ئازار 29, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

ژن سەركردەیە و هەر كارەكێ‌ هەبت دكارت بكەت

ژن سەركردەیە و هەر كارەكێ‌ هەبت دكارت بكەت
تۆرا لالش:
هەر ئافرەتەك ب شێوازەكی دبتە سەركردە چ ب ڕێیا كاركرنێ‌ ژ دەرڤە یان ژی د مالا خۆدا، وەكو یا دیار بتریا ئافرەتێن ئێزدی ب تایبەت یێن ئاوارەیێن شنگالێ‌ یێن زەلامێن خۆ ژ دەست داین، د نۆكەدا بووینە سەركردە بۆ مالێن خۆ و كارینە خێزان و زارۆكێن خۆ خودان بكەن و ب شێوازەكێ‌ باش پەروەردە بكن و هەم ژ دەرڤەی مالێ‌ ژی كاربكەن.
نازك سلێمان،ئافرەتەكا ئاوارەیا شنگالێ‌ یە و بیژنە بۆ رۆژناما دەنگێ‌ لالش دبێژت: هەر ل دەمێ‌ من زەلامێ‌ خۆ ژ دەست دای من دیت بەرپرسایەتیەكا مەزن ل پێشیا منە و ل دەستپێكێ‌ گەلەك نەخۆشی دیتن لێ‌ هەموو بۆمن بوونە هێز، هەروەسا كا چاوا من ئەڤ زارۆكنە ئیناینە دنیایێ‌ لەوما من بریاردا بۆ وان ببمە جیێ‌ دایك و بابان، دیسان ب ڕێیا رێكخراوان چۆمە خۆلێن دروارێ‌ و هێدی هێدی فێربووم و د نۆكەدا دروینگەها خۆ یا تایبەت یا هەی و كارێ‌ مالێ‌ هەموویێ‌ ژی ب ڕێڤەدبەم و من نەهێلا زارۆكێن من ژ قوتابخانێ‌ بێ‌ بەهربن و ئەز ژی گەهشتمە ئارمانجا خۆ، ب دیتنا من ئافرەت ب گشتی دكارت هەر كارەكی هەبت بكەت ئەوژی ب تنێ‌ ئەو باوەریێ‌ بدەتە خۆ، ژبەركو ئافرەتێ‌ ژی هێزەكا مەزن یا هەی و ئەز بخۆ ژی ئێك ژوان بوویمە و من باوەری دایە خۆ.
ڕۆژنامەڤان ناڤین سموقی،دەربارەی ئافرەتێن بیژن بۆ دەنگێ‌ لالش گۆت: وەكو ئەم دبینن د جڤاكێ‌ مەدا گەلەك فەرمان ب سەر مللەتێ‌ مەدا هاتینە و د وان فەرمانان دا گەلەك زەلام هاتینە كوشتن و گەلەك زارۆك مانە دگەل دەیكێن خۆ و وان دەیكان ئەو زارۆك راكرن و پەروەردەكرن و نهۆ ئەو زارۆك هەموو بووینە دكتۆر و ئەندازیار و پۆستێن مەزن بدەستخۆڤە ئیناینە، ئانكو ئەڤە هەموو بۆ هندێ‌ دزڤرت كو ژن سەركردەیە و هەر كارەكێ‌ هەبت دكارت بكەت، هەروەسا ئەو ئافرەتا بكارت مالەكێ‌ ب ڕێڤەببەت و پەروەردە بكەت ئەڤە هەموو سالوخەتێن سەركردەیانە و مە گەلەك نموونە دناڤ جڤاكێ‌ خۆدا هەنە كو بووینە ئافرەتێن سەركردە، ژوانژی (دای شەمێ‌) د نۆكەدا گەلەك ئاریشە دناڤ جڤاكی دا چارەسەركرینە و گەلەك جاری شەر دناڤبەینا دوو مالادا چێبوویە ئێك و دوو كوشتینە هەر دەما دای شەمێ‌ بەشداربووی خەلكی بۆ خاترا وێ‌ گەلەك ڕێزێ‌ لێ‌ دگرن و پێك دئێن و ئەڤە دبتە مەزنترین نموونە د جڤاكێ‌ مەدا.
هەروەسا خۆخێ‌ سەعدو ئافرەتەكا دی یا بیژنە و ئاوارەیا شنگالێ‌ یە،ل ئێك ژ كەمپێن پارێزگەها دهۆكێ‌ دژیت بۆ دەنگێ‌ لالش دیاركر،ل دەمێ‌ هاتنا ڕێكخراوا داعش یا تیرۆرستی ل ٣/٨/٢٠١٤ زەلامێ‌ من دگەل پێنچ زارۆكێن من كەفتنە د دەستێن تیرۆرستان دا و هەتا نۆكە چارەنڤیسێ‌ وان دیارنینە، دگەل هندێ‌ من و چار زارۆكێن خۆ كاری خۆ ژ دەستێ‌ داعش قورتال بكەین و هەتا نۆكە بتنێ‌ ئەز ڕێبەریا مالا خۆ دكەم و زارۆكێن خۆ ب خودان دكەم و گەلەك جاران دەلیڤێن كاری بۆمن ژدەرڤە چێبووینە ڕۆژانە من ژ دەرڤە كار كریە و من بۆ زارۆكێن خۆ كاركریە،هەروەسا تشتەكی نۆرمالە ئافرەت ژ دەرڤەی مالێ‌ ببتە سەركردە و ڕێبەریا هەر كارەكی بكەت چ ژ دەرڤەی مالێ‌ یان ژی دناڤ مالێ‌ دا بت، و یا خویایە دناڤ هەر مالەكێ‌ دا ئافرەت یا زارۆكێن خۆ پەروەردە دكەت و مالەكێ‌ ئاڤا دكەت.
ل سەر هەمان مژارێ‌ سوزان سەفەر،بەرپرسا ڕێكخراوا داك بۆ گەشەپێدانا ژنا ئێزدی،بۆ دەنگێ‌ لالش خویاكر، ب راستی ئەڤ ئافرەتێن بێ‌ زەلام گەلەك ئاریشە و نەخۆشیێن مەزن د ژیانا خۆدا دبینن داكو بكارن ژیانا خۆ بۆرینن، ژبەركو گەلەك جاران جڤاك بۆ وان نەیێ‌ هاریكارە و هەم ژی بەرپرسایەتیا زارۆكێن وان و مالەكێ‌ دكەفتە سەر ملێن وان تایبەت ئەو ئافرەتێن د شەرێ‌ داعش دا زەلامێن خۆ ژدەست داین، ژبەر ڤێ‌ چەندێ‌ مە گەلەك جاران داخواز ژ حكومەتێ‌ كریە بتر دەلیڤێن كاری بۆ وان بێنە دابینكرن و خۆل بۆ وان بێنە ڤەكرن یان هەر كارەكێ‌ ئەو خۆ تێدا بینن بكەن، ئەم گەلەك ژوان ئافرەتان دبینن ئەوێن زەلامێن خۆ ژ دەست داین و بووینە بەرپرسێن مالا خۆ و ب سەرفەرازی و ب سەركەفتیانە كارینە ژیانا خۆ ب ڕێڤەببەن و زارۆكێن خۆ ب پەروەردەیەكا گەلەك باش خودان بكەن.
ل 3/8/2014ڕێكخراوا داعش یا تیرۆرستی هێرش كرە سەر قەزا شنگالێ‌ و خەلكێ‌ وێ‌ كۆمكوژكرن،دئەنجامدا ب دەهان زەلام هاتنە گرتن و كوشتن و ب دەهان ژنێن ئێزدی ژی مانە بیژن و هێشتا هندەك چاڤەرێ‌ ئاشكەراكرنا چارەنڤیسێ‌ زەلامێن خۆ دكەن.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi