ئایار 21, 2019

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

فشارا ده‌روونی لسه‌ر قوتابیان ل ده‌مێ ئه‌زموونان  

فشارا ده‌روونی لسه‌ر قوتابیان ل ده‌مێ ئه‌زموونان  
كوردستان تى ڤى:
ن/ سابیرحه‌مه‌د نانه‌كه‌لی

بوونی ترس و دڵه‌ڕاوكێ له‌لایه‌ن قوتابیان له‌ كاتی تاقیكردنه‌وه‌كاندا كاریگه‌ری نێگه‌تیڤانه‌ له‌سه‌ر ده‌روونی دروست ده‌كات ، وه‌ هۆكارێكی سه‌ره‌كیه‌ بۆ دروستبوونی فشاری ده‌روونی، ده‌رئه‌نجامه‌كانیشی بریتین له‌ شڵه‌ژان و تووره‌یی ، هه‌روه‌ها نه‌خه‌وتن و نه‌بوونی ئاره‌زوو بۆ خواردن ، جارجاره‌ش ده‌بێته‌ هۆی سه‌رئێشه‌ و سك ئێشه‌ ، هه‌ندێ جاریش ده‌گاته‌ كاری گریان .

توێژینه‌وه‌كان ده‌ریانخستوه‌ كه‌ فشاری ده‌روونی و ترس و دڵه‌راوكێ و شڵه‌ژان له‌ تاقیكردنه‌وه‌كان كاریگه‌ری نێگه‌تیڤانه‌ له‌سه‌ر ئه‌دای فه‌رمانه‌كانی مێشك دروست ده‌كه‌ن و ده‌بنه‌‌ هۆی لاوازی به‌رگری له‌ش .

به‌ پشتبه‌ستن به‌ توێژینه‌وه‌و ده‌رئه‌نجامی زانستی ، ئه‌و خاڵانه‌ ده‌خه‌ینه‌ ڕوو كه‌ سه‌رچاوه‌ی شڵه‌ژانی ده‌روونی قوتابین ، هه‌ڵبه‌ت چاره‌سه‌رو ڕاستیه‌كانی ئه‌م پرس و باسه‌ش په‌یوه‌سته‌ به‌ قوتابی و تاقیكردنه‌وه‌ شرۆڤه‌ ده‌كه‌ین :

1- ئه‌گه‌ر له‌وه‌ ده‌ترسی كه‌ خوێندووته‌ له‌بیرت ده‌چێت ، پێتده‌ڵێین ئه‌وه‌ له‌ بیركردنێكی كاتیه‌ و له‌كاتی تاقیكردنه‌وه‌كان به‌بیرت دێته‌وه‌، به‌تایبه‌ت ئه‌گه‌ر به‌شێوه‌یه‌كی خوێندبت وتێیگه‌یشتبیت .

2- سه‌باره‌ت به‌ جۆری پرسیارو قورسی پرسیار ، ده‌ڵێین: دوودڵ مه‌به‌ پرسیاره‌كان له‌لایه‌ن كه‌سانی پسپۆر ئاماده‌ده‌كرێن و ره‌چاوی ئاسته‌كانی قوتابیان ده‌كرێت ..

3- – ئه‌گه‌ر هه‌ستده‌كه‌ی ئاماده‌ نیت بۆ تاقیكردنه‌وه‌كان ، ده‌ڵێین: له‌بیرت نه‌چێ تۆ ساڵێكی ته‌واوه‌ هه‌وڵی خۆت ده‌ده‌ی و به‌رده‌وامی و ڕۆژانه‌ ئه‌ركی خۆت جێبه‌جێ كردووه‌ و بابه‌ته‌كانت به‌ته‌واوی خوێندووه‌و تێیگه‌یشتووی ، كه‌واته‌ تۆ ئاماده‌یت . .

4- سه‌باره‌ت به‌ متمانه‌ به‌خۆبوون ، ده‌ڵێین ئه‌مه‌یان خۆت لێی به‌رپرسیاری به‌وه‌ی كه‌ ده‌بێ بزانی تۆ شانبه‌شانی هاوڕێكانت توانای هزری و ژیریت هه‌یه‌ و جیاوازیت نیه‌ له‌گه‌ڵ ئه‌وان و ده‌توانیت سه‌ركه‌وتووبیت.

5- ئه‌گه‌ر هه‌ست ده‌كه‌ی كاتی تاقیكردنه‌وه‌كان كورتن و فریای وه‌لامدانه‌وه‌ی ته‌واوی پرسیاره‌كان ناكه‌ویت ، ده‌ڵێین:كاته‌كه‌ به‌شی ئه‌وه‌ ده‌كات زیاتر له‌ جارێك پرسیاره‌كه‌ بخوێنیته‌وه‌و وه‌ڵامی سه‌رجه‌م پرسیاره‌كانیش بده‌یته‌وه‌ ، به‌ڵام ده‌بێت به‌شێوه‌یه‌ك بێت سه‌ره‌تا وه‌ڵامی پرسیاره‌ ئاسانه‌كان بده‌ره‌وه‌ دواتر ئه‌وانه‌ی كه‌ ده‌یزانی دواتر ئه‌وانه‌ی وه‌ڵامیان كورته‌ دوای ئه‌وانیش پرسیاره‌كانیتر .

6- ئه‌گه‌ر له‌ ركابه‌ری دایت له‌گه‌ل هاوڕێكانت ، ده‌ڵێین : ئه‌وه‌ هۆكارێكه‌ بۆ هه‌وڵی زیاترو ویستی زیاتر بۆ سه‌ركه‌وتن ، وه‌ شتێكی ئاساییه‌ و لایه‌نی پۆزه‌تیڤی هه‌یه‌ و ئامانجه‌كه‌شی به‌ده‌ستهێنانی نمره‌ی به‌رزتره‌ له‌ هاوڕێكانت .

بۆیه‌ پێویست به‌ ترس و دڵه‌ڕاوكێ ناكات و زۆر به‌ ئاسایی وه‌ریبگرن ، به‌و وره‌وه‌ برۆ ناو هۆلی ئه‌زموونه‌كان كه‌ تۆ باشترین وه‌ڵام ده‌ده‌یته‌وه‌ ، بۆیه‌ پێویسته‌ به‌سه‌ر ئه‌و ترس و دڵه‌ڕاوكێیه‌ زاڵ بیت ئه‌گه‌رنا ئه‌و به‌سه‌رتدا زاڵ ده‌بێت .

به‌هیوای سه‌ركه‌وتن و دوارۆژێكی گه‌ش بۆ قوتابیه‌ ئازیزه‌كانمان.

كوردستان تیڤی/ كامران

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.