پارێزەرەكێ‌ ئێزدی دیاردەیەكا مەترسیدار دناڤا جڤاكا ئێزدیان دا ئاشكەرا دكەت

پارێزەرەكێ‌ ئێزدی دیاردەیەكا مەترسیدار دناڤا جڤاكا ئێزدیان دا ئاشكەرا دكەت
تۆرا لالش:
پارێزەرەكێ‌ ئێزدی ئاشكەراكر كو ڕێژا ژنبەردانێ‌(تەلاق)ل ناڤ جڤاكا ئێزدیان دا زێدەبوویە و ڕۆژانە چەندین حاڵەتێن بەردانێ‌ ل دادگەهێن شنگال و سنوونێ‌ پەیدا دبن،هەروەسا هەیڤانە پتر ژ 10 حالەتان دگەهنە بەر دەستێ‌ پارێزەران و بوویە دیاردەیەكا مەترسیدار ل سەر جڤاكی.
پارێزەر نەعمەت نەواف،بڤی ئاوایی بەحس ل دیاردەیا ژنبەردانێ‌ كر و بۆ دەنگی لالش دبێژت:ژنبەردان(تەلاق) ئێك ژ دیاردێن مەترسیدارە ل ناڤ جڤاكێ‌ ئێزدی كو ئەڤ دیاردە بەرەف زێدەبوونێ‌ دچت ڕۆژانە ل دادگەها و هەیڤانە پتر ژ 10 حالەتێن ژنبەردانێ‌ دئێنە بەر دەستێ‌ پارێزەران و دئێنە تۆماركرن،ئەڤ چەندە بوویە مەترسی ل سەر پرۆسەیا ژن ئینانێ‌، بێگۆمان ئینانا ژنێ‌ و پێكئینانا خێزانێ‌ لڤی دەمی دا جێوازە ژ سەردەمێن بۆری چنكو داخوازیێن خێزانی و جڤاكی ڕۆژ بۆ ڕۆژێ‌ زێدە دبن وئەڤ داخوازی گرێداینە ب مەزاختیێن ڕۆژانە ڤە وكارتێكرنێ‌ ل ژیانا خێزانێ‌ یا ڕۆژانە ب شێوەیەكی گشتی دكەن و ئاریشێن جڤاكی و خێزانی پەیدا دكن،لەوا ئەم دبینین خێزان دبتە پارچە پارچە وجودابوون و بەردان دكەفتە ناڤ هەڤژینان ژن و زەلامی دا،چنكو دیاردا ژنبەردانێ‌‌ فاكتەرێ‌‌ ژناڤچوونا خێزانێ‌‌ یە و ئەڤ چەندە ژی كارتێكرنەكا مەزن ل ژیانا زارۆكێن وان دكەت و دبتە ئەگەرێ‌ وندابوونا مافێ‌ زارۆكا ژ ژ ئاكنجیبوونێ‌ وخودانكرنا وان ومەزاختێن وان یێن ڕۆژانە.
ئەڤی پارێزەر گۆت:تێگەهشتن دخێزانێ‌ دا زۆر یا گرنگە چنكو دژیانا هەڤژینیێ‌‌ دا ئەرك و پوتەدانێن زێدەتر دكەڤن سەر ملێن ژن و زەلامی،لەوما جاران تووشی ئاریشان دبن ل دەسپێكا هەر هەڤژینیەكێ‌ زۆربەیا ئافرەتان تووشی كێشا لێك تێنەگەهشتنێ‌ دبن ل سەر ئافرەتێ‌ زۆر یا گرنگە ڤێ‌ بزانت خۆ دگەل وێ‌ خێزانێ‌ بگونجینت یاكو دگەلدا دژیت ب تایبەت ل دەسپێكا هەڤژینیێ‌،داكو ل پاشەڕۆژێ‌ دا كارتێكرن ل ژیانا خێزانێ‌ نەبت.
دەربارەی ئەگەرێن پەیدابوونا دیاردا ژنبەردانێ‌ نەعمەت نەواف ئاماژەكر،بلندبوونا ڕێژەیا هەژاری وبەلنگازی و لاوازیا بارێ‌ دارایی و نەبوونا دەرفەتێن كاری دبتە ئەگەر پتر دەمێ‌ وان د مالدا ببۆرت و پتر بەحس ل پێتڤیاتیێن خێزانێ‌ بێتە كرن و بارێ‌ دارایی یێ‌ خراب ئەگەرە كو ئەو نكارن وان پێتڤیاتیا دابین بكەن و گەنگەشە دناڤبەرا واندا پەیدا دبت و دبتە ئەگەرێ‌ دروستبوونا ئاریشا،هەروەسا پەیدابوونا یاریێن قومارێ‌ و پێكئینانا ژنێ‌ ل تەمەنەكێ‌ بچووك دا (زواج القاصرات) و بێ‌ تفاقی ل ناڤ ژنێ‌ و زەلامی دا وهەڤژینی دسنێلەیێ‌‌ دا و خیانەتا هەڤژینیێ‌ ژلایێ‌ هەردوو ڕەگەزان ڤە ب تایبەت رەگەزێ‌ مێ‌ و پشتگوه خستنا خێزانێ‌.
ل دۆر چارەسەریا كێشەیا ژنبەردانێ‌ ناڤهاتی ئاشكەراكر،پێتڤیە ل سەر كور و كچێن هەڤژینیێ‌ پێكدئینن تەمەنێ‌‌ وان یێ‌‌ گونجایی بت و پێگەهشتی بت،چنكو سنێلە ب دروستی دژیانا هەڤژینیێ‌‌ ناگەهن وئاریشێن ڤان جۆرە كەسان پترن ژ ئاریشێن گەنجان و نكارن بەرپرسیارەتیا وان ئەرك و ئاریشا بكەن،هەروەسا چارەسەری ب رێیا ڤەكرنا خۆلێن فێركرنێ‌‌ و تێگەهشتنێ‌‌ ل دۆر ئەرك و ماف و ئازادیا دناڤبەرا بەرا ژنێ‌‌ و زەلامی دا.