ب پشته‌ڤانیا سه‌رۆكێ حكومه‌تا هه‌رێما كوردستانێ ڤیسته‌ڤالا لالش یا ڕه‌وشه‌نبیری یا سالانه هاته گێران
تۆرا لالش/دهۆك
ئيرۆ ٦ێ تیرمەها ٢٠٢٣ێ ب پشته‌ڤانیا رێزدار “مه‌سرور بارزانی” سه‌رۆكێ حكومه‌تا هه‌رێما كوردستانێ و ب ئاماده‌بوونا به‌رێزان ” ماجد سه‌ید سالح” نونه‌رێ پارێزگارێ دهوكێ و “سه‌عید جردۆ” سه‌رۆكێ ده‌سته‌یا بلندا بنگه‌هێ لالش و هژماره‌كا زۆر یا كه‌سایه‌تیێن ئۆلی و لایه‌نێن حزبی و حكومی و له‌شكه‌ری،لژێر دروشمێ( فلكلورێ مه ناڤ و نیشانێ ره‌سه‌نایه‌تیا مه‌یه )ڕێوره‌سمێن ڤیسته‌ڤالا لالش ٢٠٢٣ێ یا ڕه‌وشه‌نبیری ل هۆلا كۆننفرانسان ل زانكۆيا دهۆكێ هاتنه گێران.
ل ده‌ستپێكێ وه‌ك ڕێزگرتن ل سه‌ر گيانێ جانگۆريێن كورد و كوردستانێ و سه‌رۆوه‌رێ وان بارزانيێ نه‌مر و كاك ئدريسێ جوانه‌مه‌رگ و دگه‌ل سرودا ئه‌ى ره‌قيب ئاماده‌بوويى خۆله‌كه‌كێ سه‌كنين و لدووڤدا په‌نه‌لێ ئێكێ يێ ڤيسته‌ڤالێ ل ده‌مژمێر 10:30ى سبێ ده‌ستپێكر و ل به‌راهيێ به‌رێز “سه‌عيد جردۆ”سه‌رۆكێ ده‌سته‌يا بلندا بنگه‌هێ لالش په‌يڤه‌ك پێشكێشكر و بخيرهاتنا ئاماده‌بوويان كر و دياركر كو هه‌ر ژ ده‌ستپێكا دامه‌زراندنا بنگه‌هێ لالش يێ ڕه‌وشه‌نبيرى و كۆمه‌لايه‌تى ل ژێر دروشمێ(لالش كانيه‌كا زه‌لاله دهۆرته درۆبارێ ڕه‌وشه‌نبيريا كوردى دا)،يه‌ك ژ ئارمانجێن سه‌ره‌كى يێن ڤى بنگه‌هى كۆمكرن و ديكيۆمێنتكرنا كه‌لتۆرێ ئێزديان ب گشتى و كار يێ به‌رده‌وامه بۆ قورتالكرنا هه‌ر تشتێ دڤى ئالى دا ژ نه‌مانێ،خوياكر ژى ژبۆ ئه‌نجامدانا ڤێ ڤيسته‌ڤالێ و هه‌موو كار و چالاكيێن بنگه‌هێ لالش ژ ڕۆژا ده‌ستپێكێ و هه‌تا ئيرۆ ئه‌نجامداين ئه‌م سوپاسدار و قه‌ردارێن خوينا هه‌زاره‌ها شه‌هيداينه،ديسان پشته‌ڤانيا بێ سنوور يا سه‌ركردايه‌تيا كوردستانێ و حكومه‌تا هه‌رێما كوردستانێ و ب تايبه‌ت جه‌نابێ سه‌رۆكوه‌زيرێن هه‌رێمێ كاك مه‌سرور بارزانى،هه‌روه‌سا ئه‌م دخوازين ڕۆژ ب ڕۆژ گرنگيدان ب فلكلۆرێ مه زێده‌تر بێته دان.
ل دووڤدا به‌رێز “ماجد سه‌يد صالح”نوونه‌رێ پارێزگارێ دهوكێ بناڤێ به‌رێز ” د.عه‌لی ته‌ته‌ر “پارێزگارێ دهوكێ بخێرهاتنا هه‌موو به‌رپرسێن حكومی و له‌شكه‌ری و لایه‌نێن سیاسی و نونه‌رێن ئاینی و جڤاكی و هه‌موو پێكهاته‌یان كر و گوت:-خۆشحالین ئه‌ڤروكه ب پشته‌ڤانیا رێزدار سه‌رۆكێ حكومه‌تا هه‌رێما كوردستانێ ل پارێزگه‌ها دهوكێ ڤیسته‌ڤالا سالانه یا بنگه‌هێ لالش یێ ره‌وشه‌نبیری و كومه‌لایه‌تی دهێته گێران و ئه‌م ده‌ستخۆشیێ ل ده‌سته‌یا بلندا بنگه‌هێ لالش دكه‌ین،خویایه‌ژی چاند و هۆنه‌ر و فلكلۆر ژ خالێن گرنگێن هه‌ر ملله‌ته‌كینه و دڤی بواریدا حكومه‌تا هه‌رێماكوردستانێ گرنگیه‌كا زۆر پێدایه و جهێ شانازیێ یه ملله‌تێ مه‌یێ ئێزدی پشتی چه‌ندین فه‌رمان و كاودانێن سه‌خت بسه‌ردا هاتین كاریه كه‌لتۆرێ خۆ ب پارێزت هه‌ر ب پشته‌ڤانیا به‌رده‌وام یا حكومه‌تامه و دوپاتی ل سه‌ر وێ یه‌كێ كر وه‌لات یێ مه هه‌مویانه و پێدڤیه پێكڤه پشته‌ڤانێن گوتارا یه‌كگرتی و سێكته‌رێن پێكڤه‌ژیانێ بكه‌ین.
ل پێرا چه‌ند سترانێن فلكلۆرى ژلايێ سترانبێژ ته‌حسين خدر فه‌قير و جه‌لۆ شنگالى ڤه هاتنه پێشكێشكرن و چه‌ند سترانێن فلكلۆرى تێدا گۆتن،پاشى تابلۆيه‌ك ژئاليێ تيپا شاريا يا هۆنه‌رێ مللى ڤه هاته نيشاندان و ڤيسته‌ڤال بتر ب ڕه‌وش و خه‌ملاند.
هه‌ر دپه‌نه‌لێ ئێكێ دا خه‌لاتێ ڤيسته‌ڤالا لالش ب زانايێ ئۆلا ئێزديان” فه‌قير خدر به‌ره‌كات كسو” هاته دان.
پشتى بينڤه‌دانێ ڤيسته‌ڤالا لالش به‌رده‌وامى دا برگێن خۆ يێن هه‌مه‌جۆر و دپه‌نه‌لێ دوويێ دا،كو بنگه‌هێ لالش هه‌رده‌م خۆ ب خودانێ چاند و كه‌لتۆرا خۆ دازنت،ژبه‌ر ڤێ يه‌كێ ژى وان سترانبێژێن وه‌غه‌ركرى يێن خزمه‌تا مۆزيكا ئێزديان كرين ل بيردئينيت،چه‌ند وێنه‌يێن سترانبێژێن وه‌غه‌ركرى ب ڕێيا كورته ڤيديۆيه‌كێ هاتنه نيشاندان.
ژلايه‌كێ دى ڤه چه‌ند ئاوازێن فلكلۆرى ژئاليێ گرۆپێ ئاوازێن مه هاتنه نمايشكرن،پاشى خوارنێن فلكلۆرى يێن ئێزديان و جلۆبه‌رگێن كه‌لتۆرى هاتنه نيشاندان.
هه‌ر دبه‌رده‌واميا په‌نه‌لێ ئێكێ دا چه‌ند سترانێن فلكلۆرى ژلايێ سترانێژان خه‌لۆ شنگالى_مه‌حمود شنگالى_فه‌قير ميرزا_به‌ره‌كات عه‌لى ڤه هاتنه گۆتن.
دبرگه‌يه‌كا ديتر دا فلكلۆرێ ئێزديان ل ئه‌رمه‌نستانێ و ڕۆژئاڤا و باكوور ژلايێ تيتالێ كه‌ره‌مێ سه‌ياد،ڕێڤه‌به‌رێ راديۆيا ئێريڤان،ژ ئه‌رمه‌نستانێ و دكتۆر به‌دران حوكمه‌ت مامۆستايێ زانكۆيا مێردين ب ڕێيا ئاميرێ داتاشۆپێ و ب ڤيديۆ و ێنه هاتنه به‌حسكرن و نيشاندان.
ل دانێ ئێڤارى و دپه‌نه‌لێ دوويێ يێ ڤيسته‌ڤالا لالش دا فلكلۆر و ژين و ژيارا ئێزديێن ڕۆژئاڤا ژلايێ مامۆستا نه‌سيم شه‌مۆ مامۆستايێ زانكۆيا ديجله ڤه هاتنه به‌حسكرن.
هه‌روه‌سا چه‌ند داوه‌تێن فلكلۆرى يێن ده‌ڤه‌را باشيك و به‌حزانێ ژئاليێ تيپا(مدينه الزيتون) ل باشيكێ هاتنه گۆتن و پێشكێشكرن.
دبرگه‌يه‌كا دى دا چه‌ند ديمه‌نێن چاندنێ يێن باب و كالێن ئێزديان هاتنه پيشاندان.
ل داويا په‌نه‌لێ دوويێ دا تيپا شنگال يا فلكلۆرى ڤيسته‌ڤال ب پێشكێشكرنا چه‌ند داوه‌تێن فلكلۆرى بتر ب ڕه‌وش ئێخست و بڤێ چه‌ندێ ڤيسته‌ڤال ب داوى هات.
بۆ زانين ڤيسته‌ڤالا لالش يا ڕه‌وشه‌نبيرى ژلايێ كاروان باعه‌درى به‌رپرسێ ڕاگه‌هاندنا بنگه‌هێ لالش و خانم گولستان شێخ گرۆ ڤه دهاته پێشكێشكرن و ب ڕێڤه‌برن.
