تشرینی دووه‌م 01, 2020

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

هێزێن نه‌ شه‌رعی ره‌وشا شنگال ئالۆز كریه

هێزێن نه‌ شه‌رعی ره‌وشا شنگال ئالۆز كریه

‌باسنيوز:

قایقمامێ قه‌زا شنگالێ د داخویانیه‌كێ دا دیار دكه‌ت كو هه‌بوونا چه‌ندین هێزێن نه‌ شه‌رعی و نه‌ یاسایی ، ره‌وش و ژین و ژیارا خه‌لكێ شنگالێ تێك دایه‌ و ژیان ل وێ قه‌زایێ ئالۆز كریه‌.

مه‌حما خه‌لیل، قایمقامێ قه‌زا شنگالێ بۆ (باسنیوز) دا دیاركرن: “ل قه‌زا شنگالێ گه‌له‌ك ئاریشه‌ و ئاسته‌نگی هه‌نه‌ مینا، نه‌بوونا خزمه‌تگوزاریان، هه‌بوونا ئاریشێن سیاسی، مه‌ترسیا بارزگانیا قاچاخ ل ده‌رگه‌هێن سنوری، و ئه‌ڤ چه‌نده‌ هه‌می بووینه‌ ئه‌گه‌ر كو خه‌لكێ قه‌زا شنگالێ تووشی دلگرانیێ ببیت و ژین و ژیار ل وێ قه‌زایێ ئالۆز و ب زه‌حمه‌ت بكه‌ڤیت. زێده‌باری وێ چه‌ندێ كو وه‌كه‌ پێتڤی تا نها خه‌لك نه‌ڤه‌گه‌ریایه‌ ناڤا قه‌زا شنگالێ دا، لێ ئه‌گه‌ر ئه‌ڤ هه‌مو ئاریشێن هه‌ین ل ده‌ڤه‌را مه‌ نه‌بان، خه‌لكێ مه‌ بێ دوو دلی دا قه‌ستا سه‌ر ئاخا خۆ كه‌ت و جاره‌ك دی ده‌ست ب ژیانێ كه‌ت”.

قایمقامێ قه‌زا شنگالێ ئاماژه‌ ب وێ چه‌ندێ ژی دا: “هه‌بوونا بنگه‌هێن پارتا كرێكارێن كوردستانێ (په‌كه‌كێ) و هه‌بوونا حه‌شدا شه‌عبی، ره‌وشا قه‌زا شنگالێ تێك دایه‌ و ژیان ل وێ ده‌ڤه‌رێ ب زه‌حمه‌ت كریه‌ چونكه‌ د هه‌مان ده‌م دا حه‌شا شه‌عبی زۆرداریێ ل خه‌لكێ دكه‌ت و ئه‌و زۆرداریه‌ ژی ژیان ل شنگالێ ب زه‌حمه‌ت ئێخستیه‌ و هه‌ر دیسان بوویه‌ ئه‌گه‌ر كو خه‌لك قه‌ستا گوند و ده‌ڤه‌رێن خۆ نه‌كه‌ت ، چونكه‌ خه‌لك دزانیت نها ل شنگالێ ئاریشێن سیاسی ژیان ب زه‌حمه‌ت ئێخستیه‌”.

ناڤبری ته‌كه‌زل وێ چه‌ندێ ژی كر:” هژماره‌كا هێزێن نه‌ شه‌رعی و نه‌ یاسایی ل ناڤا قه‌زا شنگالێ هه‌نه‌ و په‌كه‌كه‌ و حه‌شدا شه‌عبی نمونا وان هێزانه‌، و ئه‌و هێزه‌ ل قه‌زا شنگالێ بازرگانیا قاچاخ ئه‌نجام دده‌ن و ئه‌ڤ چه‌نده‌ جهێ دلگرانیا مه‌ یه‌ و ئه‌م دخازین سنورێ قه‌زا شنگالێ دگه‌ل وه‌لاتێ سوریا بهێته‌ كۆنترول كرن، چونكه‌ نها ل سنورێ شنگالێ بۆ سوریا بارزگانیا قاچاخ دهێته‌ ئه‌نجام دان و ئه‌نجامدانا ئه‌ڤێ بازرگانیێ ژی ژلایێ هێزێن نه‌ شه‌رعی ڤه‌ دهێته‌ ئه‌نجام دان”، و گۆت ژی: “ئه‌گه‌ر سنورێ شنگالێ بۆ سوریا بهێته‌ كۆنترولكرن چ مه‌ترسیا جموجولا چه‌كدارێن داعش نامینیت و ئه‌گه‌ر هات كۆنترولكرن ئانكو کۆنترولكرنه‌ ل سه‌ر بازرگانیا نه‌ شه‌رعی و ل سه‌ر هه‌بوونا چه‌كێن نه‌ شه‌رعی و ب كۆنترولكرنا سنورێ شنگالێ بۆ سوریا دێ ئاریشێن شنگالێ كێمتر هێن دیتن و ئه‌ڤ چه‌ندە دبیته‌ ئه‌گه‌ر خه‌لك هه‌ست ب ئارامیا ده‌ڤه‌را خۆ بكه‌ت”.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.