پۆلیسێن زاخۆ:دوو كه‌س ب توهمه‌تا كوشتنا ئاواره‌يه‌كێ ئێزدى هاتينه ده‌سته‌سه‌ركرن
باسنيوز:
پشتى كۆ به‌ریا شه‌ش رۆژان كه‌سه‌ك ب ناڤێ فارۆق میرزا دگه‌ل ئاخین میرزا ل كه‌مپا چه‌م مشكۆ ل زاخۆ پشتى ژ كه‌مپێ ده‌ركه‌فتین، بۆ ده‌ما شه‌ش رۆژانه به‌رزه بوون، دره‌نگیا شه‌ڤا بۆرى ته‌رمێ وى كه‌سى ب كۆشتى هاتیه دیتن و هه‌تا نۆكه چاره‌نڤیسێ وێ كچێ ژى دیار نینه و پۆلیسێن زاخۆ دوو كه‌س ژ خێزانا وى ب تۆمه‌تا كۆشتنا وى ده‌سته‌سه‌ركرینه”.
عه‌قید نزار سلێمان،رێڤه‌به‌رێ پۆلیسێن ئیدارا سه‌ربه‌خۆ یا زاخۆ د كۆنگره‌كێ رۆژنامه‌ڤانى دا گۆت:” پشتى كۆ ئه‌م هاتینه ئاگه‌هداركرن كه‌سه‌ك ب ناڤێ فارۆق میرزا دژیێ 42 سالیێ دا دگه‌ل كچا وى ب ناڤێ ئاخین میرزا یا شه‌ش سالى ل حه‌فتیا بۆى لرێكه‌فتى 3/8/022 ژ كه‌مپا چه‌م مشكۆ ده‌ركه‌فتین و دیار نه‌ماین، مه ده‌ست ب ڤه‌كۆلینێ كریه، تا كۆ دره‌نگیا شه‌ڤا بۆرى مه ته‌رمێ وى زه‌لامێ كوردێ ئێزدى ل ناڤ مه‌زره‌عه‌كا ده‌رۆبه‌رێن زاخۆ دیتیه و چاره‌نڤیسێ كچا وان دیار نینه”.
رێڤه‌به‌رێ پۆلیسێن زاخۆ دیار ژى كر:” هه‌ر ئێك ژ رێڤه‌به‌رێ گشتى یێ پۆلیسێن هه‌رێما كوردستانێ، دگه‌ل پۆلیسێن دهۆك و نه‌هێلانا گۆنه‌هباریان ل دهۆكێ ل سه‌ر خه‌تن ب هه‌ڤكاریا پۆلیسێن زاخۆ تا كۆ تۆمه‌تبارێن سه‌ره‌كى بهێنه دیاركرن”.
گۆتژى:” دوو كه‌س ژ خێزانا وى زه‌لامى كو هه‌ڤژین و كچه‌كا وى ب تۆمه‌تا كۆشتنا فارۆقى هاتینه ده‌سته‌سه‌ركرن بۆ وه‌رگرتنا پێزانینان د هه‌مان ده‌مدا تاوانبارێ سه‌ره‌كى دیاربویه كۆ كه‌سه‌كێ دیتره لێ نه‌هاتیه ده‌سته‌سه‌ركرن و هه‌ولێن مه بۆ ده‌سته‌سه‌ركرنا وى د به‌رده‌وامن”.
رێڤه‌به‌رێ پۆلیسێن زاخۆ گۆتژى:” ته‌رمێ وى زه‌لامى نها دا ل نۆژداریا داد یا دهۆكێ یه و ڤه‌كۆلین لسه‌ر ڤێ رۆیدانێ به‌رده‌وامه”.
فارۆق میرزا 42 ساله، ئاخین میزرا كچا وى شه‌ش ساله، ل رێكه‌فتى 3/8/2022 ل كه‌مپا چه‌م مشكو ل زاخۆ ده‌ركه‌فتینه و دره‌نگیا شه‌ڤا بۆرى ته‌رمێ فارۆقى ب كۆشتى هاتیه دیتن و چاره‌نڤیسێ كچا وى دیار نینه.
