت و پرسا هه‌لبژارتنێن بهێت و هاريكاريا بريتانيا بۆ هه‌رێمێ و ئيراقێ و ره‌وشا مرۆڤى ژى ئێك ژ مژارێن كۆمبوونێ يه.
دوهى نێچيرڤان بارزانى، سه‌رۆكێ هه‌رێما كوردستانێ و شاندێ هه‌رێمێ ل گه‌ل گرۆپێ په‌ڕله‌مانتارێن بريتانى یێن دۆستێن كوردان كۆم ببوو و سەرۆک نێچيرڤان بارزانى به‌حسێ پێشهاتێن نها ل هه‌رێما كوردستانێ و ئيراقێ و دەڤەرێ كر و چه‌وانيا چاره‌كرنا كێشه‌يان ژى ئاشكرا كر و دوپاتى ل ئارامى و پاراستنا سه‌قامگێريێ ل ناوچێ كر.
سەرۆک نێچيرڤان بارزانى، دوپاتى ل چاره‌كرنا هه‌مى كێشه‌يان ب رێكا ديالۆگێ ل گه‌ل حكومه‌تا ئيراقێ كر و ئاشكرا كر، كو ل سه‌ر بنه‌مايێ ده‌ستوورى بهێنه چاره‌كرن.
ژ ئاليێ خۆڤه گرۆپێ په‌ڕله‌مانتاران به‌رده‌واميا بزاڤێن خۆ بۆ پشته‌ڤانيا هه‌رێما كوردستانێ و پاراستنا مافێن ده‌ستوورى دوپات كر.
هه‌ر ئێڤاريا دوهى سه‌رۆكێ هه‌رێما كوردستانێ، نێچيرڤان بارزانى ل گه‌ل بێن والاس وه‌زيرێ به‌رگريا بريتانيا كۆم ببوو، پێشهاتێن شه‌ڕێ دژى تيرۆرێ ل ئيراقێ و مه‌ترسيێن سه‌رهه‌لدانا داعشێ گۆتوبێژ کرن و دوپات كر، داعش هيشتا ل سه‌ر ئاسايش و سه‌قامگیريا ئيراقێ و ناوچێ و جيهانێ مه‌ترسيه، بارزانى دوپاتى ل پشته‌ڤانيا كۆمه‌لگه‌ها نێڤده‌وله‌تى بۆ به‌رهنگاربوونا تيرۆرێ كر.
ژ ئاليێ خۆڤه وه‌زيرێ به‌رگريا بريتانيا دوپاتى ل به‌رده‌واميا پشكدارى و ئه‌ركێن هێزێن وه‌لاتێ خۆ د چارچووڤێ هه‌ڤپه‌يمانيا نێوده‌وله‌تى يا دژى داعشێ دا كر و هه‌مى پشته‌ڤانيه‌كا بريتانيا ژى بۆ هەرێما کوردستانێ و ئيراقێ بۆ به‌رهنگاربوونا تيرۆرێ دوپات كر و رۆلێ پێشمه‌رگه‌ى ژى بۆ به‌رهنگاربووونا داعشێ بلند نرخاند.
هه‌ڤده‌م نيچيرڤان بارزانى، سه‌رۆكێ هه‌رێمێ رۆلێ بريتانيا و پشته‌ڤانيا وێ بۆ هەرێمێ و ئیراقێ ل شه‌ڕێ دژى تيرۆرێ و هاريكاريێن سه‌ربازى يێن بريتانيا بلند نرخاندن و هه‌بوونا شيره‌تكاران و مه‌شقدانا هيزێن پێشمه‌رگه‌ى ژى ب گرنگ ناڤ كر.
هه‌روه‌سا سه‌رۆكێ هه‌رێمێ ديار كر، گرنگيا هاريكارى و هه‌ماهه‌نگيا د ناڤبه‌را پێشمه‌رگه‌ى و سوپايێ ئيراقێ دا ب پشته‌ڤانيا هه‌ڤپه‌يمانان بۆ به‌رهنگاربوونا تيرۆر، چاكسازى و ئێكخستنا هێزێن پێشمه‌رگه‌ى ژى ل گه‌ل وه‌زيرێ به‌رگريێ بەحس کرینە.
تُتاح هذه الصورة أيضا في: کوردی
