عه‌لى عه‌ونى: هه‌ر گه‌فه‌ك ل سه‌ر ئێزدیان گه‌فه ل سه‌ر ئاسایشا هه‌رێما كوردستانێ
گاڤ
به‌رپرسێ لقێ ئێكێ پارتى دیمۆكراتى كوردستان ل پارێزگه‌ها دهۆكێ راگه‌هاند، هه‌ر جۆره گه‌فه‌ك ل سه‌ر ئێزدیان گه‌فه ل سه‌ر ئاسایشا هه‌رێما كوردستانێ و ئاشكراكر، چ مزگه‌فت ل شنگالێ نه‌هاتینه سۆتن.
عه‌لى عه‌ونى، به‌رپرسێ لقێ ئێك یێ پارتى دیمۆكراتى كوردستان په‌یامه‌ك ل هه‌ژمارا تایبه‌تا خۆ ل تۆرا فێسبۆكى به‌لاڤكریه و دیاركریه، هه‌موو جڤاتا مرۆڤاتیێ دڤێت بۆ كاره‌ساتا سالا 2014ێ یا ب سه‌رێ كوردێن ئێزدى هاتى هه‌ست ب شه‌رمه‌زاریێ بكه‌ت، گۆتژى: خوشك و برایێن ئێزدى پشكه‌ن ژ خوین و گۆشت و هه‌ستێ گه‌ل و جڤاكا كوردستانێ و مافێ وانه كو ئه‌و بهێنه قه‌ره‌بووكرن ژ ئالیێ مادى و مانه‌وى ڤه.
هه‌روه‌سا گۆتژى: هه‌بوونا گرۆپێن جودا جودا ل شنگالێ ئه‌گه‌رێ ئاسایی نه‌بوونا ره‌وشا شنگالێ نه و دڤێت حكومه‌تا ئیراقێ رێزێ ل ئیمزایێن خۆ ل گه‌ل حكومه‌تا هه‌رێما كوردستانێ بگریت و رێككه‌فتنا شنگالێ بجهـ بینیت.
هه‌روه‌سا عه‌لى عه‌ونى گۆتژى: ئه‌و كه‌سێن گه‌فان ل ئێزدیان دكه‌ن دڤێت ب به‌رپرساتی هزر بكه‌ن و باخڤن، نابیت ئاشتیا جڤاكى بهێته هه‌ژاندن و یارى پێ بهێنه كرن، ئاشكراكر ژى، چ مزگه‌فت نه‌هاتینه سۆتن و ئه‌ڤ ده‌نگۆیه بۆ فتنه و تێكدانێ یه.
به‌رپرسێ لقێ ئێك دیاركر ژى، رێبازا پارتى و بارزانى ئه‌و فێركرینه پشته‌ڤانیا ئالیێ بچووكتر و لاوازتر بكه‌ن و شۆرشا كوردى ب شۆڕشا پشته‌ڤان بۆ مه‌زلوومان ناڤكر و گۆت: ئه‌و هێل و رێباز دێ به‌رده‌وام بیت.
