بنگه‌هێ لالش دێ ته‌ڤكوژيا گوندێ كۆچۆ و گرعزێر و سيباشێخدرێ ساخ كه‌ت
تۆرا لالش:
بنگه‌هێ لالش تايێن شنگال و سنوونێ به‌رهه‌ڤيێن ساخكرنا ته‌ڤكوژيا گوندێ كۆچۆ و گرعزێر دكه‌ن و بڤێ هه‌لكه‌فتێ چه‌ند چالاكى دێ ئێنه گێران.
ل سه‌ر ڕاسپارده‌يێن ده‌سته‌يا بلندا بنگه‌هێ لالش،ئيرۆ چارشه‌مبوويێ 9ى ته‌باخا 2023ێ،شانده‌كێ بنگه‌هێ لالش تايێن شنگال و سنوونێ سه‌ره‌دانا كارگێريا كه‌مپا قاديا يا ئاواره‌يان كر و ل گه‌ل ڕێڤه‌به‌رێ كه‌مپێ و كارمه‌ندان كۆمبوون، ب ئاماده‌بوونا خه‌له‌ف ده‌خيل به‌رپرسێ لژنا نافخۆ يا ئاشتى و متۆ متۆ به‌رپرسێ لژنا ئاواره‌يان يا پارتى ديموكراتى كوردستان ل كه‌مپێ.
دڤێ روونشتنێ دا چه‌ند پرسێن گرێدايى ب كه‌مپێ و ئه‌ركێ بنگه‌هێ لالش و به‌رهه‌ڤيێن گێرانا ئاهه‌نگه‌كا ماته‌مينى بۆ ساخكرنا ته‌ڤكوژيا گوندێ كۆچۆ و گرعزێر و سيباشێخدرێ هاتنه گه‌نگه‌شه‌كرن.
ل ڕۆژا 14ى ته‌باخا2007تيرۆرستان ب سێ بارهه‌لگرێن مينرێژكرى هێرشى هه‌ردوو كۆمه‌لگه‌هێن گرعزێر و سيباشێخدرێ ل شنگالێ كرن،دئه‌نجامدا نێزيكى هه‌زار وه‌لاتيێن سڤيل هاتنه كوشتن و برينداركرن.
هه‌ر ديسان ل 15ى ته‌باخا 2014تيرۆرستێن داعش خه‌لكێ گوندێ كۆچۆ بۆ ماوێ پازده ڕۆژان دوورپێچكرن و كۆمكوژى د ده‌رهه‌قێ خه‌لكێ گوندى دا ئه‌نجامدان.
ساڵانه ئێزدى ڤان هه‌ردوو بيره‌وه‌ريێن دلته‌زين ب چه‌ندين چالاكيێن هه‌مه‌جۆر ل بيردئينن.
