شوبات 08, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

هەتا داویا ئیسالە چەندین ڕێكخراو دێ‌ كارێ‌ خۆ ل كەمپان راوەستینن

هەتا داویا ئیسالە چەندین ڕێكخراو دێ‌ كارێ‌ خۆ ل كەمپان راوەستینن

تۆرا لالش:
رۆژ بۆ رۆژێ‌ رەوشا ئاواریێن شنگال ل كەمپان و ژ دەرڤەی كەمپان دا خرابتر دبت و خزمەتگۆزاری كێم دبن و ڕۆل و كارێ‌ ڕێكخراوان پتر لاواز دبت و بەرەف كێمیێ‌ دچت و ل داویا ئیسالە چەندین ڕێكخراوێن ل ناڤ كەمپان دا كار دكەن كارێ‌ وان دێ‌ ب داوی ئێت و كەمپان بجه هێلن،لەورا ئاوارە داخواز دكەن هاریكاری بەردەوام ل سەر وان بێنە بەلاڤكرن.
نەواف خودێدا،ئاوارەیەكێ‌ شنگالێ‌ یە ل كەمپا شاریا بۆ دەنگێ‌ لالش زەلالكر،پشتی هاتنا ئاوارەیێن شنگالێ‌ بۆ دەڤەرێن هەرێما كوردستانێ‌ ل سالا2014 سەرارەی قەیرانا دارایی ئەوا ل كوردستانێ‌ سەرهلدایی وهاتنا ڕێكخراوا داعش یا تیرۆری،حكومەتا هەرێما كوردستانێ‌ لگۆر شیانێن خۆ هاریكاریا خەلكێ‌ ئاوارەكر ب تایبەت ئاوارەیێن شنگالێ‌،بەلێ‌ پشتی كو كەمپە هاتینە چێكرن وخەلك هاتیە ڤەگوهاستن بۆ ناڤ كەمپان ڕێكخراوێن مرۆڤایەتی قەستا كەمپان كرن وهاریكاری پێشكێشی ئاواران دكرن ژ هەموو لایان ڤە،هەروەسا خەلكێ‌ شنگال دوێ‌ باوەریێ‌ دابوو پشتی شنگال دئێتە ئازادكرن دێ‌ زڤرنە سەر مال ومولكێن خۆ ڤە،بەلێ‌ شنگال هاتە ئازادكرن وخەلك نەزڤری پشتی كو چەندین هێز ولایەنێن جودا جودا ل شنگال سەر هلدای ونەیەكگرتنا جڤاكا ئێزدی ودابەشبوونا ئەوان بسەر چەندین لایان وهزروبیرێن جودا جودا دا رۆژ ب رۆژ كێشە وئاریشەیێن شنگال زێدەتربوون وئەڤ چەندە بوو ئاستەنگ كو خەلك ڤەنەگەرتە سەر جی و وارێن خۆ و ل ناڤ كەمپان دا بمینن،ل سالێن دەسپێكێ‌ ڕێكخراوێن ناڤ دەولەتی ب شێوەیەكی باش هاریكاریا ئاواران دكرن ژهەموو لایانڤە،بەلێ‌ پشتی بۆرینا چەندین سالان سال ب سال ڕۆلێ‌ ڤان ڕێكخراوان كێم دبت دهاریكاریكرنا ئاواراندا ونۆكە بتریا ڤان ڕێكخراوان كارێ‌ خۆ راوەستاندیە وكەمپە بجه هێلاینە،هەروەسا ل دەسپێكێ‌ هەر خێزانەكێ‌ كوژمەكێ‌ دراڤی ددانێ‌ لێ‌ سال بۆ سال ئەو كوژمێ‌ دراڤی كێم دكرن وهەتا ڤێ‌ داویێ‌ لگۆر پێزانینا ل سەر چەندین كەمپان ب یەكجاری هاتیە برین،ژبەر هندێ‌ سال ب سال رەوشا ئاواران خراپتر لێ‌ دئێت وب تایبەت ل وەرزێ‌ زڤستانێ‌ وهاڤینێ‌ ل بەر سەقەم وسەرما زڤستانێ‌ وگەرم وتیرۆشكا رۆژێ‌ ل بن خیڤەتێن نایلۆنی دا دنالینن.
ژلایەكێ‌ دی ڤە سوفیان هادی،ئاوارەیەكێ‌ خەڵكێ‌ شنگالێ‌ یە ل كەمپا خانكێ‌ ئاكنجی یە بۆ دەنگێ‌ لالش گۆت:بێگۆمان مانا ئاواران ل دەمەكێ‌ هوسا درێژ ودرەوشەكا خرابدا ل ناڤ كەمپان ساڵ بۆ سالێ‌ ئاستەنگێن ژیانێ‌ زێدە دبن و رەوشا وان خرابتر ونەباشتر بت و رێژا هەژاری وبەلنگازیێ‌ زێدەتر دبت،و ژیانا وان یا رۆژانە دێ‌ گەلەك ب زەحمەتر لێ‌ ئێت، هەروەسا ب هاتنا وەرزێ‌ زڤستانێ‌ رەوشا ئاوارێن ل ناڤ كەمپان دا و یێن ژ دەرڤەی كەمپان پەریشان وزەحمەت دبت،ل دەستپێكا ئاوارەبوونێ‌ گەلەك ڕێكخراو هاتنە دناڤ كەمپان دا و ژ هەموو ئالیان ڤە هاریكاری پێشكێش كرن،ئیرۆ رۆژ ڕۆلێ‌ رێكخراوێن مرۆڤایەتی ونە حكومی ژبۆ پێشكێشكرنا خزمەتگۆزاریان گەلەك پاشڤەچوویە،ب مخابنی ڤە ئەو هاریكاریا ماددی یا كو دهات دابەشكرن ل سەر دەستێ‌ ڕێكخراوێن مرۆڤایەتی ل ناڤ كەمپان دا هاتە ڕاوەستاندن و نۆكە ڕێژەیەكا زۆر ژ ئاواران دبێ‌ بەهرن ژڤێ‌ هاریكاریێ‌،ب مخابنی ڤە ئەو ڕێكخراو بەردەوام نەبووینە ل سەر هاریكاریێن خۆ وكار وهاریكاریێن وان دەمكی بوون،لەوا داخواز دكن هاریكاریا ئاواران بێتە كرن.
دەربارەی رەوشا ئاواران پشتی بۆرینا هەشت ساڵێن ئاوارەبوونێ‌،رێڤەبەرێ‌ كەمپا ئێسیان عامر عەبۆ بۆ دەنگێ‌ لالش دیاركر،رۆژ بۆ رۆژێ‌ رەوشا ئاواران خرابتر دبت و خزمەتگۆزاری كێم دبن،هەروەسا ڕۆل و كارێ‌ ڕێكخراوان پتر لاواز دبت و بەرەف كێمیێ‌ دچت و ئێك ژوان هاریكاریان دابەشكرنا كوژمەكێ‌ دراڤی ل سەر ئاواران ل ناڤ كەمپان دا ژلایێ‌ رێكخراوا (WFP )كو تا رێژا(50%) كێمبوویە ول داویا ئیسالە چەندین ڕێكخراوێن ل ناڤ كەمپان دا كارێ‌ وان دێ‌ ب داوی ئێت و بەرەف نەمانێ‌ ڤە چت،چنكو ئاوارابوون درێژ بوو و ژ حالەتێن لەز و تەنگاڤیێ‌ دەركەت و هاریكاری و خزمەتگۆزاری دێ‌ ڕادەستی حكومەتێ‌ بن، خزمەتگۆزاریێن سەرەكی ل ناڤا كەمپان دا تێكچووینە وەكو ئاڤ و كارەب و ڕێك و پتریا خیڤەتان پێتڤی یە بێنە گهۆرین ونووژەنكرن،زێدەباری هەتا نهۆ كەلوپەلێن وەرزێ‌ زڤستانێ‌ نەهاتینە بەلاڤكرن ل گۆر ئاستێ‌ پێتڤی.
ژبال خۆڤە بایز كرێت،رێڤەبەرێ‌ كەمپا مام رەشان بۆ دەنگێ‌ لالش ئاشكەراكر،دەمێ‌ ئاوارەبوونێ‌ درێژ بوو ئەڤە ماوێ‌ بتر ژ هەشت ساڵایە خەلكێ‌ مە ژیانا خۆ یا پڕ دژوار لبن خیڤەتان دا ب رێڤەدبەن ب شێوەیەكی ئاستەنگ و زەحمەت،هەتا ڤێ‌ داویێ‌ چەندین حالەتێن خۆ كوشتنێ‌ ل ناڤ ئاواران دا چێبووینە وسالانە دەروونێ‌ چەندین كەسان تێكدچت ژبەر وێ‌ رەوشا خراپ و ژینگەها خراپا تێدا دژین،هەر ساڵ ب هاتنا وەرزێ‌ زڤستانێ‌ ئاریشە وگازندێن ئاواران زێدەتر دبن ژبەر مەترسیا باهۆز وبارانێ‌ پێتڤیە ل سەر حكومەت و ڕێكخراوێن مرۆڤایەتی هاریكاریا ئاواران دهەموو بواران دا بێتە كرن ب تایبەتی پێتڤیێن زڤستانێ‌ ژ گازا سپی وكەلوپەلێن دن كو د دەمێ‌ خۆدا بێنە دابەشكرن،ئەم داخوازێ‌ ژ حكومەتا عێراقێ‌ وحكومەتا هەرێما كوردستانێ‌ و كۆمەلگەها ناڤدەولەتی دكەین پێكڤە كاربكەن بۆ ڤەگەراندنا خەلكێ‌ بۆ جی و وارێن وان وقەرەبوویا ئەوان بێتە كرن و ب رژدی ل سەر كەیسا ئێزدیان راوەستن وپاراستنا ئەوان بكەن دا جارەكا دی خەلك بكارن ب شێوەیەكی ئاسایی ژیانا خۆ ب رێڤەببەن.
ب هەزاران ئاوارەیێن شنگالێ‌ هێشتا دژیانا ئاوارەبوونێ‌ دا و درەوشەكا سەخت و دژوار دا ژیانا خۆ ل ناڤا كەمپان و ژ دەرڤەی كەمپان ل دەڤەرێن جودایێن هەرێما كوردستانێ‌ دەرباز دكەن،هیڤی و داخوازا وان ئەوە رەوشا شنگال ئاسایی ببتە ڤە داكو ڤەگەرنە سەر جی و وارێن خۆ ڤە.

 

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi