ڤەكۆلەرەكێ‌ جڤاكی:خێزانا ئێزدی نۆكە دسێ‌ قۆناغان دا دەرباز دبت

ڤەكۆلەرەكێ‌ جڤاكی:خێزانا ئێزدی نۆكە دسێ‌ قۆناغان دا دەرباز دبت
دەنگێ‌ لالش/ناسر شەهوانی
كۆچبەری دیاردەیەكا جیهانی یە و كارتێكرنا خۆ ژی چ ب ئەرێنی یان نەرێنی ل سەر خێزانێ‌ هەیە،مللەتێ‌ ئێزدی ئێك ژ وان مللەتانە پشتی تووشی جینۆسایدێ‌ بووین ل سەر دەستێ‌ ڕێكخراوا داعش یا تیرۆری كۆچبەری دەرڤەی وەلاتی ببن،ڤەكۆلەرەكێ‌ جڤاكی ژی دیاركر كو خێزانا ئێزدی د نۆكەدا د سێ‌ چینان دا دەرباز دبت و ب بۆرینا وەختی ڕێژا كۆچبەریێ‌ دناڤ ئێزدیان دا دی زێدە بت.
ل دۆر كارتێكرنا كۆچبەریێ‌ ل سەر خێزانا ئێزدی،سابر بەرەكات ڤەكۆلەرێ‌ جڤاكی بۆ دەنگێ‌ لالش خویاكر،جڤاكێ‌ ئێزدی ئیرۆ رۆژ د قۆناغەكا گران و مەترسیدار دا دەرباز دبت ئەوژی ژ ئەگەرێ‌ فەرمان و جینۆسایدا ب سەرێ‌ ئێزدیان دا هاتی ئەوا ل ڕۆژا3/8/2014 ل سەر دەستێ‌ تیرۆرستێن داعشێ‌ هاتیە ئەنجام دان،بێگۆمان ئێك ژوان خالێن مەترسیدار یێن رووبرووی ئێزدیان بووی كۆچبەری یە كو كارتێكرنەكا مەزن ل ژیانا خێزانا ئێزدی كریە و ژینگەها خێزانێ‌ تووشی ژێكڤەبوونێ‌ كریە و خێزان پارچە پارچە كریە،ئێزدی ل سەرانسەری وەلاتێن جیهانێ‌ بەلاڤ بووینە،ئەڤ چەندە ژی بۆ گەلەك ئەگەران دزڤرت ژ وانژی پشتگوهـ خستنا دەڤەرێن ئێزدیان ژلایێ‌ حكومەتێ‌ و نەئاڤاكرنا شنگالێ‌ و بێ‌ هیڤی بوونا ئێزدیان ژ دەستهەلاتێن عێراقێ‌، و ڤێ‌ چەندێ‌ كاریگەری ل سەر ژیانا خێزانا ئێزدی كریە و ئاریشێن جڤاكی و خێزانی پەیداكرینە و بوویە ئەگەرێ‌ پرتبوونا خێزانا ئێزدی،هەروەسان خەلكێ‌ مە تووشی دوو دلێی و قەلەقیێ‌ بوویە،لەوما ئەم دەرئەنجاما دبینین ئەوژی خێزان دبتە پارچە پارچە و بەرەف وەلاتێن جیهانێ‌ دچن.
ڤەكۆلەرێ‌ جڤاكی ئەو چەندە ژی رۆنكر،خێزانا ئێزدی د نۆكەدا د سێ‌ چینان دا دەرباز دبت ئەوژی چینا باب و باپیرا دژیێ‌ (50) سالیێ‌ و سەردا، كو بتریا وان ل دژی كۆچبەریێ‌ نە و هزرێن وان ب سەر پاراستنا ژینگەها خێزانێ‌ و پاراستنا جهـ و وار وداب و نەریتێن وانە داكو چ جاران نەئێنە هنداكرن و ژبیركرن، و چینا گەنجان دناڤبەرا (20 تا 50) سالیێ‌ دا كو تووشی دوو دلیێ‌ و قەلەقێ‌ بووینە چنكو ڕێژەیەكا زۆر یا كەسانێن د ڤی تەمەنی دا حەز و ئارەزوویا وان بەرەف ئازادیێ‌ و دیموكراسیێ‌ و مافێ‌ مرۆڤی و خۆشیا ژیانێ‌ ل وەلاتێن ئەورۆپا و ئەمریكا و ولاتێن دن یێن بیانی كۆچبەر ببن،و ڕێژەیەكا دی گەلەك دگەشبینن و ل بەندا وێ‌ چەندێ‌ نە چارەسەریا ئاریشەیێن وان بێنەكرن و هیڤی و ئارمانجا وان عێراق و كوردستان ب هەموو پێكهاتێن خۆ ڤە هەردەم د پاراستی و ساخلەم بن و ژیانا وان یا ئارام بت و بەرەف پاشەڕۆژەكا گەش و وەلاتەكێ‌ ئازاد و سەربەخۆ ب چن،هەروەسا چینا تەمەنێ‌ ل بن(20) سالیێ‌ دا كو زەرەرمەندێن سەرەكی ژ ڤێ‌ هاوكێشێ‌ و جینۆسایدێ‌ نە ئەڤ چینە بۆ ژیانا خۆ دقۆناغاكا دژوار و سەخت دا د ڤێ‌ فەرمانێ‌ دەرباز دبن و تووشی گەلەك نەخۆشیێن دەروونی بووینە،لەوما حەز و ئارەزوو و هزرێن وان رۆژ بۆ رۆژێ‌ بەرەف كۆچبەریێ‌ دچن،و ب بۆرینا وەختی ڕێژا كۆچبەریێ‌ زێدە دبت ژ ئەگەرێ‌ فەرمان و جینۆساید و بارودۆخێن سەخت و دژوار و نەخۆشی و گرنگیپێنەدان و پشتگوه هاڤێتنا گەنجان و نەبوونا خزمەتگۆزاریان و پرۆژێن كەرتێ‌ تایبەت و نەبوونا دەلیڤێن كاری و ژێدەرەكێ‌‌ دارایی و ئێمناهی و ئاسایش و ئارامیێ‌ ل دەڤەرێن وان و پلانێن ستراتیژی بۆ پاشەڕۆژەكا گەش و كەسایەتیەكا بهێز بۆ وان.
سەبارەت كاریگەریا كۆچبەریێ‌ ل سەر ناسناما ئێزدیان،ناڤهاتی دبێژت:بێگۆمان كۆچبەریا مللەتێ‌ مە و تێكەلبوونا وان دگەل خەلكێ‌ بیانی ل وەلاتێن جیهانێ‌ دێ‌ كارتێكرن ل سەر زمان و ئەدەب و ناسنامە و داب و نەریتێن وان كەت،ئەڤ چەندە ژی وەسا بۆ مە دیار دكەت و ئەڤە ژی وێ‌ چەندێ‌ دیاردكەت كو مەترسی ل سەر نەمانا ئێزدیان ل عێراقێ‌ هەیە،ژبەركو دەمێ‌ هەر مللەتەكی ئاخ و جوگرافیەت و زمانێ‌ خۆ بجهـ هێلان ئەو مللەت دێ‌ هێدی هێدی بەرەف كێم بوون ونەمانێ‌ ڤە چت.