عەسكەرێ بویك
لالش
ئەجێبا سروشتی لالش
ب شەوقا رۆژێ شوشتیێ لالش
ئەفسانا هەزاران سالان
دەرگەهێ بەهشتێ لالش
نووری توو ژ دۆرا خودێ
پیرۆزی یا هەتا هەتایێ
مالا خولقدارێ ژۆرێن
لسەر دلێ ئەردێی لالش
جهێ چرا و فندانی توو
وارێ شوڕێن گرانی توو
دوعایا كال و باڤێ من
ستوونا ئەرد و ئاسمانی لالش
چێ نەبوویی توو ب شوور و شیر
خەملا تە نەزیڤە و نەزێر
ژ ئاخیێ و ژ ئاڤیێ و ژ بای و ئاگری یی
سوڕا ژۆرینی و سێرا ژێر… لالش
چقاس كەڤنی ئەوقاس ژی نووێ
هێسیرا ڤێ دەورا بێرووی
توو قەدەرا وەلات و گەلێ منی
ئاگرەكی بێ كوزی و دووی لالش!
ستێركی ناڤ تاریا شەڤێیێ
پاقژی_هێنكایا هەویێ
وەلاتێ رۆژێ دا سیمڤولا
هەیتی و نوورا تاڤیێ لالش
وەلاتێ دایكا ئەمینی
قەول و بەیتێ مەیە شرینی
دەف و شبابا و باوەری
زار_زمان زیارەتا گەلێ منی،لالش
ئەجێبا سروشتی لالش
ب شەوقا رۆژێ شوشتیێ لالش
ئەفسانا هەزاران سالان
دەرگەهێ بەهشتێ لالش
