ڕاگه‌هاندنا بنگه‌هێ لالش دقۆناغه‌كا باشدايه
تۆرا لالش/دهۆك
ب مه‌ره‌ما پێشخستنا ڕاگه‌هاندنا بنگه‌هێ لالش،ئيرۆ سێ شه‌مبوويێ 28ى ئادارا 2023،كۆمبوونا پشكا راگه‌هاندنێ ل بنگه‌هێ لالش ل دهۆكێ هاته ئه‌نجام دان و چه‌ند بريارێن نوو هاتن دان.
ب سه‌رپه‌رشتيا به‌رێز “سه‌عيد خودێدا” جێگرێ سه‌رۆكێ ده‌سته‌يا بلندا بنگه‌هێ لالش يێ ڕه‌وشه‌نبيرى و كۆمه‌ڵايه‌تى و ب ئاماده‌بوونا به‌رێز”كاروان باعه‌درى” به‌رپرسێ پشكا ڕاگه‌هاندنێ و به‌رێز “جه‌عفه‌ر سمۆ” سه‌رنڤيسه‌رێ ڕۆژناما ده‌نگێ لالش،كۆمبوونا راگه‌هاندنێ دگه‌ل ستافێ راگه‌هاندنا بنگه‌هێ لالش(ڕۆژناما دەنگێ لالش، تۆڕا لالش، کەناڵێ سەما، بەرنامێ سەما Ktv) هاته ئه‌نجام دان.
ل دەستپێکێ”كاروان باعه‌درى” به‌رپرسێ پشكا ڕاگه‌هاندنێ يا بنگه‌هێ لالش،رۆناهی خستە سەر پشکا راگەهاندنێ و ب تێر تەسەلی ل سەر ڕۆلێ ڕاگه‌هاندنا بنگه‌هى ئاخڤی و چه‌ندين پێشنيار بۆ بتر باشتركرنا كارى ئاراسته‌ى ستافى كرن.
دكۆمبوونێ دا “سه‌عيد خودێدا” جێگرێ سه‌رۆكێ ده‌سته‌يا بلندا بنگه‌هێ لالش ب تێر و ته‌سه‌لى به‌حس ل ڕۆلێ ڕاگه‌هاندنا بنگه‌هێ لالش دقۆناغا نۆكه دا و گرنگيا ڕۆمالكرنا بوويه‌ران و بابه‌تێن گڕێدايى ب بنگه‌هى و جڤاكا ئێزديان ڤه كر و دوپات كر ژى كو پێتڤيه ڕۆژنامه‌ڤان ل گه‌ل بوويه‌ران بن و دبياڤێن جودا جودا خزمه‌تا خه‌لكى و جڤاكا خۆ بكه‌ن.
دئاليه‌كێ دى دا ژ نێزيك ڤه گۆهدارى گله و گازندێن ستافێ ڕاگه‌هاندنا بنگه‌هى بوو،بۆ هندێ خالێن بهێز و لاواز بێنه به‌رچاڤ كرن،هه‌روه‌سا ته‌كه‌ز ل پێگه‌هاندن و پێشخستنا شيانێن ستافى كر،كو ڕاگه‌هاندنا بنگه‌هى بتر ڕۆلێ خۆ ببينت دناڤا جڤاكى دا و پێنگاڤێن باشتر بهاڤێژت ل قۆناغێن داهاتى دا.
هه‌روه‌سا “جه‌عفه‌ر سمۆ”سه‌رنڤيسه‌رێ ڕۆژناما ده‌نگێ لالش ب شێوه‌كى گشتى بەحسێ پێشخستنا رۆژنامێ کر و داخواز ل ستافێ ڕۆژنامێ و ڕاگه‌هاندنێ كر بتر شيانێن خۆ بێخنه كار بۆ سه‌رخستنا ڕاگه‌هاندنا بنگه‌هێ لالش ب شێوه‌كى گشتى.
ل داويا كۆمبوونێ ژى بير و بۆچۆن لێكهاتن گوهارتن و چه‌ند بريارێن نوو بۆ بتر پێشخستن و بهێزكرنا ڕاگه‌هاندنا بنگه‌هێ لالش هاتنه دان.
