شوبات 03, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

شاره‌زایه‌كا جڤاكى:پتریا گه‌نجان حه‌زدكه‌ن ل ته‌مه‌نێ بچووك هه‌ڤژینیێ پێك بینن

شاره‌زایه‌كا جڤاكى:پتریا گه‌نجان حه‌زدكه‌ن ل ته‌مه‌نێ بچووك هه‌ڤژینیێ پێك بینن
تۆڕا لالش یا ڕاگه‌هاندنێ /بێوار حه‌مدى

سه‌رده‌مێ ته‌كنه‌لۆژیایێ به‌رده‌وام به‌ره‌ف پێشكه‌فتن و به‌رفره‌هبوونێ ڤه‌ دچت،گه‌نجێن مه‌ تشتێن هه‌مه‌جۆر دبینن و فێردبن وژیانا خه‌لكێ ژده‌رڤه‌ دبینن هه‌تا كودبت په‌نایێ ببه‌نه‌ به‌ر وێنه‌كى وچاڤ لێ بكه‌ن و بریارا هه‌ڤژینیێ ل سه‌ر ڤى بنه‌مایى بده‌ن،شاره‌زایه‌كا جڤاكى ژى دیار دكه‌ت كو پتریا گه‌نجان حه‌زدكه‌ن ل ته‌مه‌نێ بچووكدا هه‌ڤژینیێ پێك بینن.
چیمه‌ن ره‌شید،شاره‌زایا جڤاكى یه‌ بۆ ده‌نگێ لالش دیاركر،ژبۆ پێكئینانا هه‌ڤژینیێ ته‌مه‌ن زێده‌ ژ سنوورا یێ گرنگه‌،ژبه‌ركو هنده‌ك هه‌ڤژینیێ پێكدئینن چ شاره‌زاى و چ باگره‌وه‌ند دژیانێدا نینه‌ و نه‌فێربووینه‌ هندێ كو سه‌ره‌ده‌ریێ دگه‌ل كێشه‌یان بكه‌ن،له‌ورا تووشى ئاریشێن مه‌زن دبن،به‌لێ به‌روڤاژى ئه‌گه‌ر د ته‌مه‌نه‌كێ گونجاى دابن دێ ئاریشێن وان یێن خێزانى كێمتربن ودێ كارن ل سه‌ر هه‌موو نه‌خۆشى و ئاریشه‌یان زالبن،ژبه‌ر هندێ ته‌مه‌نێ گونجاى گه‌له‌ك یێ گرنگه‌،لدووڤ ئامار وهنده‌ك شاره‌زایان دبێژن ته‌مه‌نێ 18سالى وسه‌ردا یێ گونجایه‌،لێ ب دیتنامن كچ ئه‌گه‌ر بگه‌هته‌ ته‌مه‌نێ 23تا 34سالیئ گه‌له‌ك باشتره‌ وكور ژى 25تا26 گه‌له‌ك یێ گونجایه‌ و پتریا وان كێشه‌یێن دهه‌ڤژینیێ دا دروست دبن ئه‌ون یێن به‌رى ڤان خێزان پێكئینایى.
ل دۆر پێكئینانا هه‌ڤژینیێ دته‌مه‌نێ بچووكدا،وه‌ها دبێژت:ته‌مه‌نێ پێكئینانا هه‌ڤژینیێ ژجڤاكه‌كى بۆ ئێكى دى جیاوازیا خۆ یاهه‌ى یان ژكه‌سه‌كى بۆ كه‌سه‌كێ دى و زێده‌بارى داب ونه‌ریتێن هنده‌ك وه‌لاتان ژێك جودانه‌،بۆ نموونه‌ هنده‌ك حه‌زدكه‌ن ل ته‌مه‌نێ بچووكدا خێزانێ بۆ زارۆیێن خۆ پێكبینن یان كچێن خۆ بده‌نه‌ شوو وهنده‌ك جڤاك ژى هه‌كه‌ سه‌ربه‌خۆ یان ره‌وشه‌نبیرتربن دته‌مه‌نه‌كێ مه‌زنتردا،ژبه‌ركو سه‌رده‌مێ ته‌كنه‌لۆژیایێ و پێشكه‌فتنێ یه‌ گه‌نجێن مه‌ بڤێ رێ چاڤلێكرنێ زۆر دكه‌ن و ژوان فێردبن ودبت چ ژ به‌رپرساتیا خێزانێ نزانت، دته‌مه‌نێ بچووكدا چ كچ بت یان كور كارتێكرنێن گه‌له‌ك خراب یێت هه‌ین چنكو هێشتا هزروبیرێن وان دته‌مام نینن و مێشكێ وان ژى ته‌مام نه‌بوویه‌ و ژلایێ له‌شى ژى ڤه‌ دبت گونجاى نه‌بن و دسه‌رهندێ را دبت خووندنا خۆ ژى ته‌مام نه‌كه‌ن و دیسان نكارن بارێ به‌رپرساتیێ وه‌رگرن وخێزانه‌كێ ئاڤا بكه‌ن،هه‌ڤژینى بتنێ ئه‌و نینه‌ داوه‌ت بێته‌ كرن و وێنه‌ بێنه‌ گرتن،دڤێت هزردڤان تشتا بتنێ دا نه‌ئێته‌كرن و بزانن دێ به‌رپرساتیا وان مه‌زنتر لێ ئێت ودێ نه‌چاربن كاركه‌ن و دبت گه‌له‌ك ده‌لیڤێن ژیانێ ژى ژده‌ستێ خۆ بكه‌ن.


سه‌باره‌ت كیژوان مه‌زنتربت باشتره‌ چیمه‌نێ گۆت:ل دونیایێ هه‌موویێ وبه‌رى نۆكه‌ خه‌لكى دگۆت باشتره‌ زه‌لام ژئافره‌تێ مه‌زنتربت داكو بكارت پتر زالگه‌هیێ ل سه‌ر زارۆكا و خێزانێ بكه‌ت،به‌لێ ئه‌ز نه‌دگه‌ل ڤێ چه‌ندێ مه‌،چنكو ئه‌گه‌ر زه‌لام ژى گه‌له‌ك مه‌زنتربت ئه‌ڤه‌ دبته‌ ئه‌گه‌رێ هندێ كو لێك تێنه‌گه‌هشتن هه‌بت وكچ هێشتا نه‌گه‌هشتیه‌ وى ژى كو هزرێن وان وه‌كى ئێك لێ بێن یان هه‌ڤالێن وان دگه‌لێك ناگونجن وگه‌له‌ك تشتێن دى ژى،دیسان به‌روڤاژى ئه‌گه‌ركچ ژى گه‌له‌ك مه‌زنتربت دێ ئاریشه‌ په‌یدابن بۆ نموونه‌،كه‌سه‌ك داكو مافێ په‌نابه‌ریێ وه‌رگرت ژده‌رڤه‌ دێ رابت كچه‌كا گه‌له‌ك ژخۆ مه‌زنترخازت،ئه‌ڤجا بۆ هه‌ردوو ره‌گه‌زا یا باش نینه‌ ته‌مه‌نێ وان گه‌له‌ك ژێك دووربن،ب دیتنا من هندى جوداهى هه‌بت ژ3تا4سالان زێده‌تر نه‌بت.
چیمه‌نێ دبه‌رده‌وامیا ئاخفتنا خۆدا گۆت:ده‌مێ زه‌لام و ژن دبنه‌ خودان زارۆك و به‌رپرساتیا وان زێده‌تر لێ دئێت دێ شنوو زانن كو ته‌مه‌نێ وان چه‌ند كارتێكرن هه‌بوو،چنكو دبت نكارن به‌رهه‌نگاریا نه‌خۆشیێن ژیانێ بگرن و دبت تووشى گه‌له‌ك ئاریشه‌یان ببن،یان ژى دێ چاڤێ وان مینته‌ ژده‌رڤه‌ و ب تایبه‌ت ده‌مێ ناڤبه‌را وان یاخۆش نه‌بت وئه‌ڤه‌ دێ بارێ ژیانا وان یا هه‌ڤژینیێ خرابتر لێكه‌ت ودێ كارتێكرنێن مه‌زن ل زارۆكێن وان ژى بن ئه‌گه‌ر ره‌وشا مالێ یا ئارام نه‌بت،داخوازێ ژ كچ و كوران دكه‌م به‌رى هه‌ڤژینیێ بریارێن دروست بده‌ن،چنكو هه‌ڤژینى نه‌ كرنا داوه‌تێ و وێنه‌گرتنێ و ل به‌ركرنا جل وبه‌رگێن هه‌ڤژینیێ بتنێ یه‌،به‌لكو به‌رپرسایه‌تى وشاره‌زایى بۆ دڤێت.
ل داویێ دیاركر ژى ل ڤێ داویێ رێژه‌یا به‌ردانێ ژى به‌ره‌ف زێده‌بوونێ یه‌ و ئه‌گه‌رێ سه‌ره‌كى ژى ته‌مه‌نێ وان یێن بچووك و نه‌گونجاینه‌،ئه‌ڤجا ئه‌گه‌ر ره‌وشه‌نبیرى دمالێ دا نه‌بت دێ بریارێن كچ و كوڕا ژى دشاش بن،یا پێتڤیه‌ كچ و كوڕ هه‌ر ژ ده‌ستپێكا ته‌مه‌نێ خۆ بێنه‌ په‌روه‌رده‌كرن ب ساخله‌مى و دروستى،لێ مخابن هه‌تا نۆكه‌ مه‌ دسیسته‌مێن بنه‌ره‌تى دا ئه‌ڤ چه‌نده‌ نینه‌ كو وانێن ره‌وشه‌نبیرى هه‌بن وهنده‌ك ژوان یێن رێڤه‌برنا ڤان كاران ژى دكه‌ن بتنێ هنده‌ك بۆشایا تژی دكه‌ن ونكارن وان ب دروستی فێر بكه‌ن،زۆر یا گرنگه‌ ده‌یك وبابان ژى ره‌وشه‌نبیرى دڤێ چه‌ندێ دا هه‌بت وحكومه‌تێ ژى سه‌نته‌رێن ره‌وشه‌نبیریكرنا كچ و كوران هه‌بن كو خۆلان بۆ ڤه‌كه‌ن وتێبگه‌هینن وسیسته‌مێ برێڤه‌برنا ژیانێ هه‌موویێ فێربكه‌ن،داكو بكارن ژیانه‌كا خۆش و گونجاى بخۆ ب هه‌لبژێرن.
س.س

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi