تشرینی دووه‌م 30, 2022

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

بارزانی ل په‌رله‌مانێ ئه‌ورۆپا: ريفراندۆم بۆ سه‌رخوه‌بوونێ یه‌

بارزانی ل په‌ڕله‌مانێ ئه‌ورۆپا: رێفراندوم بۆ سه‌رخوه‌بوونێ یه‌
WAAR-دهۆك:
سەرۆکێ ھەرێما کوردستانێ گۆتاره‌ک ل په‌ڕله‌مانێ ئه‌ورۆپا پێشکێش کر و تێدا راگەھاند؛ رێفراندوم بۆ سەرخوەبوونێ یە و ئەنجامێن وێ دێ دگەل بەغدا ھێنە گۆتوبێژ کرن و پێدڤییه‌ رێز ل بریارا گه‌لێ كوردستانێ بهێته‌گرتن.
مەسعوود بارزانی سه‌رۆکێ ھه‌رێما کوردستانێ، د گۆتارا خوه‌یا دوهى یا په‌ڕله‌مانێ ئه‌ورۆپا دا، باس ل رێفراندۆما سەرخوەبوونا کوردستانێ و شەڕێ دژی داعشێ و قۆناغا پشتی شەڕی کر، سەرۆک بارزانی گۆت: ب درێژاھییا دیرۆکێ، ھەموو حکومەتێن ئیراقێ، دژایەتییا گەلێ کوردستانێ کرییه‌ و نھا ژی پابەندی دستووری نینن و نابن ژی، لەو گه‌ر نه‌شێین ب ھه‌ڤرا بژین، بلا ھه‌ڤسوویێن باش بین و ئێدی گەلێ کوردستانێ دێ بریارا خوە دەت و پێدڤییه‌ رێز ل بریارا وان بھێتە گرتن.
بارزانی دا زانین: ھەرێما کوردستانێ ژ پێش ھەموو جیھانێ ڤە شەڕێ دژی تیرۆرێ کر و ب سەدان ھزار ئاوارە حەواندن و نھا ژی وەلاتێ پێکڤە ژیانا ھەموو ئۆل و نەتەوەیانە و گەلێ کورد دخوازیت ب سه‌رخوه‌بوونێ شاشییا دگه‌ل وان ھاتییه‌ کرن راستڤه‌بکه‌ن و ئێدی بریارا سەرخوەبوونێ ب تنێ د دەست وان دایە و نابیت خوە ل ھیڤیا پەڕلەمانێ ئیراقێ بگرین، قانوونەکێ بۆ سەرخوەبوونا ھەرێمێ دەربێخن، ژبەرکو نھا ژی ھەمان فەرھەنگا کوشتن و ژناڤبرنا کوردان، ل ئیراقێ دھێتە په‌یرەو کرن.
سەرۆکێ ھەرێما کوردستانێ گۆت ژی: سه‌رخوه‌بوون دێ گەلەک کێشه‌یان چارە که‌ت و بیتە ئەگەرێ ئارامبوونا دەڤەرێ، لەو ژ وەلاتێن ئەورۆپی خواست، پشته‌ڤانێن رێفراندومێ بن و چاڤدێران بھنێرن، ژبەرکو بریارا سه‌رخوەبوونێ گه‌له‌کا قانوونی و رەوایە، دوپاتکر ژی، ئەو ل هیڤیا پشته‌ڤانییا ھەموو وەلاتێن دیمۆکراتن، لێ گەر ئەو پشته‌ڤان نەبن، بلا دژایه‌تیێ ژی نەکەن، ژبەرکو دژایه‌تیکرنا پرسەکا دیمۆکراتی، ل دژی ھەموو پرەنسیپێن دیمۆکراسی و مرۆڤایه‌تى و ئاشتیانەیە.
دەربارەیی شەرێ داعشێ ژی بارزانی گۆت: ب شانازی ڤە، پێشمەرگەی ھەموو جیھانا ئازاد ‌پاراست و ١٥ ھزار تیرۆرستێن داعشێ ل سەر دەستێ پێشمەرگەی ھاتنە کوشتن و تا داعش مابیت، گەلێ کورد ئامادەیە شەڕی ل دژی وان بکەت، ھۆشداری ژی دا گەر ئەگەرێن سەرھلدانا داعشێ نەھێنە ژناڤبرن، دێ رەوشەکا خراپتر ھێتە پێش.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi