شوبات 05, 2023

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

راوێژكارێ سه‌رۆكێ هه‌رێمێ بۆ كاروبارێن ئێزدیان: هه‌تا نۆكه‌ 15 وه‌لاتان كه‌یسا ئێزدیان ب جینۆساید ناساندیيه‌

راوێژكارێ سه‌رۆكێ هه‌رێمێ بۆ كاروبارێن ئێزدیان: هه‌تا نۆكه‌ 15 وه‌لاتان كه‌یسا ئێزدیان ب جینۆساید ناساندیيه‌
تۆرا لالش یا راگه‌هاندنێ /رائد غانم

راوێژكارێ سه‌رۆكێ هه‌رێما كوردستانێ بۆ كاروبارێن ئێزدیان دیاركر كو بزاڤێن وان دبه‌رده‌وامن دگه‌ل یونیتاد و حكومه‌تا هه‌رێمێ ژى ب جدى ل سه‌ر ڤى كه‌یسى و كه‌یسا شنگالێ ب گشتى كار دكه‌ت،داكو ئه‌وا ب سه‌رێ ئێزدیان دا هاتى وه‌ك جینۆساید بێته‌ ناسكرن،ل سه‌ر ئاستێ نێڤ ده‌وله‌تى ژى هه‌تا نۆكه‌ 15وه‌لاتان كه‌یسا ئێزدیان ب جینۆساید ناساندیه‌.حسێن قاسم حه‌سون،راوێژكارێ سه‌رۆكێ هه‌رێما كوردستانێ بۆ كاروبارێن ئێزدیان بۆ رۆژناما ده‌نگێ لالش ئاشكه‌راكر،هه‌تا نۆكه‌ 15وه‌لاتان تاوانا داعشێ دژى ئێزدیان ئه‌نجام داى ب جینۆساید ناسكرینه‌ و دانپێدان پێكرینه‌ ل سه‌ر بنه‌مایێن یاسایى و ئه‌ڤه‌ پێنگاڤ گرنگه‌،هه‌روه‌سا رۆلێ سه‌رۆكێ هه‌رێما كوردستانێ نێچیرڤان بارزانى بۆ پشته‌ڤانیكرنا كه‌یسا ئێزدیان بلند دنرخینین و سه‌ركه‌فتنێن باش ل دۆر ڤى كه‌یسى هه‌نه‌ سه‌باره‌ت جینۆسایدێ،دیسان ل داوى راپۆرتا یونیتاد دا هاتیه‌ لدووڤ لێكولینیا وان یا سه‌ربه‌خۆ ئه‌ڤا ب سه‌رێ ئێزدیان دا هاتى تاوانا جینۆسایدێ یه‌ و ئه‌ڤ یه‌ك ژى پێنگاڤه‌كا گه‌له‌ك باشه‌ ژبۆ ئێزدیان و كارتێكرنا یونیتاد ل سه‌ر وه‌لاتان هه‌یه‌،كو پتر ڤى كه‌یسى ب جینۆساید ناس بكه‌ن.دوپاتكر ژى بزاڤێن وان د به‌رده‌وامن دگه‌ل یونیتاد و حكومه‌تا هه‌رێما كوردستانێ ژى ب جدى ل سه‌ر ڤى كه‌یسى و كه‌یسا شنگالێ ب گشتى كار دكه‌ت،داكو ئه‌وا ب سه‌رێ ئێزدیان دا هاتى وه‌ك جینۆساید بێته‌ ناسكرن و بزاڤان دكه‌ین هه‌موو وه‌لاتان بیننه‌ سه‌ر هێل داكو دانپێدانێ ب جینۆسایدێ بكه‌ن،زێده‌بارى هندێ ئه‌و وه‌لات و په‌رله‌مانێن دانپێدان ب جینۆسایدێ كرین پتر دانپێدانا سیاسى بوویه‌.
ده‌رباره‌ى گۆڕێن بكۆم ل شنگالێ گۆت:گۆڕێن بكۆم دیده‌ڤانن ل سه‌ر تاوانێن داعش دژى ئێزدیان و ئه‌ڤ گۆڕێن بكۆم مه‌زنترین به‌لگه‌نه‌ ژبۆ كه‌یسا جینۆسایدێ،زێده‌بارى هه‌بوونا گۆڕان گه‌له‌ك به‌لگه‌یێن دى ژى ل به‌ر ده‌ستێ وان هه‌نه‌،نۆكه‌ هه‌موو گۆڕێن بكۆم لدووڤ ستاندارتێن جیهانى هاتینه‌ سیمكرن و كار ل سه‌ر ڤان گۆڕان دئێته‌ كرن،كو هه‌تا نۆكه‌ 87 گۆڕێن بكۆم ل شنگال و ده‌وروبه‌رێن وێ و 39 ژوان هاتینه‌ ڤه‌كرن ل گوندێن كۆچۆ و سۆلاخ و حه‌ردان و قنێ و سه‌نته‌رێ شنگالێ وتا نۆكه‌ 146روفاتێن وان شه‌هیدا هاتینه‌ ناسكرن ب رێیا پزیشكیا داد ل به‌غدا،حكومه‌تا هه‌رێما كوردستانێ و وه‌زاره‌تا شه‌هید و ئه‌نفالكریا رۆله‌كێ مه‌زن دڤى بابه‌تى دا هه‌یه‌ ژبۆ ڤه‌كرنا گۆڕان و تیمێ حكومه‌تا هه‌رێمێ یێ ڤه‌كرنا گۆڕێن بكۆم هاتینه‌ مه‌شقدان ل سه‌ر ئاستێ نێڤ ده‌وله‌تى و كاره‌كێ مه‌زن ئه‌نجامداینه‌.
ل داویێ گۆت:هه‌تا نۆكه‌ نێزیكى450 روفاتێن گۆڕێن بكۆم هاتینه‌ دیتن و هاتینه‌ ره‌وانه‌كرن بۆ پزیشكیا داد ل به‌غدا بۆ ناسكرنا وان كه‌سان،داخواز دكه‌ین خه‌لك سامپلێن خوونێ بده‌ن داكو كارێ وان باشتر برێڤه‌ بچت،تیمێ یونیتاد سامپلان ل ئه‌لمانیا ژى وه‌ردگرت ژ ئێزدیان.
س.س

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi